തിരുവനന്തപുരം:കോണ്‍ഗ്രസ് വിട്ട എന്‍.എസ്. നുസൂര്‍ സിപിഎമ്മില്‍. സിപിഎം സംസ്ഥാന സെക്രട്ടറി എം.വി. ഗോവിന്ദന്‍ നുസൂറിനെ ഷാള്‍ അണിയിച്ച് സ്വീകരിച്ചു.നിയമസഭാ തെരഞ്ഞെടുപ്പിലെ കോണ്‍ഗ്രസ് സ്ഥാനാര്‍ഥി പട്ടികയിലെ അഭിപ്രായ വ്യത്യാസത്തെ തുടര്‍ന്നായിരുന്നു നുസൂര്‍ രാജി വച്ചത്.
യൂത്ത് കോണ്‍ഗ്രസ് മുന്‍ സംസ്ഥാന വൈസ് പ്രസിഡന്റാണ് എന്‍.എസ്. നുസൂര്‍.വാമനപുരം മണ്ഡലത്തില്‍ എസ്ഡിപിഐയുടെ ആവശ്യപ്രകാരമാണ് കോണ്‍ഗ്രസ് സുധീര്‍ ഷാ പാലോടിനെ സ്ഥാനാര്‍ഥിയാക്കിയതെന്നായിരുന്നു നുസൂര്‍ ആരോപിച്ചത്.സിപിഎമ്മില്‍ ചേര്‍ന്നതിന് പിന്നാലെ നിങ്ങളെന്നെ കമ്മ്യൂണിസ്റ്റാക്കി എന്ന കുറിപ്പോടെയുള്ള ഫേസ്ബുക്ക് പോസ്റ്റും നുസൂര്‍ പങ്കുവച്ചു,
കോണ്‍ഗ്രസിന് അസ്തിത്വം നഷ്ടപ്പെട്ടുവെന്ന് സിപിഎമ്മില്‍ ചേര്‍ന്നതിന് പിന്നാലെ നുസൂര്‍ പറഞ്ഞു. കോണ്‍ഗ്രസിന് മതേതര മൂല്യം നഷ്ടപ്പെട്ടു. മതേതര ആശയങ്ങളെ പ്രണയിച്ചുകൊണ്ട് കോണ്‍ഗ്രസില്‍ നില്‍ക്കാന്‍ കഴിയില്ല. മതേതര ആശയങ്ങള്‍ നിലനില്‍ക്കണമെങ്കില്‍ സിപിഎം വേണം.താന്‍ ചുവന്ന കൊടിക്കീഴില്‍ സുരക്ഷിതനായിരിക്കും. മനസും ശരീരവും സിപിഎമ്മിന് നല്‍കുന്നുവെന്നും നുസൂര്‍ പറഞ്ഞു.
