ന്യൂദൽഹി: ലോക്സഭാ മണ്ഡല അതിർത്തി പുനർനിർണ്ണയും ബിജെപിക്ക് അടുത്ത 50 വർഷം തുടർഭരണം ഉറപ്പാക്കാനാണെന്ന ആരോപണം ആഭ്യന്തരമന്ത്രി തുറന്നുകാട്ടി. ആരോപണം വ്യാജമാണെന്നും ദക്ഷിണേന്ത്യയിൽ സീറ്റെണ്ണം നിലവിലെ 129 ൽ നിന്ന്് 195 ആയി വർദ്ധിക്കുമെന്നും അമിത് കാ വിശദീകരിച്ചു. ലോക്സഭാ മണ്ഡല പുനർനിർണ്ണയ ബില്ലിന്മേൽ ഉയർന്ന ആക്ഷേപങ്ങൾക്ക് മറുപടി പറയുകയായിരുന്നു അദ്ദേഹം.
മണ്ഡല പരിധി നിർണ്ണയത്തിന് ശേഷം ലോക്സഭയിൽ ദക്ഷിണേന്ത്യൻ സംസ്ഥാനങ്ങളുടെ പ്രാതിനിധ്യം കുറയുമെന്ന് ഒരു കഥ സൃഷ്ടിക്കപ്പെടുന്നുണ്ടെന്ന് കേന്ദ്ര ആഭ്യന്തര മന്ത്രി അമിത് ഷാ പറഞ്ഞു. എന്നാൽ യഥാർത്ഥത്തിൽ അവരുടെ അംഗസംഖ്യ വർദ്ധിക്കുമെന്ന് അദ്ദേഹം ഉറപ്പിച്ചു പറഞ്ഞു. ദക്ഷിണേന്ത്യൻ സംസ്ഥാനങ്ങളുടെ അംഗസംഖ്യ ലോക്സഭയിൽ 195 ആയി ഉയരും.
പാർലമെന്റിന്റെ പ്രത്യേക സമ്മേളനത്തിനിടെ ലോക്സഭയിൽ സംസാരിച്ച ഷാ പറഞ്ഞു, ‘ഈ മൂന്ന് ബില്ലുകൾ, ഭരണഘടനാ ഭേദഗതി ബിൽ, ഡീലിമിറ്റേഷനെക്കുറിച്ചുള്ള രണ്ട് അനുബന്ധ നിയമങ്ങൾ, തിരഞ്ഞെടുപ്പ് നടപടിക്രമങ്ങളിലെ മാറ്റങ്ങൾ എന്നിവ ലോക്സഭയിൽ ദക്ഷിണേന്ത്യൻ സംസ്ഥാനങ്ങളുടെ പ്രാതിനിധ്യം കുറയ്ക്കുകയും അവയ്ക്ക് കാര്യമായ നഷ്ടം വരുത്തുകയും ചെയ്യുമെന്ന് ഒരു ആഖ്യാനം സൃഷ്ടിക്കപ്പെടുന്നു, ആശയക്കുഴപ്പം പ്രചരിപ്പിക്കപ്പെടുന്നു. സഭയ്ക്ക് മുന്നിലുള്ള ബിൽ ഇപ്പോൾ സഭയുടെ സ്വത്താണ്.’
അതിർത്തി പുനർനിർണയം ദക്ഷിണേന്ത്യൻ സംസ്ഥാനങ്ങൾക്കുള്ള സീറ്റ് നേട്ടങ്ങൾ അമിത് ഷാ പട്ടിക നിരത്തി പറഞ്ഞു.
സീറ്റുകളുടെ മൊത്തത്തിലുള്ള വർദ്ധനവ് ഒരു സംസ്ഥാനത്തിനും നിലവിലുള്ള പ്രാതിനിധ്യം നഷ്ടപ്പെടുത്തുന്നില്ലെന്ന് ഉറപ്പാക്കുമെന്ന് ഷാ പറഞ്ഞു. ജനസംഖ്യാ വ്യതിയാനങ്ങൾ കണക്കിലെടുത്ത് നീതി നിലനിർത്തുക എന്നതാണ് വിപുലീകരിച്ച ലോക്സഭയിലൂടെ ലക്ഷ്യമിടുന്നതെന്ന് അദ്ദേഹം ഊന്നിപ്പറഞ്ഞു. ‘ദക്ഷിണേന്ത്യയിൽനിന്നുള്ള കണക്ക് നോക്കിയാൽ നിലവിലെ 543 സീറ്റുകളിൽ 129 എംപിമാരാണ് ഇപ്പോൾ ഉള്ളത്. ഇത് ഏകദേശം 23.76% ആണ്. പുതിയ സഭയിൽ, 195 എംപിമാർ ഉണ്ടാവും, ശതമാനക്കണക്കിൽ 23.97% ആകും,’ ഷാ പറഞ്ഞു.
