ന്യൂദല്‍ഹി: യൂറോപ്പിന്റെ മധ്യകാല നവോത്ഥാനത്തിന് ഇന്ത്യയുടെ ഗണിതശാസ്ത്രവും ജ്യോതിശാസ്ത്രവും പ്രധാന പങ്കുവഹിച്ചുവെന്ന് യൂറോപ്യന്‍ കമ്മീഷന്‍ പ്രസിഡന്‍റ് ഉര്‍സുല വോന്‍ ഡെര്‍ ലെയന്‍. ഇന്ത്യയിലെ ഗണിതശാസ്ത്രജ്ഞരും ജ്യോതിശാസ്ത്രജ്ഞരും യൂറോപ്പിന്റെ നവോത്ഥാനത്തെ എത്രമാത്രം സഹായിച്ചുവെന്ന് ഇന്ത്യക്കാരില്‍ തന്നെ പലര്‍ക്കും അറിയില്ലെന്നിരിക്കെയാണ് ഇക്കാര്യം യൂറോപ്യന്‍ കമ്മീഷന്‍ പ്രസിഡന്‍റ് ഉര്‍സുല വോന്‍ ഡെര്‍ ലെയന്‍ ഇന്ത്യക്കാരെ ഓര്‍മ്മിപ്പിച്ചത്.
ട്രിഗ്നോമെട്രി, ആള്‍ജിബ്ര, ദശാംശം തുടങ്ങിയ ഇന്ത്യയിലെ ഗണിതശാസ്ത്രജ്ഞരുടെ കണ്ടെത്തല്‍ യൂറോപ്പില്‍ വലിയ ചലനങ്ങളാണ് സൃഷ്ടിച്ചത്. പൂജ്യത്തെ ഒരു സംഖ്യയായി കണക്കാക്കിക്കൊണ്ടുള്ള സങ്കല്‍പം, നെഗറ്റീവ് സംഖ്യകള്‍, കാല്‍കുലസുമായി ബന്ധപ്പെട്ടുള്ള ഫലങ്ങളും യൂറോപ്പിനെ ആഴത്തില്‍ സ്വാധീനിച്ചിരുന്നു. ഈ ഗണിതസങ്കല്‍പങ്ങളെല്ലാം ഇന്ത്യയില്‍ നിന്നും യൂറോപ്പിലേക്ക് എത്തിയത് യൂറോപ്പിലെ ഗണിത വിശകലന കഴിവും ജ്യോതിശാസ്ത്രവും വികസിക്കുന്നതിന് കാരണമായി.
ഭാരതത്തില്‍ നിന്നും പോയ ഈ ഗണിതശാസ്ത്രസങ്കല്‍പങ്ങളുടെ അടിസ്ഥാനത്തിലാണ് പിന്നീട് യൂറോപ്പ് ജ്യോതിശാസ്ത്രം, നേവിഗേഷന്‍, എഞ്ചിനീയറിംഗ് എന്നിവയില്‍ പിന്നീട് മുന്നോട്ട് കുതിച്ചത്.
