ഇസ്ലമബാദ് : ഇസ്ലാമിക നേറ്റോ എന്ന് ഉറക്കെ കൂക്കിവിളിച്ചത് പാകിസ്ഥാനാണ്. 32 യൂറോപ്യന്‍ രാജ്യങ്ങള്‍ ചേര്‍ന്ന് രൂപീകരിച്ച നേറ്റോ പോലെ സൗദിയും തുര്‍ക്കിയും പാകിസ്ഥാനും ചേര്‍ന്ന് ഇസ്ലാമിക നേറ്റോ ഉണ്ടാക്കിക്കഴിഞ്ഞു എന്നാണ് പാകിസ്ഥാന്‍ വീമ്പിളക്കിയത്. ഇതില്‍ ഏത് രാജ്യത്തെ ആര് തൊട്ടാലും മറ്റുള്ളവര്‍ സ്വന്തം രാജ്യത്തെ ആക്രമിച്ചതുപോലെ തിരിച്ചടിക്കും എന്നാണ് പാകിസ്ഥാന്‍ പ്രധാനമന്ത്രി ഷെഹ്ബാസ് ഷെരീഫും അസിം മുനീറും വാചകമടിച്ചിരുന്നത്.
എന്നാല്‍ ഇറാന്‍ സൗദിയ്‌ക്കെതിരെ ബലിസ്റ്റിക് മിസൈലുകള്‍ ഒന്നല്ല, ഒരുപാടെണ്ണം അയച്ചു. ചില ബാലിസ്റ്റിക് മിസൈല്‍ സൗദിയുടെ എണ്ണശുദ്ധീകരണശാലയായ ആരാംകോയുടെ അരികില്‍ വീണ് തീപ്പിടത്തം വരെയുണ്ടായി. പക്ഷെ ഇത് അയച്ച ഇറാനെതിരെ പാകിസ്ഥാന്‍ ചെരുവിരല്‍ ഇതുവരെയും അനക്കിയിട്ടില്ല.
ഇസ്ലാമിക നേറ്റോ എന്നത് സത്യമല്ലെന്ന് ഇസ്രയേലും യുഎസും ചേര്‍ന്ന് ഇറാനെ ആക്രമിച്ചപ്പോള്‍ വെളിപ്പെട്ടിരിക്കുകയാണ്. ഇന്ത്യയെ ഭയപ്പെടുത്താന്‍ ഷെഹ്ബാസ് ഷെരീഫ് കാണിച്ച ഉമ്മാക്കി മാത്രമായിരുന്നു ഇസ്ലാമിക നേറ്റോ. മാത്രമല്ല, നേറ്റോയില്‍ തുര്‍ക്കി അംഗമായതിനാല്‍ അവര്‍ക്ക് മറ്റൊരു നേറ്റോ ഉണ്ടാക്കാനാകില്ല. തുര്‍ക്കി ഇസ്ലാമിക നേറ്റോയില്‍ ഉണ്ടാവില്ലെന്ന് മാധ്യമവാര്‍ത്തകള്‍ വന്നപ്പോള്‍ സൗദി അറേബ്യയും പാകിസ്ഥാനും ചേര്‍ന്ന് ഇസ്ലാമിക നേറ്റോ ഉണ്ടാക്കിയെന്നും ഷെഹ്ബാസ് ഷെരീഫ് പ്രസ്താവിച്ചിരുന്നു. പാകിസ്ഥാനെ തൊട്ടാല്‍ സൗദി അറേബ്യ ആ രാജ്യത്തെ ആക്രമിക്കുമെന്നും സൗദിയെ തൊട്ടാല്‍ ആ രാജ്യത്തെ അണുബോംബിട്ട് പാകിസ്ഥാന്‍ നശിപ്പിക്കുമെന്നും വരെ ,ഷെഹ്ബാസ് ഷെരീഫ് പറഞ്ഞിരുന്നു. പക്ഷെ ഇപ്പോള്‍ ഇതെല്ലാം നുണയായിരുന്നു എന്ന് തെളിഞ്ഞിരിക്കുകയാണ്. അല്ലെങ്കില്‍ സൗദിയെ അടിച്ച ഇറാനെ പാകിസ്ഥാന്‍ ആക്രമിക്കുമായിരുന്നല്ലോ. ഇതോടെ ഷെഹ്ബാസ് ഷെരീഫിനും പാകിസ്ഥാനും എതിരെ വമ്പന്‍ ട്രോളുകള്‍ ഉയരുകയാണ്.
യുഎസിനും ഇസ്രയേലിനും വ്യോമാതിര്‍ത്തി തുറന്നതിനും പാകിസ്ഥാനെ നോട്ടമിട്ട് ഇറാന്‍
ഇതിന് പുറമെ കഴിഞ്ഞ ദിവസം യുഎസിനും ഇസ്രയേലിനും വേണ്ടി പാകിസ്ഥാന്‍ വ്യോമാതിര്‍ത്തി തുറന്നുകൊടുത്തിരുന്നു. ഇതോടെ പാകിസ്ഥാനെ നോട്ടമിട്ടിരിക്കുകയാണ് ഇറാന്‍. ഇതിന് പാകിസ്ഥാനോട് പ്രതികാരം ചെയ്യുമെന്ന് ഇറാന്‍ പ്രസ്താവിച്ചിരിക്കുകയാണ്. ഇതും ഷെഹ്ബാസ് ഷെരീഫിന് പുതിയ തലവേദനയായിരിക്കുകയാണ്.
