ആസാമില്‍ ബിജെപിയുടെ പ്രകടനപത്രിക പുറത്തിറക്കി; ഏകീകൃത സിവില്‍ കോഡ്, രണ്ട് ലക്ഷം തൊഴിലവസരങ്ങള്‍

ഗുവാഹത്തി: ആസാമില്‍ രണ്ട് ലക്ഷം തൊഴിലവസരങ്ങള്‍ സൃഷ്ടിക്കുമെന്നതടക്കം വന്‍ പ്രഖ്യാപനങ്ങളുമായി ബിജെപി പ്രകടനപത്രിക (സങ്കല്‍പ് പത്ര) പുറത്തിറക്കി. കേന്ദ്രമന്ത്രിമാരായ നിര്‍മല സീതാരാമന്‍, സര്‍ബാനന്ദ സോനോവാള്‍, മുഖ്യമന്ത്രി ഹിമന്ത ബിശ്വ ശര്‍മ്മ, ബിജെപി സംസ്ഥാന അധ്യക്ഷന്‍ ദിലീപ് സൈകിയ തുടങ്ങിയവര്‍ ചടങ്ങില്‍ പങ്കെടുത്തു.

ബിജെപി സര്‍ക്കാര്‍ വീണ്ടും അധികാരത്തിലെത്തിയാല്‍ സംസ്ഥാനത്ത് ഏകീകൃത സിവില്‍ കോഡ് നടപ്പിലാക്കുമെന്ന് മുഖ്യമന്ത്രി ഹിമന്ത ബിശ്വ ശര്‍മ്മ അറിയിച്ചു. വെള്ളപ്പൊക്ക രഹിത ആസാമാക്കി സംസ്ഥാനത്തെ മാറ്റും. ഇതിനായി രണ്ട് വര്‍ഷത്തിനുള്ളില്‍ 18,000 കോടി രൂപ ചെലവഴിക്കും. അഞ്ച് വര്‍ഷത്തിനുള്ളില്‍ രണ്ട് ലക്ഷം തൊഴിലവസരങ്ങള്‍ സൃഷ്ടിക്കും. ഒരു ജില്ല, ഒരു മെഡിക്കല്‍ കോളജ്, ഒരു സര്‍വകലാശാല, ഒരു എന്‍ജിനീയറിങ് കോളജ് എന്നിങ്ങനെ സ്ഥാപിക്കും. സുരക്ഷിതമായ ആസാം, വികസിത ആസാം ആക്കുകയാണ് ബിജെപിയുടെ ലക്ഷ്യമെന്ന് ഹിമന്ത ബിശ്വ ശര്‍മ്മ പറഞ്ഞു.
2026ലെ നിയമസഭാ തെരഞ്ഞെടുപ്പ് ആസാം ജനതയ്‌ക്ക് വളരെ പ്രധാനപ്പെട്ടതാണ്. സുരക്ഷിത ആസാം സൃഷ്ടിക്കുക എന്ന ലക്ഷ്യത്തോടെയാണ് ബിജെപി ഈ തെരഞ്ഞെടുപ്പില്‍ മത്സരിക്കുന്നത്. സുരക്ഷിത സംസ്ഥാനത്തെ, വികസിത ആസമിനെ സൃഷ്ടിക്കുക എന്നതാണ് ബിജെപിയുടെ സങ്കല്‍പ് പത്രയിലെ മുഖ്യ വാഗ്ദാനം. സംസ്ഥാനത്തിന്റെ വിവിധ ഭാഗങ്ങളില്‍ നിന്നായി ലഭിച്ച 2.45 ലക്ഷം നിര്‍ദേശങ്ങളില്‍ നിന്നാണ് പ്രകടനപത്രിക തയാറാക്കിയത്, സംസ്ഥാന ബിജെപി അധ്യക്ഷന്‍ ദിലീപ് സൈകിയ അറിയിച്ചു.

മുന്‍ ബിജെപി സര്‍ക്കാരിന് കീഴിലുള്ള സംസ്ഥാനത്തിന്റെ സാമ്പത്തിക വളര്‍ച്ചയെകുറിച്ചും കേന്ദ്ര ധനമന്ത്രി സീതാരാമന്‍ സംസാരിച്ചു. കഴിഞ്ഞ 10 വര്‍ഷത്തിനിടെ ആസാമിന്റെ മൊത്തം ആഭ്യന്തര ഉത്പാദനം (ജിഡിപി) ഏകദേശം മൂന്ന് മടങ്ങ് വര്‍ദ്ധിച്ചു. 2020-21ല്‍ 1.03 ലക്ഷം രൂപയായിരുന്ന പ്രതിശീര്‍ഷ വരുമാനം 2024-25 ല്‍ 1.59 ലക്ഷം രൂപയായാണ് ഉയര്‍ന്നത്. ആറ് പതിറ്റാണ്ടുകളുടെ കോണ്‍ഗ്രസ് ഭരണത്തിന് ഒരിക്കലും നേടാന്‍ കഴിയാത്ത വിധത്തില്‍ കഴിഞ്ഞ 10 വര്‍ഷത്തിനുള്ളില്‍ സംസ്ഥാനത്തിന് മാറ്റമുണ്ടായി, വികസനം വന്നു. സംസ്ഥാനങ്ങളില്‍ ഏറ്റവും വേഗത്തില്‍ വളരുന്ന സമ്പദ്വ്യവസ്ഥകളില്‍ ഒന്നാണ് ഇന്ന് ആസാം. 2020-21ല്‍ 1.03 ലക്ഷം രൂപയായിരുന്ന പ്രതിശീര്‍ഷ വരുമാനം 2024-25ല്‍ 1.59 ലക്ഷം രൂപയായി ഉയര്‍ന്നു, നിര്‍മല സീതാരാമന്‍ കൂട്ടിച്ചേര്‍ത്തു.

ആസാമിനെ രാജ്യത്തെ ഏറ്റവും ശക്തമായ സംസ്ഥാനമാക്കുക എന്നതാണ് ബിജെപിയുടെ ലക്ഷ്യമെന്ന് കേന്ദ്രമന്ത്രി സര്‍ബാനന്ദ സോനോവാള്‍ അറിയിച്ചു. ഈ പ്രകടനപത്രികയ്‌ക്ക് പിന്നില്‍ ബിജെപിയല്ല, ആസാമിലെ ഓരോ ജനതയുമാണ്. സ്വാതന്ത്ര്യത്തിന്റെ 70 വര്‍ഷത്തിനുശേഷം വികസ്വര ആസാമിനെയും സുരക്ഷിത ആസാമിനെയും സൃഷ്ടിക്കുന്നതില്‍ പ്രധാനമന്ത്രി നരേന്ദ്ര മോദി ഞങ്ങളെ വളരെയധികം പിന്തുണച്ചിട്ടുണ്ട്. മോദിയുടെ നേതൃത്വത്തുള്ള കേന്ദ്ര സര്‍ക്കാര്‍ ആസാമിന് നല്‍കുന്ന പിന്തുണയെ കേന്ദ്രമന്ത്രി സര്‍ബാനന്ദ സോനോവാള്‍ പ്രശംസിച്ചു.