ന്യൂദല്ഹി: മുപ്പത്തിമൂന്ന് ശതമാനം വനിതാ സംവരണം നടപ്പാക്കുന്നതിന്റെ ഭാഗമായി ലോക്സഭാ മണ്ഡലങ്ങള് പുനര് നിര്ണയിക്കുന്നതിന് കമ്മിഷനെ നിയമിക്കാന് ബില്ലില് നിര്ദേശം. ഇതിനായി സുപ്രീംകോടതി ജഡ്ജി അധ്യക്ഷനായ സമിതിയെ നിയോഗിക്കും. മുഖ്യതെരഞ്ഞെടുപ്പ് കമ്മിഷണറോ കമ്മിഷണര് നിയോഗിക്കുന്ന ആളോ അംഗമായിരിക്കും. സംസ്ഥാന തെരഞ്ഞെടുപ്പ് കമ്മിഷണര്മാരും ഉണ്ടാകും.
സംവരണം നടപ്പാക്കുന്നതിന്റെ ഭാഗമായി ലോക്സഭാ മണ്ഡലങ്ങളുടെ എണ്ണം 850 ആയി ഉയര്ത്തും. നിലവില് 543 ലോക്സഭാ സീറ്റുകളാണ് ഉള്ളത്.
പാര്ലമെന്റില് നാളെ അവതരിപ്പിക്കാനിരിക്കുന്ന 131-ാം ഭരണഘടനാ ഭേദഗതി ബില്ലിലാണ് ഈ ശിപാര്ശ. 273 സീറ്റുകളാണ് വനിതകള്ക്കായി സംവരണം ചെയ്യുക. 815 മണ്ഡലങ്ങള് സംസ്ഥാനങ്ങളിലും 35 മണ്ഡലങ്ങള് കേന്ദ്രഭരണ പ്രദേശങ്ങളിലുമായിരിക്കും. 2029 ലെ ലോക്സഭാ തെരഞ്ഞെടുപ്പ് മുതല് സംവരണം നടപ്പാക്കുന്നതിനായി 2023ല് പാസാക്കിയ നാരീശക്തി വന്ദന് അധിനിയത്തിലാണ് ഭേദഗതി കൊണ്ടുവരുന്നത്. 131-ാം ഭരണഘടനാ ഭേദഗതി ബില്ലിനൊപ്പം മണ്ഡല പുനര് നിര്ണയബില്ലും പാര്ലമെന്റില് അവതരിപ്പിക്കും. 2011 ലെ സെന്സസ് അടിസ്ഥാനമാക്കിയായിരിക്കും മണ്ഡല പുനര്നിര്ണയം.
അടുത്ത സെന്സസിന് ശേഷം മണ്ഡലപുനര്നിര്ണയം നടത്തണമെന്ന നിലവിലെ നിയമത്തിലെ വ്യവസ്ഥ ഒഴിവാക്കും. മണ്ഡല പുനര്നിര്ണയത്തിലൂടെ ലോക്സഭാ സീറ്റുകളുടെ എണ്ണം തീരുമാനിക്കുന്നതുമായി ബന്ധപ്പെട്ട ഭരണ ഘടന യിലെ 81, 82 അനുച്ഛേദങ്ങളില് അടക്കമാണ് ഭേദഗതി കൊണ്ടുവരുന്നത്.
നാളെ മുതല് 18 വരെയാണ് ബജറ്റ് സമ്മേളനത്തിന്റെ ഭാഗമായി പാര്ലമെന്റിന്റെ പ്രത്യേക സമ്മേളനം വിളിച്ച് ചേര്ക്കുന്നത്. സമ്മേളനത്തിന് മുന്നോടിയായി സുപ്രധാനമായ ബില്ലിനെ പിന്തുണയ്ക്കണമെന്ന് പ്രധാനമന്ത്രി നരേന്ദ്രമോദി മുഴുവന് എംപിമാരോടും ആവശ്യപ്പെട്ടിട്ടുണ്ട്. ഇതിന് മുന്നോടിയായി വിവിധ കക്ഷികളുമായും കേന്ദ്രസര്ക്കാര് ചര്ച്ച നടത്തുകയും ചെയ്തിരുന്നു. ഈ ദിവസങ്ങളില് മുഴുവന് അംഗങ്ങളും നിര്ബന്ധമായും ഹാജരാകണമെന്ന് കാണിച്ച് ഇരുസഭകളിലേയും എംപിമാര്ക്ക് ബിജെപിയും കോണ്ഗ്രസും വിപ്പ് നല്കിയിട്ടുണ്ട്.
