തിരുവനന്തപുരം: മോഹന്‍ലാല്‍ അഭിനയിച്ച് പ്രിയദര്‍ശന്‍ സംവിധാനം ചെയ്ത കെഎസ്ആര്‍ടിയുടെ പരസ്യചിത്രം പുറത്തിറക്കി. സ്പീക്കര്‍ എ.എന്‍. ഷംസീറാണ് പരസ്യചിത്രം പുറത്തിറക്കിയത്. മന്ത്രി ഗണേശ്കുമാര്‍ അധ്യക്ഷനായി.
തന്റെ ജീവിതത്തിലേക്ക് ഐശ്വര്യത്തിന്റെ ചിന്നം വിളിച്ചെത്തിയ ആനവണ്ടിയുമായുള്ള മനോഹരമായ ബന്ധത്തെക്കുറിച്ചാണ് മോഹന്‍ലാല്‍ പരസ്യ ചിത്രത്തിലൂടെ പറയുന്നത്. ‘മഞ്ഞില്‍ വിരിഞ്ഞ പൂക്കളി’ലെ ഓഡിഷന് വേണ്ടി തിരുവനന്തപുരത്ത് നിന്ന് ആലപ്പുഴയിലേക്ക് പോയ കെഎസ്ആര്‍ടിസി യാത്രയെക്കുറിച്ച് പറഞ്ഞാണ് പരസ്യം തുടങ്ങുന്നത്.
‘തിരുവനന്തപുരത്ത് നിന്ന് ആലപ്പുഴയിലേക്കുള്ള കെഎസ്ആര്‍ടിസി ബസില്‍ അന്ന് വലത് കാല്‍ വച്ചു കയറുമ്പോള്‍ ഞാന്‍ അറിഞ്ഞിരുന്നില്ല, ആ യാത്ര എന്റെ ജീവിതം മാറ്റിമറിക്കുമെന്ന്. മഞ്ഞില്‍ വിരിഞ്ഞ പൂക്കളെന്ന സിനിമയില്‍ അഭിനയിക്കാനുള്ള അവസരം തേടിയുള്ള യാത്രയായിരുന്നു അത്.’
യാത്രകളുടെ വിരസത മാറ്റാന്‍, കൂടെയുള്ള യാത്രക്കാരുടെ അനക്കങ്ങളും ഭാവങ്ങളും ശ്രദ്ധിക്കുക, അവരുടെ മനസിനുള്ളില്‍ എന്താകും എന്നൊക്കെ വെറുതെ ചിന്തിക്കുക എന്നൊരു സ്വഭാവം അന്നും എനിക്ക് ഉണ്ടായിരുന്നു. ഒരുപക്ഷേ അതായിരിക്കാം ഞാനറിയാതെ പഠിച്ച അഭിനയകലയിലെ ആദ്യപാഠം.
ആലപ്പുഴ ബസ് ഡിപ്പോയില്‍ ഇറങ്ങി നവോദയ സ്റ്റുഡിയോയിലേക്ക് നടക്കുമ്പോള്‍ ആ ആന വണ്ടിയും അതിലെ മനുഷ്യരും എനിക്ക് ആശംസ പറയുന്നതുപോലെ തോന്നി. അഭിനയ പരീക്ഷ കഴിഞ്ഞു മടങ്ങിയതും പ്രിയപ്പെട്ട ആനവണ്ടിയില്‍ തന്നെ. പോയ ഞാനല്ലായിരുന്നു തിരിച്ചുവന്നത്. പിന്നീടുള്ള മോഹന്‍ലാലിന്റെ ജീവിതം എന്നേക്കാള്‍ നിങ്ങള്‍ക്കറിയാം. എന്റെ ജീവിതത്തിലേക്ക് ഐശ്വര്യത്തിന്റെ ചിന്നം വിളിച്ചെത്തിയ ആനവണ്ടി, നിനക്ക് നന്ദി. ഇതുപോലുള്ള ശുഭയാത്രകള്‍ സമ്മാനിക്കാന്‍ മലയാളിക്കൊപ്പം കെഎസ്ആര്‍ടിസി എന്നെന്നുമുണ്ടാകട്ടെ എന്നു ഞാന്‍ ആശംസിക്കുന്നു. ‘മോഹന്‍ലാല്‍ പരസ്യചിത്രത്തിലൂടെ പറയുന്നതിതാണ്. തൊടുപുഴയിലായിരുന്നു പരസ്യം ചിത്രീകരിച്ചത്. കെഎസ്ആര്‍ടിസിയുടെ ഗുഡ്‌വില്‍ അംബാസഡറാണ് മോഹന്‍ലാല്‍.
