തൃശൂര്‍: കേരളത്തിന്റെ സംസ്‌കാരത്തേയും കലകളേയും ലോകഭൂപടത്തില്‍ അടയാളപ്പെടുത്തിയ ബ്രിട്ടന്റെ മകള്‍ പെപിത സേത്ത് ഇനി ഭാരതത്തിന് സ്വന്തം. കളക്ട്രേറ്റില്‍ നടന്ന പൗരത്വരേഖ കൈമാറ്റ ചടങ്ങില്‍ ജില്ലാ കളക്ടര്‍ അര്‍ജുന്‍ പാണ്ഡ്യനില്‍ നിന്ന് പെപിത സേത്ത് പൗരത്വരേഖകള്‍ ഏറ്റുവാങ്ങി. എണ്‍പതാം വയസില്‍ ഭാരതീയയാവുന്നതില്‍ അഭിമാനമുണ്ടെന്ന് പെപിത സേത്ത് പറഞ്ഞു. പൗരത്വം സ്വീകരിക്കാനുള്ള പെപിതയുടെ ആഗ്രഹത്തിന് ഇതോടെ ഔദ്യോഗിക അംഗീകാരമായി. പൗരത്വ രേഖ കൈമാറ്റത്തെ അപൂര്‍വമായ നിമിഷമെന്നാണ് ജില്ലാ കളക്ടര്‍ വിശേഷിപ്പിച്ചത്.
അസിസ്റ്റന്റ് കളക്ടര്‍ സ്വാതി മോഹന്‍ റാത്തോഡും അപൂര്‍വ നിമിഷത്തിന് സാക്ഷിയായി. കേരള സംസ്‌കാരത്തേയും കലയേയും ലോകത്തിന് മുന്നില്‍ ഉയര്‍ത്തി കാണിച്ച പെപിതയെ 2012ല്‍ രാജ്യം പദ്മശ്രീ നല്‍കി ആദരിച്ചിരുന്നു. ബ്രിട്ടീഷ് പട്ടാളക്കാരനായിരുന്ന അമ്മയുടെ മുത്തച്ഛന്റെ ഡയറിയില്‍ നിന്ന് ഭാരതത്തെ അറിഞ്ഞ പെപിത തന്റെ 27-ാമത്തെ വയസിലാണ് രാജ്യത്തിന്റെ വൈവിധ്യങ്ങളെ തേടിയിറങ്ങുന്നത്. ഫോട്ടോഗ്രഫിയേയും എഴുത്തിനേയും ഏറെ സ്‌നേഹിച്ച പെപിതയ്‌ക്ക് തൃശൂര്‍ പിന്നെ ജന്മനാടിനെ വെല്ലുന്ന പോറ്റമ്മയായി.
മദപ്പാടില്‍ പനമ്പട്ടയും മണ്ണും വീശിയെറിയുന്ന ഗുരുവായൂര്‍ കേശവന്റെ പെപിത പകര്‍ത്തിയ അപൂര്‍വ ചിത്രം ലോകശ്രദ്ധ നേടി. 1981ല്‍ ഗുരുവായൂര്‍ അടക്കമുള്ള ക്ഷേത്രങ്ങളില്‍ പ്രവേശിക്കാന്‍ ഹിന്ദു ആചാരപ്രകാരമുള്ള അനുമതിയും പെപിത നേടിയെടുത്തിരുന്നു. ആറ്റന്‍ബറോയുടെ ഗാന്ധി എന്ന വിശ്വപ്രസിദ്ധമായ സിനിമയില്‍ ജവാഹര്‍ലാല്‍ നെഹ്റുവിന്റെ വേഷമിട്ട റോഷന്‍ സേത്തായിരുന്നു പെപിതയുടെ ജീവിതപങ്കാളി. താന്‍ ഏറെ സ്‌നേഹിച്ച നാട് തന്നെ മകളായി സ്വീകരിച്ചതിന്റെ സന്തോഷത്തിലാണ് പെപിത സേത്ത്.
താന്‍ എഴുതിയ ഇന്‍ ഗോഡ്‌സ് മിറര്‍; ദ തെയ്യംസ് ഓഫ് മലബാര്‍ എന്ന പുസ്തകം ജില്ലാ കളക്ടര്‍ക്ക് സമ്മാനിച്ചാണ് പെപിതാ സേത്ത് കളക്ട്രേറ്റില്‍ നിന്ന് മടങ്ങിയത്.