കർണാടകയ്ക്ക് 28 സീറ്റുകളാണുള്ളത്, സഭയിലെ 543 സീറ്റുകളിൽ 5.15 % ആണ് ഇത്. പുതിയ ബിൽ പാസാകുമ്പോൾ, കർണാടക എംപിമാരുടെ എണ്ണം 28 ൽ നിന്ന് 42 ആകും, ലോക്സഭയിലെ സംസ്ഥാനത്തിന്റെ പങ്കാളിത്തം 5.44 % ആകും. കർണാടകയ്ക്ക് ഒരു നഷ്ടവും സംഭവിക്കില്ല.
ആന്ധ്രാപ്രദേശിന് 25 സീറ്റുകളുണ്ട്, അതായത് 4.60 %. ബിൽ പാസായശേഷം, എംപിമാരുടെ എണ്ണം 38 ആകും, അതായത് 4.65 ശതമാനമാകും.
തെലങ്കാനയിൽ 17 സീറ്റുകൾ (അതായത് 3.13 ശതമാനം), ബിൽ പാസായശേഷം, 26 ആകും, അതായത് 3.18 ശതമാനമാകും.
തമിഴ്നാട്ടിൽ 49 സീറ്റുകളുണ്ട്, അതായത് 7.18 ശതമാനം. ബിൽ പാസാകുന്നതോടെ, എണ്ണം 59 ആകും, പുതിയ സഭയിലെ അവരുടെ ശതമാനം 8.16 ആകും. തമിഴ്നാടിനും ഒരു നഷ്ടവും സംഭവിക്കില്ല
കേരളത്തിന് 20 സീറ്റുകളുണ്ട്, അതായത് 3.68 ശതമാനം. ബിൽ പാസായതിനുശേഷം, എംപിമാരുടെ എണ്ണം 30 ആകും, പുതിയ സഭയിലെ അവരുടെ ശതമാനം 3.67 ശതമാനമായിരിക്കും.
‘തമിഴ്നാടിനെ സംബന്ധിച്ചിടത്തോളം, നിരവധി ആളുകൾ ആശങ്കകൾ പ്രകടിപ്പിച്ചുവരുന്നു, നിങ്ങളുടെ പ്രാതിനിധ്യം കുറയില്ലെന്ന് ഞാൻ സംസ്ഥാനത്തെ ജനങ്ങൾക്ക് ഉറപ്പ് നൽകാൻ ആഗ്രഹിക്കുന്നു; അത് വർദ്ധിക്കും,’ അദ്ദേഹം കൂട്ടിച്ചേർത്തു.
സംസ്ഥാന തിരിച്ചുള്ള സീറ്റ് വിഭജനം
കേരളം, തമിഴ്നാട്, കർണാടക, ആന്ധ്രാപ്രദേശ്, തെലങ്കാന എന്നീ അഞ്ച് ദക്ഷിണേന്ത്യൻ സംസ്ഥാനങ്ങൾക്ക് നിലവിൽ ലോക്സഭയിൽ 129 സീറ്റുകളാണുള്ളത്, ഇത് 195 ആയി വർദ്ധിപ്പിക്കാൻ നിർദ്ദേശിക്കപ്പെട്ടിരിക്കുന്നു.
സംസ്ഥാനങ്ങൾ നിലവിലെ സീറ്റുകളുടെ എണ്ണം ഡീലിമിറ്റേഷനു ശേഷമുള്ള സീറ്റുകളുടെ എണ്ണം
കേരളം -(20) 30,
തമിഴ്നാട് -(39) 59,
കർണാടക (28) 42,
ആന്ധ്രപ്രദേശ് (25) 38,
തെലങ്കാന (17) 26<
ഡീലിമിറ്റേഷൻ കമ്മീഷൻ നിയമം മാറ്റിയിട്ടില്ല എന്ന് അമിത് ഷാ പറഞ്ഞു. നിർദിഷ്ട ഡീലിമിറ്റേഷൻ ബിൽ മുൻ സർക്കാരുകൾ കൊണ്ടുവന്നതിന് സമാനമാണെന്ന് ആഭ്യന്തരമന്ത്രി ഉറപ്പുനൽകി, അതിന്റെ ചട്ടക്കൂടിലെ ഏതെങ്കിലും പ്രധാന മാറ്റങ്ങളെക്കുറിച്ചുള്ള ആശങ്കകൾ തള്ളിക്കളഞ്ഞു.
