വയനാട്: മുണ്ടക്കൈ -ചൂരല്‍മല ദുരന്തബാധിതര്‍ക്ക് നിര്‍മ്മിച്ച് നല്‍കുന്ന ടൗണ്‍ഷിന്റെ ഉദ്ഘാടനം നീട്ടി.താക്കോല്‍ദാനം മാര്‍ച്ച് ഒന്നിലേക്ക് മാറ്റി.നേരത്തെ 25ന് ഉദ്ഘാടനം നടത്താനാണ് നിശ്ചയിച്ചിരുന്നത്.
അടിസ്ഥാന സൗകര്യമൊരുക്കാന്‍ കുറച്ചു കൂടി സമയം ആവശ്യമെന്നാണ് വിശദീകരണം.തെരഞ്ഞെടുപ്പ് വിജ്ഞാപനം മാര്‍ച്ച് 5 ന് ശേഷമെന്നതും തീരുമാനത്തിന് കാരണമാണെന്ന വിവരവും പുറത്തുവരുന്നുണ്ട്. ഉദ്ഘാടനത്തിന്റെ മുന്നൊരുക്കങ്ങള്‍ നടത്തി വരവെയാണ് മാറ്റം.
2024 ജൂലായ് 30ലെ ദുരന്തത്തില്‍ എല്ലാം നഷ്ടപ്പെട്ടവര്‍ക്കായി സര്‍ക്കാര്‍ ഒരുക്കിയ 178 വീടുകളാണ് നാടിന് സമര്‍പ്പിക്കുന്നത്.തന്റെ ഫേസ്ബുക്ക് കുറിപ്പിലൂടെയാണ് മുഖ്യമന്ത്രി പിണറായി വിജയന്‍ ഈ ചടങ്ങിലേക്ക് ഏവരെയും ഹൃദയപൂര്‍വ്വം ക്ഷണിച്ചത്.
ദുരന്തസമയത്ത് രക്ഷാപ്രവര്‍ത്തനത്തില്‍ പങ്കുചേര്‍ന്ന സൈനികര്‍, ആരോഗ്യപ്രവര്‍ത്തകര്‍, സന്നദ്ധപ്രവര്‍ത്തകര്‍, ശുചീകരണ തൊഴിലാളികള്‍ തുടങ്ങി നാനാതുറകളിലുള്ളവരെയും പുനരധിവാസത്തിനായി സഹായിച്ചവരെയുമാണ് മുഖ്യമന്ത്രി പ്രധാനമായും ചടങ്ങിലേക്ക് ക്ഷണിച്ചിട്ടുളളത്.കല്‍പ്പറ്റയിലെ എല്‍സ്റ്റണ്‍ എസ്റ്റേറ്റില്‍ നിര്‍മ്മിച്ച ടൗണ്‍ഷിപ്പില്‍ വച്ചാണ് ഉദ്ഘാടന ചടങ്ങുകള്‍ നടക്കുക.
