കോഴിക്കോട്: കേരളത്തിലെ ബാസ്കറ്റ്ബോള് പ്രതിഭകളെ കണ്ടെത്താനായി ബാസ്കറ്റ്ബോള് ലീഗ് കേരള (ബിഎല്കെ) സംഘടിപ്പിച്ച സംസ്ഥാനതല ടാലന്റ് ഐഡന്റിഫിക്കേഷന് പ്രോഗ്രാമായ ‘വണ് മിനിറ്റ് ടു ഹൂപ്പ്’ സ്കില് ചലഞ്ചിന് ആവേശകരമായ സമാപനം. കോഴിക്കോട് സില്വര് ഹില്സ് എച്ച്.എസ്.എസ്, തലശ്ശേരി മുന്സിപ്പല് സ്റ്റേഡിയം എന്നിവിടങ്ങളില് നടന്ന അവസാന ഘട്ട സെഷനുകളോടെയാണ് ഈ ബൃഹത്തായ പദ്ധതിയുടെ പ്രാഥമിക ഘട്ടം പൂര്ത്തിയായത്. ഇനി മെയ് മാസത്തില് നടക്കുന്ന അന്തിമ സെലക്ഷന് ട്രയല്സിലേക്കാണ് കായിക കേരളം ഉറ്റുനോക്കുന്നത്.
ഡാറ്റാ അധിഷ്ഠിത പ്രതിഭകളെ കണ്ടെത്തല്
സംസ്ഥാനത്തുടനീളം നടന്ന ഈ ചലഞ്ചില് അണ്ടര്-14, അണ്ടര്-19 (ആണ്കുട്ടികളും പെണ്കുട്ടികളും) വിഭാഗങ്ങളിലായി 1,150-ലധികം യുവ കായികതാരങ്ങള് പങ്കെടുത്തു. സ്റ്റാര്ട്ടിംഗ് ഫൈവ് സ്പോര്ട്സ് മാനേജ്മെന്റ് പ്രൈവറ്റ് ലിമിറ്റഡ്, കേരള ബാസ്കറ്റ്ബോള് അസോസിയേഷന്, എബിസി ബാസ്കറ്റ്ബോള് ഡെവലപ്മെന്റ് ലീഗ് പ്രൈവറ്റ് ലിമിറ്റഡ് എന്നിവയുടെ സംയുക്ത സംരംഭമാണിത്.
കളിക്കാരുടെ ഷൂട്ടിംഗ്, ഡ്രിബ്ലിംഗ്, പ്രതിരോധ മികവ് എന്നിവ ഒരു മിനിറ്റ് നീണ്ടുനില്ക്കുന്ന കടുത്ത പരീക്ഷണങ്ങളിലൂടെയാണ് വിലയിരുത്തിയത്. തികച്ചും സുതാര്യവും ഡാറ്റാ അധിഷ്ഠിതവുമായ ഈ രീതി കേരളത്തിലെ ബാസ്കറ്റ്ബോള് രംഗത്ത് പുതിയൊരു മാറ്റത്തിന് തുടക്കം കുറിച്ചിരിക്കുകയാണ്.
വണ് മിനിറ്റ് ടു ഹൂപ്പ് ചലഞ്ചില് നിന്ന് തിരഞ്ഞെടുക്കപ്പെട്ട മികച്ച താരങ്ങള്ക്കായി മെയ് ആദ്യവാരം ഔദ്യോഗിക സെലക്ഷന് ട്രയല്സുകള് നടക്കും. മൂന്ന് റീജിയണല് ഹബ്ബുകളിലായാണ് ട്രയല്സ് ക്രമീകരിച്ചിരിക്കുന്നത്. തിരുവനന്തപുരം (തെക്കന് മേഖല), കോട്ടയം (മധ്യ മേഖല), തൃശ്ശൂര് (വടക്കന്-മധ്യ മേഖല) എന്നിവയാണ് മൂന്ന് റീജിയണല് ഹബ്ബുകള്.
ഈ ട്രയല്സുകളില് മികച്ച പ്രകടനം കാഴ്ചവെക്കുന്നവര് ബിഎല്കെ ഔദ്യോഗിക പ്ലെയര് ലേലത്തിലേക്ക് തിരഞ്ഞെടുക്കപ്പെടും. സംസ്ഥാനത്തെ ആറ് പ്രധാന ഫ്രാഞ്ചൈസി ടീമുകളാണ് ഈ പ്രതിഭകള്ക്കായി ലേലം വിളിക്കുക. അണ്ടര്-19, അണ്ടര്-14 വിഭാഗങ്ങള്ക്കായുള്ള ബിഎല്കെ ആദ്യ സീസണ് 2026 ജൂണില് ആരംഭിക്കും. ഇതിനെത്തുടര്ന്ന് അന്താരാഷ്ട്ര താരങ്ങള് പങ്കെടുക്കുന്ന പ്രീമിയര് സീനിയര് ലീഗ് അടുത്ത വര്ഷം നടക്കുമെന്നും സംഘാടകര് അറിയിച്ചു.
