തിരുനാവായ: സനാതനധര്മ്മത്തിന്റെ വിരാടരൂപമാണ് തിരുനാവായിലെ മാഘമഹോത്സവത്തില്‍ നാം കാണുന്നതെന്നും ഇതിനെ തടയാന്‍ ശ്രമിച്ച പിണറായി സര്‍ക്കാര്‍ മാപ്പ് പറയുകയാണ് വേണ്ടതെന്നും ബിജെപി നേതാവ് ശോഭാ സുരേന്ദ്രന്‍.
നിളാനദിക്കരയിലെ ഈ മാഘമഹോത്സവത്തില്‍ ഒരു മണല്‍ത്തരിയായി ചേരാന്‍ കഴിഞ്ഞത് മഹാഭാഗ്യമായി കരുതുന്നു. 270 വര്‍ഷങ്ങള്‍ക്ക് ശേഷം ഇങ്ങിനെ ഒരു മാഘമഹോത്സവത്തിന്റെ പേരില്‍ ഒരു കൂടിച്ചേരല്‍ നടക്കുന്നത് അത്ഭുതമായി കാണുന്നു. ചലിക്കുന്നതും ചലിക്കാത്തതും ജീവനുള്ളതും ജീവനില്ലാത്തതുമായ മുഴുവന്‍ വസ്തുക്കളിലും ഈശ്വരസാന്നിധ്യം കാണുന്ന സനാതനധര്മ്മത്തിന്റെ വിരാടരൂപമാണ് ഇവിടെ കാണുന്നത്. – ശോഭാ സുരേന്ദ്രന്‍ പറഞ്ഞു.
സ്പിരിച്വല്‍ ടൂറിസത്തെ പ്രത്സാഹിപ്പിക്കുന്നതിന് പകരം അതിനെ ഇല്ലാതാക്കാനാണ് പിണറായി സര്‍ക്കാര്‍ ചെയ്തത്. കേരളസര്‍ക്കാര്‍ വിചാരിച്ചത് ഇതിന് അനുമതി തടഞ്ഞാല്‍ ആളുകള്‍ക്ക് യാത്രാദുരിതമുണ്ടായാല്‍ ഇവിടെ ആളുകള്‍ ചേരുകയില്ല എന്നാണ് വിചാരിച്ചത്. എന്നാല്‍ ആളുകള്‍ കൃത്യമായി ഒരു തീരുമാനമെടുത്തു. ഞങ്ങള്‍ക്ക് യാത്രാ സൗകര്യമുണ്ടായാലും ഇല്ലെങ്കിലും ഞങ്ങള്‍ അവിടെ ഒന്നിച്ചുചേരും എന്ന ജനത്തിന്റെ ആത്മീയ പ്രതിധ്വനിയാണ് ഇവിടെ കാണാന്‍ കഴിഞ്ഞത്. വാസ്തവത്തില്‍ പിണറായി സര്‍ക്കാര്‍ ഇവിടെ മാപ്പു പറയുകയാണ് വേണ്ടത്. ഇവിടെ ആളുകള്‍ ഒരുമിച്ച് ചേരും എന്ന ഇന്‍റലിജന്‍സ് റിപ്പോര്‍ട്ട് മുന്നില്‍ കണ്ടിട്ട് പിണറായി സര്‍ക്കാര്‍ ഭയപ്പെട്ടു. യഥാര്‍ത്ഥത്തില്‍ ഇവിടെ ലോകം നമ്മെ ഉറ്റുനോക്കിക്കൊണ്ടിരിക്കുകയാണ്. 17 രാജ്യങ്ങളില്‍ നിന്നുള്ളവര്‍ ഇവിടെ എത്തിച്ചേര്‍ന്നിട്ടുണ്ട്. ഇവിടെ സ്നാനം ചെയ്യാന്‍, ഇവിടെ ഈ മഹാമാഘം കാണുവാന്‍ വേണ്ടി. -ശോഭാ സുരേന്ദ്രന്‍ അഭിപ്രായപ്പെട്ടു.
ഒരു കുംഭമേളയ്‌ക്ക് തുല്യമായി നമ്മുടെ നാട് ഉയരുമ്പോള്‍ ഭിന്നതകള്‍ മാറ്റിവെച്ച് അതില്‍ എല്ലാ രാഷ്‌ട്രീയക്കാരും പങ്കെടുക്കേണ്ടതാണ്. പക്ഷെ പ്രതിപക്ഷ നേതാവ് സതീശന്‍ വന്നില്ലല്ലോ? ഇത് എന്താണെന്ന് ഒരു മനസ്സിലാക്കാന്‍ പോലും വന്നില്ല. അവര്‍ ചിന്തിച്ചത് രാഷ്‌ട്രീയത്തെക്കുറിച്ച് മാത്രമാണ്. വോട്ടിനെക്കുറിച്ച് മാത്രമാണ്. അപ്പോ ഭരണപക്ഷത്തിന്റെ നേതാവായ മുഖ്യമന്ത്രിമാത്രമല്ല, പ്രതിപക്ഷ നേതാവും വന്നില്ല. പക്ഷെ ഇതിനെയെല്ലാം അതിജീവിച്ച് നിളാനദീതീരത്ത് മുട്ടോളം വെള്ളത്തില്‍ ആളുകള്‍ കാത്തി നില്‍ക്കുന്നു. -ശോഭാ സുരേന്ദ്രന്‍ ചൂണ്ടിക്കാട്ടി.
ഉത്തര്‍പ്രദേശിലെ പ്രയാഗ് രാജില്‍ നടന്ന കുംഭമേളയില്‍ പങ്കെടുക്കാന്‍ ഭാഗ്യമുണ്ടായി. ആ സമയത്ത് നമ്മള്‍ കണ്ടത് കേന്ദ്രസര്‍ക്കാരും യുപി സര്‍ക്കാരും കൈകോര്‍ക്കുന്നതാണ്. അവര്‍ സംയുക്തമായി നടത്തിയ പ്രയാഗ് രാജിലെ കുംഭമേളയില്‍ 40 കോടി ആളുകളെ പ്രതീക്ഷിച്ചിരുന്നുവെങ്കിലും 62 കോടി പേര്‍ അവിടെ എത്തിച്ചേര്‍ന്നുവെന്ന് ബിജെപി നേതാവ് ശോഭാ സുരേന്ദ്രന്‍. അവിടെ 75000 കോടി രൂപയുടെ അടിസ്ഥാന സൗകര്യവികസനം നടത്തുകയും ലോകം മുഴുവന്‍ അത് കാണുകയും ചെയ്തുവെന്നും ശോഭാ സുരേന്ദ്രന്‍.
