പത്തനംതിട്ട: ശബരിമല സ്വര്ണക്കൊള്ള കേസില് പ്രതിയായ തിരുവിതാംകൂര് ദേവസ്വം ബോര്ഡിന്റെ മുന് പ്രസിഡന്റും മുന് എംഎല്എയുമായ എ പത്മകുമാറിനെ സിപിഎം പത്തനംതിട്ട ജില്ലാ കമ്മിറ്റി ഔദ്യോഗിക വാട്ട്സ്ആപ്പ് ഗ്രൂപ്പില് നിന്നും നീക്കി.കഴിഞ്ഞ വെള്ളിയാഴ്ചയാണ് വാട്ട്സ്ആപ്പ് ഗ്രൂപ്പില് നിന്നും പത്മകുമാറിനെ നീക്കിയത്.എന്നാല് പത്മകുമാറിനെ ഇതുവരെ സിപിഎം ജില്ലാ കമ്മിറ്റിയില് നിന്ന് ഒഴിവാക്കിയിട്ടില്ല.
സ്വര്ണക്കൊള്ളയില് സിപിഎമ്മിനെതിരെ പ്രതിപക്ഷം ആവര്ത്തിച്ച് ആരോപണങ്ങള് ഉന്നയിച്ചിട്ടും പത്മകുമാറിനെ പൂര്ണമായി തള്ളാന് പാര്ട്ടി തയാറായിട്ടില്ല.ഇതിനിടെയാണ് അദ്ദേഹത്തെ ജില്ലാ കമ്മിറ്റിയുടെ വാട്ട്സ്ആപ്പ് ഗ്രൂപ്പില് നിന്ന് നീക്കിയത്.
ശബരിമല സ്വര്ണക്കൊള്ളയുമായി ബന്ധപ്പെട്ട രണ്ടാം കേസിലും ജാമ്യം ലഭിച്ചതോടെ പത്മകുമാര് ഈ മാസം ആദ്യം ജയില് മോചിതനായിരുന്നു.സ്വര്ണക്കൊള്ളയ്ക്ക് കൂട്ടുനില്ക്കുകയും ഇതിനായി ദേവസ്വം മിനുട്സ് തിരുത്തിയെന്നുമായിരുന്നു പത്മകുമാറിനെതിരായ കണ്ടെത്തലുകള്.
