ന്യൂദല്ഹി : സി സദാനന്ദന് മാസ്റ്റര് എം പി കേന്ദ്ര ഉപരിതല ഗതാഗതവകുപ്പ് മന്ത്രി നിതിന് ഗഡ്കരിയുമായി കൂടിക്കാഴ്ച നടത്തി.കേരളത്തില് പണി പൂര്ത്തിയായി വരുന്ന ആറുവരി ദേശീയപാതാ നിര്മാണവുമായി ബന്ധപ്പെട്ട ചില പ്രശ്നങ്ങളെക്കുറിച്ചാണ് മന്ത്രിയുമായി സംസാരിച്ചതെന്ന് അദ്ദേഹം ഫേസ്ബുക്കില് കുറിച്ചു.
നടാല് അടിപ്പാത നിര്മിക്കണമെന്ന ആവശ്യം അദ്ദേഹത്തെ അറിയിച്ചപ്പോള് അനുഭാവപൂര്വം ആണ് മന്ത്രി പ്രതികരിച്ചത്. തന്റെ സാന്നിധ്യത്തില് ഉയര്ന്ന ഉദ്യോഗസ്ഥരുമായി അദ്ദേഹം സംസാരിക്കുകയും ഒരിക്കല് കൂടി വിഷയം പരിശോധിച്ച് ബന്ധപ്പെട്ടവരുമായി ചര്ച്ച ചെയ്ത് സാധ്യമായത് ചെയ്യാമെന്നും അറിയിച്ചതായി സദാനന്ദന് മാസ്റ്റര് അറിയിച്ചു.
താന് എം പിയായി ചുമതലയേറ്റ ശേഷം നടാല് അടിപ്പാത നിര്മിക്കണമെന്ന ആവശ്യവുമായി സമരം നടത്തുന്ന കര്മസമിതി ഭാരവാഹികളും ബസ് ഓപ്പറേറ്റേഴ്സ് അസോസിയേഷന് ഭാരവാഹികളും നേരിട്ടു വന്ന് വിഷയം ശ്രദ്ധയില് പെടുത്തിയിരുന്നതായി സദാനന്ദന് മാസ്റ്റര് പറഞ്ഞു. ബി ജെ പി ജില്ലാ അധ്യക്ഷന് വിനോദ് മാസ്റ്റര്, സംസ്ഥാന സെക്രട്ടറി കെ.രഞ്ജിത്ത്, ദേശീയ കൗണ്സില് അംഗം സി.രഘുനാഥ്, മണ്ഡലം ഭാരവാഹികള് തുടങ്ങിയവരും നാട്ടുകാരുടെ വികാരം പങ്കു വച്ചിട്ടുണ്ട്.തുടര്ന്ന് പാര്ട്ടി കാര്യകര്ത്താക്കളോടൊപ്പം താന് ഇവിടെ സന്ദര്ശിക്കുകയും ആവശ്യം ന്യായമാണെന്ന് മനസിലാക്കുകയും ചെയ്തു.
തുടര്ന്ന് ഹൈവേ അതോറിറ്റി, കണ്ണൂര് കളക്ടര് എന്നിവരുമായി സംസാരിച്ചെങ്കിലും അവര് നിസഹായത പ്രകടിപ്പിച്ചു.സ്ഥലം എം പി , മുഖ്യമന്ത്രി തുടങ്ങിയ ഭരണ-പ്രതിപക്ഷ മുന്നണികളിലെ പ്രമുഖരും പ്രാദേശിക ഭരണകൂടവും ഈ വിഷയം ഗൗരവത്തോടെ കണ്ടില്ലെന്നു വ്യക്തമായി.
വടക്കന് കേരളത്തില് ഹൈവേ നിര്മാണത്തിന്റെ 70 ശതമാനവും മാസങ്ങള്ക്ക് മുന്നേ പൂര്ത്തിയായി. എന്നാല് നിര്മാണം തുടങ്ങുന്ന ഘട്ടത്തില് കേരളത്തിലെ ഭരണകൂടവും ജനപ്രതിനിധികളും സമയോചിതമായി ഇടപെട്ടില്ലെന്നും സദാനന്ദന് മാസ്റ്റര് കുറ്റപ്പെടുത്തി.
