സാലഡില്‍ ചേര്‍ത്തും ജൂസടിച്ചുമൊക്കെ കുക്കുമ്പർ അഥവാ കക്കിരിക്ക കഴിക്കുമ്പോള്‍ കിട്ടുന്ന ആ ഒരു ഉന്മേഷം ഒന്നുവേറെ തന്നെയാണ്. പക്ഷേ, ചിലപ്പോഴൊക്കെ ഇത് നോക്കി വാങ്ങിക്കുമ്പോള്‍ നല്ല പണി കിട്ടാറുമുണ്ട്. കുക്കുമ്പർ കടയിൽ നിന്ന് വാങ്ങി വീട്ടില്‍ കൊണ്ടുവന്ന് മുറിച്ചു നോക്കുമ്പോഴാകും അതിനു ഭയങ്കര കയ്‌പ്പുണ്ടെന്ന് മനസ്സിലാവുന്നത്!
രുചിച്ചു നോക്കാതെ ഈ കയ്‌പ്പ് കണ്ടുപിടിക്കാൻ പറ്റില്ലെന്നാണ് പലരും കരുതുന്നത്. എന്നാൽ സംഗതി അങ്ങനെയല്ല. നമ്മൾ കടയിൽ നിന്ന് വാങ്ങുന്ന സമയത്ത് തന്നെ ചെറിയ ചില കാര്യങ്ങൾ ശ്രദ്ധിച്ചാൽ കയ്‌പ്പുള്ള കുക്കുമ്പർ ഒഴിവാക്കാൻ നിഷ്പ്രയാസം സാധിക്കും
കടയിൽ നിന്ന് വാങ്ങുമ്പോൾ നല്ല കുക്കുമ്പർ എങ്ങനെ തിരിച്ചറിയാമെന്ന് നോക്കാം. ആദ്യം നിറം തന്നെ ശ്രദ്ധിക്കുക. നല്ല കടും പച്ച നിറവും ഉറപ്പുള്ള തൊലിയുമുള്ളവ തിരഞ്ഞെടുക്കാൻ പ്രത്യേകം ശ്രദ്ധിക്കണം. മഞ്ഞ പാടുകളോ മങ്ങിയ നിറമോ ഉണ്ടെങ്കിൽ അത് അധികം പഴുത്തതോ കേടായതോ ആകാം. അതുപോലെ തൊട്ടുനോക്കുമ്പോൾ നല്ല മാർദ്ദവമുള്ളതും ചുക്കിചുളിഞ്ഞതുമായ കക്കിരിക്ക ഒഴിവാക്കുന്നതാണ് നല്ലത്; അവയ്‌ക്ക് കയ്‌പ്പുണ്ടാകാൻ സാധ്യത കൂടുതലാണ്.
തടിച്ചതോ വളഞ്ഞതോ ആയവയിൽ വിത്തുകൾ കൂടുതലുണ്ടാകും. ഇതും കയ്‌പ്പ് കൂട്ടും. അതുകൊണ്ട് അധികം വണ്ണമില്ലാത്ത, നേരെയുള്ള കക്കിരിക്ക നോക്കി എടുക്കുന്നതാണ് എപ്പോഴും നല്ലത്.
അടുത്തതായി ഇതിന്റെ മണം ഒന്ന് ശ്രദ്ധിച്ചു നോക്കൂ. നല്ല ഫ്രഷ് കക്കിരിക്കയ്‌ക്ക് നേരിയതും ശുദ്ധവുമായ ഒരു ഗന്ധമായിരിക്കും. എന്തെങ്കിലും പുളിപ്പോ രൂക്ഷഗന്ധമോ തോന്നിയാൽ അത് എടുക്കാതിരിക്കുന്നതാണ് ബുദ്ധി. വിരലുകൾ കൊണ്ട് പതുക്കെ അമർത്തി നോക്കുമ്പോൾ നല്ല ഉറപ്പ് തോന്നണം, എന്നാൽ കല്ലുപോലെ കട്ടിയാകാനും പാടില്ല. വല്ലാതെ മൃദുവാണെങ്കിൽ അത് കേടായതാകാം, എന്നാൽ വല്ലാതെ കട്ടിയുള്ളതാണെങ്കിൽ പഴകിയതും കയ്‌പ്പുള്ളതുമാകാനും സാധ്യതയുണ്ട്
പുറംതൊലി കളഞ്ഞും അറ്റങ്ങൾ കുറച്ചധികം മുറിച്ചു മാറ്റിയും ഈ കയ്‌പ്പ് കളയാവുന്നതേയുള്ളൂ. മുറിച്ച ഭാഗത്ത് അൽപ്പം ഉപ്പ് വിതറി ഉരസുന്നതും കയ്‌പ്പ് മാറ്റാൻ സഹായിക്കും
