ചെന്നൈ: രാജ്യത്തെ ക്രിക്കറ്റ് ലഹരിയിലാറാടിക്കാനുള്ള ഒരുക്കങ്ങള്‍ വിവിധ ഐപിഎല്‍ ഫ്രാഞ്ചൈസികള്‍ പൂര്‍ത്തിയാക്കിക്കൊണ്ടിരിക്കുന്നതിനിടെ ആരാധകര്‍ കൂടുതലായി ഉറ്റുനോക്കുന്നതും കാത്തിരിക്കുന്നതും മഞ്ഞകുപ്പായത്തില്‍ സഞ്ജു സാംസണ്‍ അരങ്ങേറുന്നത് കാണാനാണ്.
ഐപിഎല്ലില്‍ കേരളത്തില്‍ വിവിധ ഗ്രൂപ്പുകള്‍ തിരിഞ്ഞാണ് ആരാധകരുള്ളത്. പിന്തുണക്കാരുടെ എണ്ണം കൂടുതലാര്‍ക്കെന്നത് വലിയ തര്‍ക്കമേറിയ കാര്യമാണ്. ചെന്നൈയ സൂപ്പര്‍ കിങ്‌സും മുംബൈ ഇന്ത്യന്‍സുമാണ് ഈ ഫാന്‍ യുദ്ധത്തില്‍ മുന്നിലുള്ളത്. 2008ല്‍ ഐപിഎല്‍ തുടങ്ങിയ കാലം മുതല്‍ ഇതിഹാസ താരം സച്ചിന്‍ ടെണ്ടുല്‍ക്കറിനോടുള്ള ആരാധനയാണ് മുംബൈ ഇന്ത്യന്‍സുമായ കൂടുതല്‍ പേരെ അടുപ്പിച്ചത്. അന്ന് ഐപിഎല്‍ തുടങ്ങുന്നതിന് കുറച്ചു നാള്‍ മുമ്പാണ് പ്രഥമ ട്വന്റി20 ലോകകപ്പില്‍ ഭാരതം എം.എസ്. ധോണിക്ക് കീഴില്‍ കിരീടം നേടിയത്. സ്വാഭാവികമായും ധോണി നയിക്കുന്ന ടീം എന്ന നിലയ്‌ക്ക് ചെന്നൈയ്‌ക്കും നല്ല രീതിയില്‍ ആരാധകരുണ്ടായിരുന്നു. ടി-20 ലോകകപ്പ് 2007ല്‍ ഭാരതത്തിനായി വിവിധ മത്സരങ്ങള്‍ തകര്‍പ്പന്‍ പ്രകടനം കാഴ്‌ച്ചവച്ച് ആരാധകരുടെ ഹൃദയം കവര്‍ന്ന താരം യുവരാജ് സിങ്ങ് ആയിരുന്നു. അതിനാല്‍ തുടക്ക കാലത്ത് പഞ്ചാബ് ടീമിനും വലിയ ആരാധക പിന്തുണ ഉണ്ടായിരുന്നു.
പിന്നീട് സീസണുകള്‍ ഓരോന്നും കഴിയവെ ഈ ആരാധകരില്‍ ഏറ്റക്കുറച്ചിലുകളുണ്ടായി. അപ്പോഴും ചെന്നൈയ്‌ക്കും മുംബൈയ്‌ക്കും വേണ്ടി കൊമ്പുകോര്‍ക്കാനാണ് ആരാധകര്‍ മത്സരിച്ചിരുന്നതും വാശിയോടെ കളികാണാന്‍ കാത്തിരുന്നതുമെല്ലാം. റോയല്‍ ചലഞ്ചേഴ്‌സ് ബാംഗ്ലൂര്‍ എന്ന പേരില്‍ തുടങ്ങി ഇപ്പോള്‍ റോയല്‍ ചലഞ്ചേഴ്‌സ് ബെംഗളൂരു എന്ന് പേര് മാറ്റിയിരിക്കുന്ന ടീമിനോട് ആരാധകരെ അടുപ്പിച്ചത്. വിരാട് കോഹ്‌ലിയുടെ മാസ്മരിക ബാറ്റിങ് ആണ്. പക്ഷെ അപ്രതീക്ഷിതമായാണ് രാജസ്ഥാന്‍ റോയല്‍സിന് ആരാധക പിന്തുണ ഏറിയത്. അതിന് കാരണക്കാരന്‍ സഞ്ജു സാംസണ്‍ ആണ്. 2021ല്‍ അവിചാരിതമായി സഞ്ജു രാജസ്ഥാന്റെ ക്യാപ്റ്റനാകുക കൂടി ചെയ്തതോടെ റോയല്‍സിന്റെ ആരാധകര്‍ പിന്നെയും കൂടി. 2022ല്‍ ടീമിനെ ഫൈനലിലെത്തിക്കാനായപ്പോള്‍ ആരാധകര്‍ വലിയ ആവേശത്തിലായിരുന്നു. പിന്നീട് സീസണുകള്‍ പലത് കഴിഞ്ഞെങ്കിലും സഞ്ജു നയിക്കുന്ന രാജസ്ഥാന്റെ കളിയെ ഏറ്റെടുക്കുന്ന കാഴ്‌ച്ചയാണ് കണ്ടത്.
ഇത്തവണ പക്ഷെ റോയല്‍സിന് അത്രയ്‌ക്ക് ആരാധകരുണ്ടാവില്ലെന്ന് വേണം കരുതാന്‍. എന്തെന്നാല്‍ സഞ്ജു കൂടുമാറിയിരിക്കുന്നു. ചെന്നൈ സൂപ്പര്‍ കിങ്‌സില്‍ തല ധോണിക്കൊപ്പം മഞ്ഞ കുപ്പായത്തിലിറങ്ങാന്‍ കാത്തിരിക്കുകയാണ് സഞ്ജു. ചെന്നൈ ആരാധകര്‍ക്കും അതിനേക്കാളുപരി ധോണി ആരാധകര്‍ക്കും ഇത് ഇരട്ടി മധുരമാണ്. ഇതിനൊപ്പം സഞ്ജുവിന്റെ അക്കൗണ്ടില്‍ ചെന്നൈക്ക് കുറേ ആരാധകരെയും ഇതിനോടകം കിട്ടി കഴിഞ്ഞു. ഇനി ശേഷം ഭാഗം കളിയില്‍ കാണാം.
