കൊച്ചി: യുവനടി നല്കിയ ലൈംഗികാതിക്രമ പരാതിയില് റിമാന്ഡിലായ സംവിധായകന് രഞ്ജിത്തിന് വേണ്ടി കോടതിയില് എത്തിയത് പരാതിക്ക് ഇടവന്ന സിനിമയിലെ ആഭ്യന്തര പരാതി പരിഹാര സമിതി (ഐ സി സി) അംഗമായ അഭിഭാഷകന്.രഞ്ജിത്ത് സംവിധാനം ചെയ്യുന്ന പുതിയ സിനിമയിലെ ഐ സി സി അംഗമായിരുന്ന അഡ്വ. മുഹമ്മദ് സിയാദാണ് കോടതിയിലെത്തിയത്.
രഞ്ജിത്തിന്റെ അറസ്റ്റ് വിവരം അറിഞ്ഞതിന് പിന്നാലെ ഐ സി സി അംഗത്വം രാജിവച്ച ശേഷം വക്കാലത്ത് ഏറ്റെടുക്കുകയായിരുന്നു എന്നാണ് മുഹമ്മദ് സിയാദ് പറയുന്നത്. സിനിമയുടെ ചിത്രീകരണ വേളയില് സെറ്റില് നിന്ന് ഇത്തരത്തിലൊരു പരാതി തന്റെ മുന്നില് എത്തിയിരുന്നില്ലെന്നും അഭിഭാഷകന് പറഞ്ഞു.
നിലവില് രഞ്ജിത്തിന്റെ ജാമ്യാപേക്ഷയുമായി ബന്ധപ്പെട്ട നടപടികള് സ്വീകരിച്ച് വരികയാണെന്ന് മുന്നോട്ട് പോവുകയാണെന്നും മുഹമ്മദ് സിയാദ് വ്യക്തമാക്കി.സിനിമയിലെ ആഭ്യന്തര പരാതി പരിഹാര സമിതിയില് അംഗമായിരുന്ന വ്യക്തി തന്നെ പ്രതിഭാഗത്തിന് വേണ്ടി ഹാജരാകുന്നതിലെ അനൗചിത്യം പലരും ചൂണ്ടിക്കാട്ടുന്നുണ്ട്. ശനിയാഴ്ച രഞ്ജിത്തിനെ നേരിട്ട് കോടതിയില് ഹാജരാക്കുമ്പോള് സിയാദ് പ്രതിഭാഗത്തിന് വേണ്ടി വാദിക്കും.
