ന്യൂദല്ഹി: ഇതുവരെ പാകിസ്ഥാന് പ്രാധാന്യം നല്കി ഇന്ത്യയുടെയും മോദിയുടെയും പ്രാധാന്യം കുറയ്ക്കാന് ശ്രമിച്ച ട്രംപ് പക്ഷെ യഥാര്ത്ഥ പ്രതിസന്ധി മുഹൂര്ത്തത്തില് നരേന്ദ്രമോദിയെ ഫോണില് ബന്ധപ്പെട്ടു. ഹോര്മുസ് കടലിടുക്കില് ലോകം ഉറ്റുനോക്കുന്ന അതീവസമ്മര്ദ്ദ സാഹചര്യത്തില് മോദിയെ ഫോണില് ട്രംപ് ഫോണില് വിളിച്ചത് ലോകത്തിന്റെ മുഴുവന് ശ്രദ്ധ പിടിച്ചുപറ്റി. ഇറാന് ഉള്പ്പെടെയുള്ള അറബ് രാജ്യങ്ങള് മോദിയുമായുള്ള ട്രംപിന്റെ സംഭാഷണത്തെ പ്രതീക്ഷയോടെയാണ് ഉറ്റുനോക്കുന്നത്.
അതേ സമയം 40 മിനിറ്റ് നീണ്ട ചര്ച്ചയില് ഇരുവരും തമ്മില് എന്താണ് കൈമാറിയതെന്ന കാര്യത്തില് വെളിപ്പെടുത്തല് ഉണ്ടായിട്ടില്ല. പശ്ചിമേഷ്യയിലെ പ്രതിസന്ധി പരിഹരിക്കാന് നടന്നുവരുന്ന ഉന്നതതല ചര്ച്ച തുടരട്ടെ എന്ന ആശയമാണ് മോദിയും ട്രംപും പങ്കുവെച്ചതെന്ന് മാത്രമാണ് ഇതുവരെ പുറത്തുവിട്ടിട്ടുള്ള വിവരം.
ഇരുവരും തമ്മിലുള്ള ഫോണ് സംഭാഷണത്തില് ഊര്ജ്ജ മേഖലയില് ഉള്പ്പെടെ ഇന്ത്യയും യുഎസും തമ്മില് വന് കരാറുകള് ഒപ്പുവെയ്ക്കുന്നതിനെക്കുറിച്ചായിരുന്നു ചര്ച്ചയെന്നും ഇരുവരും തമ്മില് വന്കരാറുകള് ഒപ്പുവെയ്ക്കുമെന്ന് കരുതുന്നതായി അമേരിക്കന് നയതന്ത്രപ്രതിനിധി സെര്ജി ഗോര് പറഞ്ഞു. “യുഎസ് പ്രസിഡന്റ് ഡൊണാള്ഡ് ട്രംപില് നിന്നും എനിക്ക് ഒരു ഫോണ് കാള് ലഭിച്ചു. വിവിധമേഖലകളില് ഇന്ത്യയും അമേരിക്കയും കൈവരിച്ച ഉഭയകക്ഷി പുരോഗതിയെക്കുറിച്ച് വിശദമായി ചര്ച്ച നടത്തി. ആഗോളതന്ത്രപ്രധാന പങ്കാളിത്തം എല്ലാ മേഖലകളിലേക്കും വ്യാപിക്കാന് ധാരണയായി”- ഇത്രയുമാണ് മോദി എക്സില് കുറിച്ചത്.