‘ബഹുമാനപ്പെട്ട അംഗം പ്രിയങ്ക ജിയോട് ഞാൻ പറയാൻ ആഗ്രഹിക്കുന്നു, ഡീലിമിറ്റേഷൻ കമ്മീഷൻ നിയമത്തിൽ ഞങ്ങൾ ഒരു മാറ്റവും വരുത്തിയിട്ടില്ല. ഒരു കോമയോ പൂർണ്ണവിരാമമോ പോലും മാറ്റിയിട്ടില്ല; നിലവിലുള്ള ഡീലിമിറ്റേഷൻ കമ്മീഷൻ നിയമം ഞങ്ങൾ പൂർണ്ണമായും നിലനിർത്തിയിട്ടുണ്ട്. മുമ്പ് കൃത്രിമം നടന്നിട്ടുണ്ടെന്ന് നിങ്ങൾ പറയുകയും ഇപ്പോൾ അത് വീണ്ടും സംഭവിക്കാമെന്ന് പറയുകയും ചെയ്യുന്നുവെങ്കിൽ, എനിക്ക് ഇത് മാത്രമേ പറയാൻ കഴിയൂ, മുമ്പ് നിയമം ദുരുപയോഗം ചെയ്യപ്പെട്ടിട്ടുണ്ടെങ്കിൽ, ഞങ്ങൾ അങ്ങനെ ചെയ്യില്ല,’ അദ്ദേഹം പറഞ്ഞു.
തമിഴ്നാട്ടിലും പശ്ചിമ ബംഗാളിലും തെരഞ്ഞെടുപ്പ് നടക്കുമ്പോൾ പുതിയ നിയമം അവതരിപ്പിക്കുന്നുവെന്ന് ചിലർ ആരോപിക്കുന്നു. എന്നാൽ അത്തരം വാദങ്ങൾ അടിസ്ഥാനരഹിതമാണ്. ‘അത് ശരിയല്ല. ഡീലിമിറ്റേഷൻ കമ്മീഷന്റെ റിപ്പോർട്ട് പാർലമെന്റ് അംഗീകരിക്കുകയും രാഷ്ട്രപതിയുടെ അംഗീകാരം ലഭിക്കുകയും ചെയ്താൽ മാത്രമേ പ്രാബല്യത്തിൽ വരൂ. അതിനാൽ, 2029 ന് മുമ്പ് ഇത് നടപ്പിലാക്കുമെന്നതിൽ തർക്കമില്ല. 2029 വരെയുള്ള തെരഞ്ഞെടുപ്പുകൾ പോലും നിലവിലുള്ള സംവിധാനത്തിലും നിലവിലുള്ള മണ്ഡലങ്ങളിലും നടക്കും. അതിനാൽ അഖിലേഷ് ജി വിഷമിക്കേണ്ട ആവശ്യമില്ല, അദ്ദേഹം തുടർന്നു.
ലോക്സഭയിൽ സ്ത്രീകൾക്ക് 33% സംവരണം നിർബന്ധമാക്കുന്ന ബിൽ
ലോക്സഭയിലും സംസ്ഥാന/യുടി അസംബ്ലികളിലും സ്ത്രീകൾക്ക് 33 ശതമാനം സംവരണം നിർബന്ധമാക്കുന്ന ഭരണഘടന (131-ാം ഭേദഗതി) ബിൽ വോട്ടെടുപ്പിന് ശേഷം വ്യാഴാഴ്ച ലോക് സഭയിൽ അവതരിപ്പിച്ചു.
ദൽഹി, പുതുച്ചേരി, ജമ്മു കശ്മീർ എന്നീ കേന്ദ്രഭരണ പ്രദേശങ്ങളിലെ നിർദ്ദിഷ്ട ഭേദഗതി ചെയ്ത വനിതാ ക്വാട്ട നടപ്പിലാക്കുന്നതിനുള്ള ഡീലിമിറ്റേഷൻ ബിൽ, കേന്ദ്രഭരണ പ്രദേശ നിയമങ്ങൾ (ഭേദഗതി) ബിൽ എന്നീ രണ്ട് സാധാരണ ബില്ലുകളും വ്യാഴാഴ്ച സഭയിൽ അവതരിപ്പിച്ചു.
ഭരണഘടനാ ഭേദഗതി ബിൽ പ്രകാരം, ലോക്സഭാ സീറ്റുകളുടെ എണ്ണം നിലവിലുള്ളതിൽ നിന്ന് പരമാവധി 850 ആയി വർദ്ധിപ്പിക്കും.
