കൊച്ചി: വര്ക്കല ട്രെയിന് ആക്രമണത്തില് ഗുരുതരമായി പരിക്കേറ്റ് ചികിത്സയിലായിരുന്ന തിരുവനന്തപുരം പാലോട് സ്വദേശിനി ശ്രീക്കുട്ടി ജീവിതത്തിലേക്ക് മടങ്ങുന്നു. മാസങ്ങളോളം നീണ്ട തീവ്രപരിചരണത്തിനും ചികിത്സക്കും ശേഷം കൊച്ചി അമൃത ആശുപത്രിയില് നിന്ന് ഇന്നലെ ശ്രീക്കുട്ടി ഡിസ്ചാര്ജ് ആയി. മരണത്തിന്റെ വക്കില് നിന്ന് അസാമാന്യമായ മനക്കരുത്തിലൂടെയാണ് പെണ്കുട്ടി ജീവിതത്തിലേക്ക് ചുവടുവെക്കുന്നത്. തനിയെ ഭക്ഷണം കഴിക്കാനും നടക്കാനും സംസാരിക്കാനുമുള്ള ശേഷി വീണ്ടെടുത്തു. ശ്രീക്കുട്ടിയുടെ ചികിത്സാ കാലയളവിലുടനീളം തണലായി കൂടെയുണ്ടായിരുന്നത് അമ്മ പ്രിയയാണ്. മകളുടെ തിരിച്ചുവരവിനായി പ്രാര്ത്ഥനയോടെ കാത്തിരുന്ന കുടുംബം ഇപ്പോള് അതീവ സന്തോഷത്തിലാണ്.
തിരുവനന്തപുരം മെഡിക്കല് കോളജിലെ ചികിത്സക്ക് ശേഷം ഡിസംബര് 25നാണ് ശ്രീക്കുട്ടിയെ കൊച്ചിയിലെത്തിച്ചത്. തലച്ചോറിന് ഏറ്റ ഗുരുതര ക്ഷതം കാരണം ബോധമില്ലാതെയും, ശ്വസിക്കാനും ബുദ്ധിമുട്ടിയിരുന്ന അവസ്ഥയിലായിരുന്നു അന്ന്. ഇടത് തോളിനും പരിക്കേറ്റിരുന്നു. അമൃത ആശുപത്രിയിലെ ഫിസിക്കല് മെഡിസിന് ആന്റ് റീഹാബിലിറ്റേഷന് വിഭാഗം മേധാവി ഡോ. രവി ശങ്കരന്, ഡോ. ആനന്ദ് രാജ എന്നിവരുടെ നേതൃത്വത്തിലായിരുന്നു തുടര്ചികിത്സ. ശ്വസനത്തിനായി ട്രക്കിയോസ്റ്റമിയും ഭക്ഷണത്തിനായി ട്യൂബും ഘടിപ്പിച്ചു.
ന്യൂറോ റീഹാബിലിറ്റേഷന് പദ്ധതിയുടെ ഭാഗമായി, ഓക്സിജന് തെറാപ്പി, ശ്വസന വ്യായാമങ്ങള്, ഭക്ഷണം സ്വയം വിഴുങ്ങാനുള്ള പരിശീലനം, ഓര്മശക്തിയും ചിന്താശേഷിയും ഉണര്ത്താനുള്ള ചികിത്സകള്, ചലനശേഷി പടിപടിയായി വീണ്ടെടുക്കാനുള്ള പരിശീലനം എന്നിവയുള്പ്പെടെയുള്ള ചിട്ടയായ ചികിത്സാ രീതികളാണ് ശ്രീക്കുട്ടിക്ക് നല്കിയത്. വിവിധ വിഭാഗങ്ങളുടെ ഏകോപിപ്പിച്ചുള്ള പ്രവര്ത്തനമാണ് ശ്രീക്കുട്ടിയെ ജീവിതത്തിലേക്ക് തിരിച്ചുകൊണ്ടുവന്നത്.
ലക്ഷക്കണക്കിന് രൂപ ചിലവ് വരുന്ന വിദഗ്ധ ചികിത്സ സൗജന്യമായി ആണ് മാതാ അമൃതാനന്ദമയി മഠം കുട്ടിക്കായി ലഭ്യമാക്കിയത്. 2025 നവംബര് ആദ്യവാരം കേരള എക്സ്പ്രസില് യാത്ര ചെയ്യവേ ലഹരിക്കടിമയായ സഹയാത്രികന് ട്രെയിനില് നിന്ന് തള്ളിയിട്ടതോടെയാണ് ശ്രീക്കുട്ടിയുടെ ജീവിതം തകിടം മറിഞ്ഞത്.
