ചണ്ഡീഗഢ്: ഇക്കഴിഞ്ഞ ഹരിയാന നിയമസഭാ തെരഞ്ഞെടുപ്പില്‍ മത്സരിക്കാന്‍ സീറ്റിന് ഏഴ് കോടി രൂപ കോണ്‍ഗ്രസ് നേതാക്കളായ കെ.സി. വേണുഗോപാലും കൊടിക്കുന്നില്‍ സുരേഷും ആവശ്യപ്പെട്ടെന്നും ഇതില്‍ കോടികള്‍ വാങ്ങിയെങ്കിലും സീറ്റ് നല്‍കിയില്ലെന്നുമുള്ള ഹരിയാനയിലെ മഹിളാ കോണ്‍ഗ്രസ് ജനറല്‍ സെക്രട്ടറി സുചിത്രദേവിയുടെ ഭര്‍ത്താവ് ഗൗരവ് കുമാര്‍ നല്‍കിയ പരാതിയില്‍ ദല്‍ഹി പൊലീസ് കേസെടുത്തതോടെ കാര്യങ്ങള്‍ ഗൗരവമായിരിക്കുകയാണ്. നേരത്തെ ഹരിയാന പൊലീസ് കേസെടുത്തതിന് പിന്നാലെയാണ് ദല്‍ഹിയിലെ നോര്‍ത്ത് അവന്യൂ പൊലീസ് സ്റ്റേഷനും കേസ് രജിസ്റ്റര്‍ ചെയ്തിരിക്കുകയാണ്. ക്രിമിനല്‍ ഗൂഢാലോചന, വിശ്വാസവഞ്ചന എന്നീ വകുപ്പുകള്‍ പ്രകാരമാണ് ദല്‍ഹി പൊലീസ് കേസെടുത്തിരിക്കുന്നത്.
ഇതിനിടെ കഴിഞ്ഞ ദിവസം തെരഞ്ഞെടുപ്പ് തിരക്കുകള്‍ക്കിടയിലും കെ.സി. വേണുഗോപാല്‍ ദല്‍ഹിയിലേക്ക് തിരിച്ച് ഗൗരവ് കുമാറിനെ തണുപ്പിക്കാനും ഒത്തുതീര്‍പ്പുണ്ടാക്കാനും ശ്രമിക്കുന്നതായി റിപ്പോര്‍ട്ടുകളുണ്ട്.
കൊടിക്കുന്നില്‍ സുരേഷിന്റെ പിഎ എബിന്‍ കെ ജോയിയുടെ അക്കൗണ്ടില്‍ പണമിട്ട രേഖ പുറത്ത്
കൊടിക്കുന്നില്‍ സുരേഷിന്റെ പിഎ എബിന്‍ കെ ജോയിയുടെ അക്കൗണ്ടിലേക്ക് ഗൗരവ് കുമാര്‍ പണമിട്ടതിന്റെ രേഖ പുറത്ത് വന്നിട്ടുണ്ട്. അഡ്വാന്‍സായി നാല് ലക്ഷമാണ് നല്‍കിയത്. ഇതില്‍ ഒരു ലക്ഷം 2024 ജൂലൈ മൂന്നിന് കൊടിക്കുന്നിലിന്റെ എസ് ബിഐ പാര്‍ലമെന്‍റ് ബ്രാഞ്ചിലേക്കും മൂന്ന് ലക്ഷം രൂപ 2024 ആഗസ്ത് 15ന് എബിന്‍ കെ ജോയിയുടെ അക്കൗണ്ടിലേക്കും പോയതിന്റെ രേഖകളാണ് പുറത്ത് വന്നിരിക്കുന്നത്.
ഇത്രയും തുക ഇവര്‍ തങ്ങളില്‍ നിന്നും വാങ്ങിയെന്നും എന്നാല്‍ സീറ്റ് നല്‍കിയില്ലെന്നും ഗൗരവ് കുമാര്‍ ചൂണ്ടിക്കാട്ടുന്നു. “മൂന്ന് പേരുകള്‍ (കെ.സി. വേണുഗോപാല്‍, കൊടിക്കുന്നില്‍ സുരേഷ്, സദഫ് ഖാന്‍) മാത്രമേ ഞാന്‍ പറഞ്ഞിട്ടുള്ളൂ. പക്ഷെ പണം വാങ്ങിയവര്‍ ഇനിയും ഉണ്ട്. ഇക്കാര്യത്തില്‍ ഞാന്‍ രാഹുല്‍ ഗാന്ധിയെ തുറന്ന് വെല്ലുവിളിക്കുകയാണ്. താങ്കളുടെ സ്വന്തം വീട്ടില്‍ എങ്ങിനെയാണ് കാര്യങ്ങള്‍ നടക്കുന്നത് എന്നതിലേക്ക് ഞാന്‍ കണ്ണാടി തിരിച്ചുപിടിക്കും. താങ്കളുടെ തന്നെ സീനിയര്‍ നേതാക്കള്‍ എങ്ങിനെയാണ് പെരുമാറുന്നത് എന്ന് മനസ്സിലാക്കൂ.”- കോണ്‍ഗ്രസ് നേതാവ് ഗൗരവ് കുമാര്‍ വാര്‍ത്താസമ്മേളത്തില്‍ പറഞ്ഞു.
പ്രിയങ്കയുടെ പിഎ ആയി സദഫ് ഖാനും ഈ ആരോപണത്തില്‍ പങ്കാളിയാണ്. ഗൗരവ് കുമാര്‍ തന്നെയാണ് തന്നെ കെ.സി. വേണുഗോപാലിനും കൊടിക്കുന്നില്‍ സുരേഷിനും എതിരെ ഹരിയാന പൊലീസില്‍ കേസ് നല്‍കിയിരിക്കുന്നത്.
