തിരുവനന്തപുരം: സംഘര്ഷത്തിന്റെ നിഴലില് മണിപ്പൂരിനെ ചിത്രീകരിക്കുന്ന മാധ്യമ പ്രചാരണങ്ങളെ തള്ളി, വിവിധ സമൂഹങ്ങളിലെ യുവതി യുവാക്കള് അടങ്ങിയ പ്രതിനിധിസംഘം ലോക്ഭവനില് ഗവര്ണറെ സന്ദര്ശിച്ചു. ആസാം റൈഫിള്സിന്റെ നേതൃത്വത്തില് മണിപ്പൂരില്നിന്നെത്തിയ 21 അംഗ സംഘമാണ് ഗവര്ണര് രാജേന്ദ്ര വിശ്വനാഥ ആര്ലേക്കറുമായി സൗഹൃദസംഭാഷണം നടത്തിയത്.
സംഘത്തില് മെയ്ത്തി, നാഗ, കുക്കി, പംഗല് സമൂഹങ്ങളിലെ യുവാക്കളും യുവതികളും ഉള്പ്പെട്ടിട്ടുണ്ടെന്ന് സംഘത്തെ നയിച്ച മേജര് സഹില് റിഷി ഗവര്ണറോട് പറഞ്ഞു. ഹിന്ദുക്കളും ക്രൈസ്തവരും മുസ്ലിം മതവിഭാഗങ്ങളിലെയും അംഗങ്ങള് സംഘത്തിലുണ്ടെന്നും അദ്ദേഹം വ്യക്തമാക്കി. ”ഇതാണ് യഥാര്ത്ഥ മണിപ്പൂര്” എന്ന് ഗവര്ണര് പ്രതികരിച്ചു. മണിപ്പൂരിനെക്കുറിച്ച് ചില മാധ്യമങ്ങളും രാഷ്ട്രീയ ശക്തികളും സൃഷ്ടിക്കുന്ന വിഭജനപരമായ ചിത്രത്തില് നിന്ന് വ്യത്യസ്തമായ യാഥാര്ത്ഥ്യമാണ് ഈ സംഘത്തിന്റെ കൂട്ടായ്മയിലൂടെ പ്രതിഫലിക്കുന്നതെന്നും അദ്ദേഹം ചൂണ്ടിക്കാട്ടി.
സംഘത്തിലെ അംഗങ്ങള് മാധ്യമം, വിദ്യാഭ്യാസം, സാമൂഹിക പ്രവര്ത്തനം തുടങ്ങിയ വിവിധ മേഖലകളില് സജീവമായി പ്രവര്ത്തിക്കുന്നവരാണ്. സംസ്ഥാനത്തിന്റെ സാമൂഹിക, സാംസ്കാരിക വൈവിധ്യവും വികസന മാതൃകയും അടുത്തറിയുന്നതിനായി കേരള സന്ദര്ശനം സംഘടിപ്പിച്ചതായി സംഘം വ്യക്തമാക്കി. മണിപ്പൂരിലെ യുവജനങ്ങളുടെ സഹവര്ത്തിത്വവും ദേശീയ ഐക്യബോധവും പ്രതിഫലിപ്പിക്കുന്ന ഈ സന്ദര്ശനം ശ്രദ്ധേയമായ അനുഭവമായിരുന്നുവെന്ന് ഗവര്ണര് അഭിപ്രായപ്പെട്ടു.
