പത്തനംതിട്ട: ഒരു പതിറ്റാണ്ട് തുടര്‍ച്ചയായി ഭരിച്ച മുഖ്യമന്ത്രി പിണറായി വിജയനും ഇടത് പക്ഷവും കേരളം വികസനത്തില്‍ അമേരിക്കയെ പിന്തള്ളി എന്നൊക്കെ തള്ളുമ്പോഴും ആരോഗ്യമന്ത്രി വീണാ ജോര്‍ജിന്റെ മണ്ഡലമായ ആറന്മുളയില്‍ കാണുന്നത് ദയനീയതയുടെ നേര്‍ക്കാഴ്ച. ആറന്മുള വിമാനത്താവള വിരുദ്ധ സമര ഭാഗമായി, സിപിഎം നേതൃത്വത്തില്‍ ഇവിടെ കുടില്‍ കെട്ടി ഭൂസമരത്തിനിറങ്ങിയ 22 കുടുംബങ്ങളാണ് കുടിവെള്ളവും വെളിച്ചവുമടക്കം അടിസ്ഥാന സൗകര്യങ്ങളില്ലാതെ നരകിക്കുന്നത്.
കുമ്മനം രാജശേഖരന്‍ നേതൃത്വം നല്കിയ ജനകീയ സമരത്തിനു മുന്നില്‍ കെജിഎസ് എന്ന ബിനാമി കോര്‍പറേറ്റ് കമ്പനി അടിയറവ് പറഞ്ഞ് വിമാനത്താവള പദ്ധതി ഉപേക്ഷിച്ച് പോയതോടെ ഈ 22 കുടുംബങ്ങളെയും സിപിഎം കറിവേപ്പില പോലെ കൈയൊഴിയുകയായിരുന്നു. സമരം തീര്‍ന്നതോടെ മിച്ചഭൂമിയായി പ്രഖ്യാപിച്ച സ്ഥലമാണ് ഈ കുടുംബങ്ങള്‍ക്ക് പതിച്ചു നല്കാമെന്ന് പറഞ്ഞ് വഞ്ചിച്ചത്.
മഴക്കാലത്ത് ചെളിക്കുളമാകുന്ന ഇവിടെ വേനലായാല്‍ കുടിവെള്ളവും കിട്ടാക്കനിയാകും. ഇത്തവണ വേനല്‍ കടുത്തതോടെ പ്രതിസന്ധി രൂക്ഷമാണ്. വേനല്‍ രൂക്ഷമായതോടെ സമീപത്തെ കിണറുകളെല്ലാം വറ്റി. കുടിക്കാനും ഭക്ഷണം പാകം ചെയ്യാനും ദൂരെ സ്ഥലങ്ങളില്‍ നിന്നുമാണ് ഇവര്‍ വെള്ളം കൊണ്ടുവരുന്നത്. മഴക്കാലത്ത് ഇവിടെ തന്നെ കുഴികള്‍ കുത്തിയാണ് ഇവര്‍ വെള്ളം ശേഖരിച്ചിരുന്നത്. കിട്ടുന്നത് ചെളി കലര്‍ന്ന കലക്ക വെള്ളം ആയതിനാല്‍ അത് തെളിയുന്നതുവരെ കാത്തിരിക്കണം. കുടിവെള്ളം പോലും ലഭിക്കാത്ത സാഹചര്യത്തില്‍ കുളിക്കാനുള്ള വെള്ളം എന്നത് ഇവര്‍ക്ക് ആര്‍ഭാടമായി മാറുന്നു.
ഭൂമിക്ക് പട്ടയം നല്കി ഇവിടെ വീടുവച്ചു നല്കുമെന്ന വാഗ്ദാനത്തിലാണ് പാര്‍ട്ടി അനുഭാവികളായ 22 കുടുംബങ്ങളെ സിപിഎം ഇവിടെ കുടില്‍ കെട്ടി സമരത്തിനിരുത്തിയത്. എന്നാല്‍ വിമാനത്താവള വിരുദ്ധ സമരം അവസാനിച്ചതോടെ കുടിലുകള്‍ പൊളിച്ച് എല്ലാവരും വീടുകളിലേക്ക് തിരിച്ചുപോകണമെന്ന് സിപിഎം നേതാക്കള്‍ ആവശ്യപ്പെടുകയായിരുന്നു. എന്നാല്‍ വേറെ പോക്കിടം ഇല്ലാത്തതിനാല്‍ ആറന്മുള സമര ഭൂമിയില്‍ തന്നെ തുടരുകയായിരുന്നു ഇവര്‍.
സമരാനന്തരം ഇടത് പക്ഷം രണ്ട് തവണ ഭരിച്ചിട്ടും വീടുപോയിട്ട് സ്ഥലത്തിന് പട്ടയം പോലും കിട്ടാതെ വന്നതോടെയാണ് ഇവര്‍ പാര്‍ട്ടിയുടെ ചതി തിരിച്ചറിഞ്ഞത്. സര്‍ക്കാരില്‍ നിന്ന് സഹായം ലഭിച്ചില്ലെന്ന് മാത്രമല്ല സ്ഥലം എംഎല്‍എ മന്ത്രി വീണാ ജോര്‍ജ് ഇവരെ തിരിഞ്ഞുനോക്കിയതുമില്ല. തടിക്കാലുകളില്‍ തകര ഷീറ്റും പനമ്പും കൊണ്ട് മറച്ച് ഓല മേഞ്ഞ ചെറ്റക്കുടിലുകളിലാണ് രോഗികളും വയോധികരും വിദ്യാര്‍ത്ഥികളും കുഞ്ഞുകുട്ടികളുമടക്കമുള്ളവരുടെ താമസം.
പ്രദേശത്ത് വൈദ്യുതിയോ പ്രാഥമിക സൗകര്യങ്ങളോ ഇല്ല. ജില്ലാ കളക്ടര്‍ അടക്കമുള്ളവര്‍ക്ക് പല വട്ടം പരാതി നല്കിയിട്ടും നടപടി ഉണ്ടായില്ല. എന്നാല്‍ ആറന്മുളയുടെ സമര നായകന്‍ കുമ്മനം രാജേശേഖരന്‍ സ്ഥാനാര്‍ത്ഥിയായെത്തിയതോടെ തികഞ്ഞ ശുഭ പ്രതീക്ഷയിലാണ് തങ്ങളെന്ന് ഇവര്‍ പറയുന്നു. തങ്ങളുടെ പ്രിയ രാജേട്ടന്റെ ജയം കാത്തിരിക്കുകയാണ് ഇവര്‍.
ജന്മഭൂമി ഓണ്‍ലൈന്‍