തിരുവനന്തപുരം: ജനങ്ങളുടെ പരാതികളും പരിഭവങ്ങളും കേട്ടറിഞ്ഞും പരിഹാരങ്ങള് നിര്ദേശിച്ചും ബിജെപി സംസ്ഥാന അധ്യക്ഷന്റെ ‘മീറ്റ് ദ ലീഡര്’ പരിപാടി. ബിജെപി സംസ്ഥാന കാര്യാലയമായ മാരാര്ജി ഭവനില് നടന്ന പരിപാടിയില് ഇന്നലെ നൂറിലധികം പരാതികളാണ് രാജീവ് ചന്ദ്രശേഖര് സ്വീകരിച്ചത്.
കേരള ബാങ്കിന്റെ ജപ്തി നടപടികളടക്കം നേരിട്ടവര് പരാതികള് പറയാനെത്തി.കേരളത്തിന്റെ വിവിധ ഭാഗങ്ങളില് നിന്നെത്തിയവരുടെ പരാതികള് അധ്യക്ഷന് നേരിട്ട് സ്വീകരിച്ചു. പരാതികളില് വിവിധ മന്ത്രാലയങ്ങളുടെ ഇടപെടലുകള് അദ്ദേഹം ഉറപ്പു നല്കി.പരാതികളിലുള്ള നടപടികള് ജില്ലാ അധ്യക്ഷന്മാര് അറിയിക്കുമെന്നും അദ്ദേഹം പറഞ്ഞു.
കേരള സര്ക്കാരിനെതിരെയാണ് കൂടുതല് പേര് പരാതികള് പറയാനെത്തിയത്. ഇതിലും കേരള ബിജെപിയുടെ ഇടപെടല് ഉണ്ടാകുമെന്നും അദേഹം ഉറപ്പുനല്കി. കഴിഞ്ഞ എട്ടുമാസത്തിനിടെ ഒരു ലക്ഷത്തിലധികം പരാതികളാണ് ബിജെപിയുടെ ഹെല്പ്പ് ഡസ്കുകള് വഴി ബിജെപിക്ക് ലഭിച്ചത്. ഭൂരിപക്ഷം പരാതികളിലും ഇതിനകം തീര്പ്പുണ്ടാക്കാനും സാധിച്ചിട്ടുണ്ട്.
മുഖ്യമന്ത്രി പിണറായി വിജയന്റെ മണ്ഡലമായ ധര്മ്മടത്ത് നാളെ (വെള്ളി) രാജീവ് ചന്ദ്രശേഖറിന്റെ നേതൃത്വത്തില് മെഗാ അദാലത്തും ജനസംഗമവും നടക്കും. മമ്പറം എഡ്യൂക്കേഷണല് ട്രസ്റ്റ് ഗ്രൗണ്ടില് നടക്കുന്ന പരിപാടിയില് കേന്ദ്രമന്ത്രി ശോഭാ കരന്ദലജെയും പങ്കെടുക്കും. സംസ്ഥാന സര്ക്കാരിന്റെ ഭരണപരാജയത്തിന്റെയും വികസന മുരടിപ്പിന്റെയും പ്രതീകമായി മാറിയ കേരളത്തില് ജനങ്ങളെ കേള്ക്കാന് ഇനി ബിജെപി ഉണ്ടാകുമെന്ന സന്ദേശമാണ് ഈ പരിപാടിയിലൂടെ മുന്നോട്ട് വെക്കുന്നത്. മെഗാ അദാലത്തില് വിവിധ കേന്ദ്ര പദ്ധതികളുടെ ഹെല്പ് ഡസ്കുമുണ്ടാകും. സി സദാനന്ദന്മാസ്റ്റര് എം പി, ബിജെപി സംസ്ഥാന ജനറല് സെക്രട്ടറി എസ്. സുരേഷ്, ദേശീയ ഉപാധ്യക്ഷന് എ.പി. അബുദുള്ളക്കുട്ടി, ദേശീയസമിതിയംഗം സി.കെ. പത്മനാഭന് തുടങ്ങിയവര് അദാലത്തില് പങ്കെടുക്കും.
