തിരുനാവായ: ധര്മത്തിന് എതിരായി നില്ക്കുന്നരാണ് പരിസ്ഥിതിയുടെ കാര്യം പറഞ്ഞ് മഹാമാഘമഹോത്സവത്തെ എതിര്ക്കുന്നതെന്നും പ്രകൃതിയോട് ഏറ്റവും ചേര്ന്ന് നില്ക്കുന്നത് സനാതനധര്മികളെന്നും മഹാമണ്ഡലേശ്വര് സ്വാമി ആനന്ദവനം ഭാരതി. മഹാമാഘ മഹോത്സവത്തിന് നിളയുടെ തീരത്ത് മഹാശുചീകരണ യജ്ഞം നടത്തിയ സേവാഭാരതി പ്രവര്ത്തകരെ അഭിസംബോധന ചെയ്യുകയായിരുന്നു സ്വാമി.
പരിസ്ഥിതിയെ കുറിച്ചും പ്രകൃതിയെ കുറിച്ചും മറ്റാരേക്കാളും ബോധ്യവും കരുതലും സനാതനധര്മം അനുഷ്ഠിക്കുന്നവര്ക്കുണ്ട്. ഒരു മഹോത്സവം നടക്കുമ്പോള് അവിടെ എത്തുന്ന ജനക്കൂട്ടത്തെ നിയന്ത്രിക്കുകയും അവരുടെ ആവശ്യങ്ങള് നിറവേറ്റാന് വേണ്ട സംവിധാനം ഒരുക്കുകയും ചെയ്യുന്നതാണ് ഏറ്റവും അത്യാവശ്യവും പ്രാധാന്യമുള്ളതുമായ കര്ത്തവ്യം. ഈ കാര്യം കൃത്യവും കുറ്റമറ്റതുമായ രീതിയില് പൂര്ത്തീകരിക്കാന് സേവാഭാരതിക്കായി. മഹോത്സവം നടത്തുന്നതിനുള്ള മുന്നൊരുക്കങ്ങള്ക്ക് വേണ്ടത്ര സമയം ലഭിച്ചിരുന്നില്ല. ശബരിമല ക്ഷേത്രത്തിന്റെ സുരക്ഷയുടെ നിയന്ത്രണം സേവാഭാരതിയെ ഏല്പ്പിക്കണമെന്ന തരത്തില് പോലീസില് നിന്നും വിരമിച്ച മുതിര്ന്ന ഉദ്യോഗസ്ഥര് തന്നോട് പറഞ്ഞതായും സ്വാമി വ്യക്തമാക്കി.
സേവാഭാരതിയെ ഏല്പ്പിച്ച ദൗത്യം കൃത്യമായി പൂര്ത്തികരിച്ചെന്ന് മുന് ശബരിമല മേല്ശാന്തി സുധീര് നമ്പൂതിരി പറഞ്ഞു. മാനവസേവയാണ് മാധവസേവയെന്ന ആപ്തവാക്യം മുറുകെപിടിക്കുന്നവരാണ് സേവാഭാരതി പ്രവര്ത്തകരെന്ന് തെളിയിച്ച ഏറ്റവും ഒടുവിലത്തെ ഉദാഹരണമാണിതെന്നും അദ്ദേഹം പറഞ്ഞു.
