പത്തനംതിട്ട: കോട്ടാങ്ങള്‍ സ്വദേശിനിയെ ബലാത്സംഗം ചെയ്ത ശേഷം കെട്ടിത്തൂക്കി കൊന്ന കേസില്‍ കോട്ടാങ്ങല്‍ പുളിമൂട്ടില്‍ വീട്ടില്‍ നസീര്‍ കുറ്റക്കാരനെന്ന് പത്തനംതിട്ട അഡീഷണല്‍ (1) ജില്ലാ കോടതി കണ്ടെത്തി. കേസില്‍ വിധി പറയുന്നത് 13 ലേക്ക് മാറ്റി.
2019 ഡിസംബര്‍ 15നായിരുന്നു കേസിനാസ്പദമായ സംഭവം. 20മാസത്തിനുശേഷമാണ് പ്രതിയെ പിടികൂടിയത്.
ഭര്‍ത്താവുമായി പിണങ്ങി സ്‌കൂള്‍ കാലത്തെ കാമുകനൊപ്പം ജീവിക്കുന്നതിനിടെയാണ് യുവതി കൊല്ലപ്പെട്ടത്. തടി വാങ്ങുന്നതിനായി എത്തിയ നസീര്‍ വീട്ടില്‍ ആരുമില്ലെന്ന് കണ്ട് അതിക്രമിച്ചുകയറി യുവതിയെ കട്ടിലില്‍ തലയിടിപ്പിച്ച് അബോധാവസ്ഥയിലാക്കി മാനഭംഗപ്പെടുത്തുകയും കെട്ടിത്തൂക്കി കൊലപ്പെടുത്തുകയുമായിരുന്നു.
സംഭവത്തില്‍ യുവതിയുടെ ജീവിതപങ്കാളിയായിരുന്ന ടിജിനെ പ്രതിയെന്ന് സംശയിച്ച് ക്രൂരമായി മര്‍ദ്ദിച്ചത് വലിയവിവാദമായിരുന്നു. തുടര്‍ന്ന് ക്രൈംബ്രാഞ്ച് ഏറ്റെടുത്തു നടത്തിയ അന്വേഷണത്തിലാണ് കേസ് കൊലപാതകമെന്ന് തെളിയുന്നതും നസീര്‍ അറസ്റ്റിലാവുന്നതും. തടിക്കച്ചവടക്കാരനായിരുന്ന നസീര്‍ അവരുടേതായ രീതിയില്‍ കെട്ടിയ കയര്‍ തെളിവായി. യുവതിയുടെ നഖത്തിനടിയില്‍നിന്ന് പ്രതിയുടെ തൊലിയുടെ അംശവും കണ്ടെത്തിയിരുന്നു.
