തിരുവനന്തപുരം: മാഘ മഹോത്സവം എന്ന പേരില്‍ മലപ്പുറം ജില്ലയിലെ തിരുനാവായില്‍ നടക്കുന്ന കുംഭമേളയില്‍ പങ്കെടുക്കാനായി ഉത്തരേന്ത്യയിൽ നിന്നും എത്തുന്ന തീർത്ഥാടകർക്കായി പ്രത്യേക ട്രെയിനുകള്‍ അനുവദിച്ചതിന് കേന്ദ്ര സര്‍ക്കാരിനും ഇന്ത്യന്‍ റെയില്‍വേയ്‌ക്കും നന്ദി അറിയിച്ച് കേന്ദ്രമന്ത്രി സുരേഷ് ഗോപി.
വാരണാസിയിൽ നിന്നും ഋഷീകേശിൽ നിന്നും എറണാകുളത്തേക്ക് ആണ് പ്രത്യേക ട്രെയിൻ സർവീസുകൾ അനുവദിച്ചിരിക്കുന്നത്. പുതിയ ട്രെയിൻ സർവീസുകളുടെ സമയവും വിവരങ്ങളും സുരേഷ് ഗോപി സമൂഹമാധ്യമങ്ങളിൽ പങ്കുവെച്ചു.
250 വർഷങ്ങൾക്ക് ശേഷം മലപ്പുറം തിരുനാവായയിൽ നടക്കുന്ന മാഘ മഹോത്സവത്തിന് വൻ ജനപിന്തുണയും സ്വീകരണവും ആണ് ലഭിച്ചുകൊണ്ടിരിക്കുന്നത്. ഈ സന്ദർഭത്തിൽ കേരളത്തിന് പുറത്തുനിന്നുമുള്ള തീർത്ഥാടകർക്ക് മാഘ മഹോത്സവത്തിൽ പങ്കെടുക്കാൻ എത്തുന്നതിനായി പ്രത്യേക ട്രെയിൻ സർവീസുകൾ വേണമെന്ന ആവശ്യം ഉയർന്നിരുന്നു. അതാണ് ഇപ്പോള്‍ റെയില്‍വേ അനുവദിച്ചിരിക്കുന്നത്.
രണ്ടു പ്രത്യേക ട്രെയിൻ സർവീസുകൾ ആണ് ആരംഭിച്ചിരിക്കുന്നത്. മാഘ മഹോത്സവത്തിനായി പുതിയ രണ്ട് ട്രെയിൻ സർവീസുകൾ ആരംഭിച്ചതിന് പ്രധാനമന്ത്രിക്കും കേന്ദ്ര റെയിൽവേ മന്ത്രിക്കും സുരേഷ് ഗോപി നന്ദി അറിയിച്ചു.
