വയനാട് : വടക്കനാട് വള്ളുവാടി പ്രദേശത്ത് ഭീതി പടര്ത്തിയ കാട്ടാന മുട്ടിക്കൊമ്പനെ 13 ദിവസത്തെ ദൗത്യത്തിലൂടെ വനംവകുപ്പ് ദൗത്യസംഘം മയക്കുവെടി വച്ചു. ‘താത്തൂര് ടസ്കര് 1’ എന്ന് വനംവകുപ്പ് രേഖകളില് പേരുളള കാട്ടാനയെയാണ് പിടികൂടിയത്.
വെളളിയാഴ്ച പുലര്ച്ചെ ആരംഭിച്ച ദൗത്യത്തിനിടെ താത്തൂര് സെക്ഷനില് ഓനച്ചന് കവലയില് വച്ചാണ് ആനയെ മയക്കുവെടി വച്ചത്. കുങ്കിയാനകളുടെ സഹായത്തോടെ മുട്ടിക്കൊമ്പനെ ലോറിയില് കയറ്റി മുത്തങ്ങ ആനപ്പന്തിയില് എത്തിച്ചു.
ഫോറസ്റ്റ് ചീഫ് വെറ്ററിനറി സര്ജന് ഡോ. അരുണ് സഖറിയ, ബയോളജിസ്റ്റ് വിഷ്ണു തുടങ്ങിയവരുടെ നേതൃത്വത്തില് എണ്പത് അംഗ വനംവകുപ്പ് സംഘമാണ് ദൗത്യം പൂര്ത്തിയാക്കിയത്. മുത്തങ്ങ ആനപ്പന്തിയിലെ വിക്രം, സൂര്യ, പ്രമുഖ, ഉണ്ണികൃഷ്ണന്, കോന്നി സുരേന്ദ്രന് എന്നീ കുങ്കിയാനകളെയും പ്രദേശത്ത് എത്തിച്ചു.
മാര്ച്ച് നാലിന് ബത്തേരി വടക്കനാടില് മുട്ടിക്കൊമ്പന്റെ ആക്രമണത്തില് കര്ഷകന് പച്ചാടി കദങ്ങത്ത് നടുവീട്ടില് രജീവ് (37) കൊല്ലപ്പെട്ടിരുന്നു. നാട്ടുകാര് ശക്തമായി പ്രതിഷേധമുയര്ത്തിയതോടെയാണ് ആനയെ പിടികൂടാന് ചീഫ് വൈല്ഡ് ലൈഫ് വാര്ഡന് ഉത്തരവിട്ടത്.
