ന്യൂദല്ഹി: ഇറാന് എന്റെ ജന്മാനാടാണ്, രാജ്യത്തോട് എതിര്പ്പില്ലെന്ന് ബോളിവുഡ് ഇറാനിയന് നടി എല്നാസ് നൗറുസി. കഴിഞ്ഞ ദിവസം ഖമേനി കൊല്ലപ്പെട്ടതില് ആഹ്ലാദം പ്രകടിപ്പിച്ചുകൊണ്ട് ഇവര് സമൂഹമാധ്യമങ്ങളില് പ്രതികരിച്ചിരുന്നു. ഇത് ഏറെ വിവാദമായതോടെയാണ് നടി വിശദീകരണവുമായി രംഗത്തെത്തിയത്.
ഇറാന് എന്ന രാജ്യവും അവിടത്തെ ജനങ്ങളെ കൈപ്പിടിയിലൊതുക്കിയിരിക്കുന്ന ഇസ്ലാമിക റിപ്പബ്ലിക്കും തമ്മില് ഏറെ വ്യത്യാസമുണ്ട്. നിലവിലെ സര്ക്കാര് അധികാരത്തില് ഉള്ളിടത്തോളം കാലം ജന്മനാട്ടിലേക്ക് തനിക്കിനി തിരിച്ചുപോകാന് സാധിക്കില്ല. ഇറാനിയന് ജനതയില് ഭൂരിഭാഗവും ബുദ്ധിമാന്മാരും വിദ്യാസമ്പന്നരുമാണ്. അവരുടെ വിശ്വാസങ്ങള് ഇസ്ലാമിക റിപ്പബ്ലിക്കിന്റെ വിശ്വാസങ്ങളില് നിന്ന് വ്യത്യസ്തമാണ്. ഇവരെയെല്ലാം കൈപ്പിടിയില് ഒതുക്കാനാണ് നിലവിലെ ഭരണകൂടം ശ്രമിക്കുന്നത്.
ഒരിക്കല് ഇറാനുമായി ഇസ്രയേല് വളരെ നല്ല ബന്ധത്തിലായിരുന്നു. മുഹമ്മദ് റെസ പഹ്ലവിയുടെ (ഷാ) കാലത്ത് യുഎസുമായും നല്ല ബന്ധം പുലര്ത്തി. ഇസ്രയേലിനെ ഭൂപടത്തില് നിന്ന് തുടച്ചുനീക്കണമെന്ന് നിരന്തരം പറയുന്ന ഇസ്ലാമിക റിപ്പബ്ലിക് മാത്രമാണ് പ്രശ്നം. ഒരു മാസം മുമ്പ് ഈ ഭരണകൂടത്തിനെതിരെ പ്രതിഷേധിച്ച ധാരാളം ഇറാനിയന്കാര് കൊല്ലപ്പെട്ടു, പിന്നില് സര്ക്കാരാണെന്നും എല്നാസ് ചൂണ്ടിക്കാട്ടി. 2022-ല് 22 വയസുള്ള ഒരു ഇറാനിയന് കുര്ദ് യുവതി പോലീസ് കസ്റ്റഡിയില് മരിച്ചതിനെ തുടര്ന്നുണ്ടായ പ്രതിഷേധത്തിലും എല്നാസ് പങ്കെടുത്തിരുന്നു.
