തിരുവനന്തപുരം: കണ്ണൂര്‍ അഞ്ചരക്കണ്ടി ഡെന്റല്‍ കോളേജ് വിദ്യാര്‍ഥി നിതിന്‍ രാജിന്റെ മരണത്തില്‍ പൊലീസ് പ്രത്യേക അന്വേഷണ സംഘം രൂപീകരിച്ചു.കണ്ണൂര്‍ എ സി പിയുടെ നേതൃത്വത്തില്‍ 13 അംഗ സംഘത്തിനാണ് ചുമതല.
കോളേജില്‍ അധ്യാപകരില്‍ നിന്നുള്‍പ്പെടെ കടുത്ത ജാതി അധിക്ഷേപമടക്കം നിതിന്‍ നേരിട്ടിരുന്നെന്ന വീട്ടുകാരുടെ വെളിപ്പെടുത്തലിന്റെ പശ്ചാത്തലത്തിലാണ് പ്രത്യേക അന്വേഷണ സംഘം രൂപീകരിച്ചത്. കുടുംബത്തിന്റെ ആരോപണം ശരിവെക്കുന്ന ശബ്ദ സന്ദേശമടക്കം പുറത്ത് വന്നു.
അഞ്ചരക്കണ്ടി ഡെന്റല്‍ കോളേജിലെ സ്റ്റാഫ് റൂം പോലും തന്നെ ആക്രമിക്കാനുള്ള ഇടമായി മാറിയെന്നും ഗേറ്റിനു പുറത്തിറങ്ങിയാല്‍ അധ്യാപകര്‍ കയ്യും കാലും വെട്ടും എന്നും നിതിന്‍ പറയുന്നതടക്കം ശബ്ദ സന്ദേശമാണ് പുറത്തുവന്നത്. സംഭവത്തില്‍ രണ്ട് അധ്യാപകരെ സസ്പന്‍ഡ് ചെയ്തിട്ടുണ്ട്.
