തിരുവനന്തപുരം: നേമം നിയമസഭ മണ്ഡലത്തില്‍ പ്രഖ്യാപനങ്ങളല്ലാതെ വികസന പ്രവര്‍ത്തനങ്ങള്‍ യാതൊന്നും നടക്കുന്നില്ലെന്ന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. എംഎല്‍എയുടെ കടമ നിറവേറ്റുന്നതില്‍ മന്ത്രി കൂടിയായ വി. ശിവന്‍കുട്ടി പരാജയമാണെന്നും നേമം എംഎല്‍എ ഓഫീസിന് മുന്‍പില്‍ എന്‍ഡിഎ നടത്തിയ ‘ജനരോഷം-പൊതുജന മുന്നേറ്റം’ പരിപാടി ഉദ്ഘാടനം ചെയ്തുകൊണ്ട് അദേഹം പറഞ്ഞു.
നേമം മണ്ഡലത്തിലെ വികസമുരടിപ്പുകള്‍ അദേഹം യോഗത്തില്‍ എണ്ണിയെണ്ണി പറഞ്ഞു. ഗവണ്‍മെന്റ് ആയുര്‍വേദ ആശുപത്രി പൂര്‍ണതോതില്‍ പ്രവര്‍ത്തിപ്പിക്കാന്‍ കഴിഞ്ഞില്ല, കടലാക്രമണത്തില്‍ വീടു നഷ്ടപ്പെട്ടവരെ തിരിഞ്ഞ് നോക്കിയില്ല. 2018ല്‍ പണി തുടങ്ങിയ നേമം രജിസ്ട്രേഷന്‍ കോപ്ലക്സ് ഇതുവരെ പൂര്‍ത്തിയാക്കാന്‍ സാധിച്ചില്ല. പണിപാതിവഴിയില്‍ നില്‍ക്കുമ്പോള്‍ എംഎല്‍എ ഉദ്ഘാടനത്തിന് ശ്രമിക്കുകയാണെന്നും അദേഹം കുറ്റപ്പെടുത്തി. തിരുവല്ലം ക്ഷേത്രത്തിന്റെ അടിസ്ഥാന സൗകര്യങ്ങള്‍ വികസിപ്പിച്ചില്ല. ആറ്റുകാല്‍ ടൗണ്‍ ഷിപ്പ് പ്രോജക്ട് കടലാസില്‍ മാത്രം ഒതുങ്ങി. എണ്ണിയാല്‍ ഒതുങ്ങാത്ത വികസനമുരടിപ്പുകളാണ് കഴിഞ്ഞ അഞ്ചുവര്‍ഷം നേമം മണ്ഡലത്തില്‍ നടന്നതെന്ന് രാജീവ് ചന്ദ്രശേഖര്‍ പറഞ്ഞു.
വി. ശിവന്‍കുട്ടി എംഎല്‍എക്കെതിരെ പാര്‍ട്ടി പ്രവര്‍ത്തകര്‍ ബൂത്ത് അടിസ്ഥാനത്തില്‍ ജനങ്ങളില്‍ നിന്ന് ഒപ്പുവാങ്ങി ശേഖരിച്ച കുറ്റപത്രം ഡപ്യൂട്ടി മേയര്‍ ആശാനാഥും പാപ്പനംകോട് സജിയും ചേര്‍ന്ന് രാജീവ് ചന്ദ്രശേഖറിന് കൈമാറി. ബിജെപി സംസ്ഥാന ജനറല്‍ സെക്രട്ടറി അഡ്വ എസ് സുരേഷ്, സംസ്ഥാന ഉപാധ്യക്ഷന്‍ കെ സോമന്‍, തിരുവനന്തപുരം സിറ്റി ജില്ലാ അധ്യക്ഷന്‍ കരമന ജയന്‍, മണ്ഡലത്തില്‍ നിന്നുള്ള ബിജെപി കൗണ്‍സിലര്‍മാരും പാര്‍ട്ടി സംസ്ഥാന, ജില്ലാ നേതാക്കളും പൊതുജന മുന്നേറ്റ സംഗമത്തില്‍ പങ്കെടുത്തു.
