പാലക്കാട്: രമേഷ് പിഷാരടി നാടിന് വേണ്ടി എന്തെങ്കിലും ചെയ്തിട്ടുണ്ടോ എന്ന ചോദ്യമുയര്‍ത്തി അഖില്‍ മാരാര്‍. ഇതിന് രസകരമായ കമന്‍റുകള്‍ നിറയുകയാണ് സമൂഹമാധ്യമങ്ങളില്‍. രമേഷ് പിഷാരടി ഉപ്പുസത്യാഗ്രഹത്തില്‍ പങ്കെടുത്തു എന്നാണ് ചില വിരുതന്മാര്‍ പ്രതികരിച്ചിരിക്കുന്നത്.
രമേഷ് പിഷാരടി ഈ ജീവിതകാലത്ത് നാട്ടില്‍ ഇറങ്ങി എന്തെങ്കിലും ചെയ്തിട്ടുണ്ടോ എന്നും അഖില്‍ മാരാര്‍ ചോദിക്കുന്നു. സിനിമയില്‍ അഭിനയിക്കുന്നു. കാശുണ്ടാക്കുന്നു. ആഡംബരമായി ജീവിക്കുന്നു എന്ന് മാത്രമേ രമേഷ് പിഷാരടിയെക്കുറിച്ച് പറയാന്‍ കഴിയൂ എന്നും അഖില്‍ മാരാര്‍.
പാലക്കാട് ജയിച്ചാല്‍ മമ്മൂട്ടിയെ പാലക്കാട് കൊണ്ടുവരുമെന്നതാണ് രമേഷ് പിഷാരടി ജനങ്ങള്‍ക്ക് നല്‍കിയിരിക്കുന്ന വാഗ്ദാനം. ഇതിനെതിരെ വലിയ വിമര്‍ശനം ഉയരുകയാണ്. അതുപോലെ രാഹുല്‍ മാങ്കൂട്ടത്തില്‍ ചെയ്ത നല്ലകാര്യങ്ങള്‍ തുടരുമെന്ന് രമേഷ് പിഷാരടി പറഞ്ഞതും വലിയ വിമര്‍ശനങ്ങള്‍ക്ക് കാരണമായിരിക്കുകയാണ്. ഇതോടെ രമേഷ് പിഷാരടിയ്‌ക്ക് തുടക്കം പിഴച്ചുവെന്ന രീതിയിലും വ്യാപകപ്രചാരണം നടക്കുന്നു.
