ഓസീസ് കനവുകള്ക്ക് മേല് തീമഴയായി പെയ്തിറങ്ങിയ പാത്തും നിസങ്കയുടെ മജസ്റ്റിക് സ്ട്രോക്കുകളാണ് ലോകക്കപ്പ് ക്രിക്കറ്റിലെ ഇപ്പോഴത്തെ ചൂടേറിയ ചര്ച്ചാ വിഷയം. കൊളംബോയില് പാകിസ്ഥാനെ ചാരമാക്കിയ ഇന്ത്യന്കുതിപ്പുയര്ത്തിയ ആരവങ്ങള് ഒതുങ്ങുംമുമ്പേയാണ് പല്ലെക്കൊല്ലയില് ഓസ്ട്രേലിയന് പട നിസങ്കയുടെ ബാറ്റിങ് ചൂടില് വെന്തൊടുങ്ങിയത്. ലങ്കയ്ക്ക് എട്ടു വിക്കറ്റിന്റെ പടുകൂറ്റന് ജയം. 181 റണ്സ് എന്ന വിജയലക്ഷ്യം രണ്ട് ഓവര് ബാക്കിനില്ക്കെ വെറും രണ്ട് വിക്കറ്റ് നഷ്ടപ്പെടുത്തി ലങ്ക അടിച്ചുനേടി. കുശാല് മെന്ഡിസിന്റെ അര്ധ സെഞ്ച്വറിയായിരുന്നു ലങ്കന് വിജയത്തില് മറ്റൊരു പ്രധാന ഇന്നിങ്സ്.
ലോകക്കപ്പ് തുടങ്ങി മുപ്പതാം മത്സരത്തില് നിസങ്കയിലൂടെ ആദ്യ സെഞ്ച്വറി. വെറും 52 പന്തില് പത്ത് ഫോറും അഞ്ച് സിക്സറും അടങ്ങുന്ന മനോഹര ഇന്നിങ്സ്. ലങ്കന് ലയണ്സ് റോര് ബാക്ക് എന്ന് കമന്ററി ബോക്സില് ഉയര്ന്നുകേട്ട ആവേശത്തിലുണ്ട് കളിയുടെ സ്പിരിറ്റ്. സമ്പൂര്ണവും സമഗ്രവും ആധികാരികവുമായിരുന്നു ലങ്കയുടെ വിജയം.
ഓസീസിന്റെ ബാറ്റിങ് നിരയെ അവസാന ഓവറുകളില് തളച്ചിട്ട അത്യുജ്ജ്വല ഫീല്ഡിങ്, കൃത്യതയുള്ള ബൗളിങ്. മാക്സ് വെല്ലിനെ വീഴ്ത്തിയ നിസങ്കയുടെ ക്യാച്ച് മാറുന്ന ലങ്കയുടെ പുതിയ മുഖമാണ് ലോകത്തോട് വിളിച്ചു പറയുന്നത്. സാക്ഷാല് സനത് ജയസൂര്യയുടെ കോച്ചിങ്ങിലാണ് ശ്രീലങ്ക പുതിയ സ്വപ്നങ്ങള് കാണുന്നത്. ലങ്ക ലോകക്രിക്കറ്റില് രാജാവായി വാണ കാലത്തെ അതേ ആവേശത്തോടെ ജയസൂര്യ കൈയടിച്ചും ചിരിച്ചും അതിര്വരയ്ക്കപ്പുറം നിറയുന്നത് പല്ലേക്കലെയില് കാണികളില് ആരവമുയര്ത്തിയത് വെറുതെയല്ല.
പോയ രാത്രിയിലെ പാത്തും നിസങ്കയുടെ ഉദയം ലങ്കയുടെ തെരുവുകളില് ആഘോഷത്തിന് വഴിയൊരുക്കി. അവര് പ്രിയപ്പെട്ടവന്റെ ചിത്രങ്ങളുമായി ഊരുചുറ്റി. ജന്മനാടായ കലുതാരയില് പാത്തും നിസങ്കയുടെ വാഴ്ത്തുമായി ഗ്രാമീണര് തെരുവിലിറങ്ങി. കലുതാര ക്ഷേത്രത്തില് മാലകെട്ടി ജീവിച്ച ഒരമ്മയുടെ മകന്, ഒരുകാലത്ത് ഗ്രൗണ്ട് ബോയിയായി കാലം കഴിച്ച സുനില് സില്വയെന്ന ഗ്രാമീണന്റെ മകന് അവരുടെയെല്ലാം സ്വപ്നങ്ങള്ക്ക് സ്വര്ണത്തിന്റെ ചിറകേകിയിരിക്കുന്നു. 2019ല് അരങ്ങേറ്റം കുറിച്ച നിസങ്ക ഏകദിനത്തില് ആദ്യസെഞ്ച്വറി കുറിക്കുന്നതും ഓസ്ട്രേലിയയ്ക്കെതിരെയാണെന്നത് ചരിത്രം. സിംബാബ്വെയോട് നേരത്തെ തോറ്റ ഓസീസിന്റെ നില ഇന്നലത്തെ തോല്വിയോടെ കൂടുതല് പരുങ്ങലിലാണ്.
ഈഡന് ഗാര്ഡനില് ഇംഗ്ലണ്ടിനെതിരെ ബെന് മനേന്റി പുറത്തെടുത്ത ഇടിവെട്ട് പ്രകടനം ലോകക്കപ്പിലെ ത്രസിപ്പിക്കുന്ന കാഴ്ചയായി. ഇരുപതോവറില് 203 എന്ന വലിയ ലക്ഷ്യം ഇറ്റലിയെ ഭയപ്പെടുത്തിയില്ല. ഓപ്പണര് ജസ്റ്റിന് മോസ്ക നങ്കൂരമിട്ട ഇന്നിങ്സില് നാലാമനായിറങ്ങിയ മനേന്റി സിക്സറുകളും ഫോറുകളുമായി ഇംഗ്ലണ്ടിനെ ഭയപ്പെടുത്തിയത് ഈഡന് ഗാര്ഡനില് ആവേശം സൃഷ്ടിച്ചു. 25 പന്തില് നാല് ഫോറും ആറ് കൂറ്റന് സിക്സറുകളുമായാണ് മനേന്റി അറുപത് റണ്സെടുത്തത്. വില് ജാക്സിനെ തുടര്ച്ചയായി അതിര്ത്തിവരയ്ക്കപ്പുറത്തേക്ക് അടിച്ചുപായിച്ച് ആവേശമുയര്ത്തി മനേന്റി മടങ്ങും വരെ ഇംഗ്ലീഷ് അട്ടിമറി മുനമ്പിലായിരുന്നു.
