കണ്ണൂര്‍ : പയ്യന്നൂരില്‍ പിരിച്ച രക്തസാക്ഷിഫണ്ടടക്കം നേതാക്കള്‍ തട്ടിയെടുത്തെന്ന് പരസ്യമായി വിളിച്ചുപറഞ്ഞ ജില്ലാ കമ്മിറ്റിയംഗം വി.കുഞ്ഞിക്കൃഷ്ണനെ സിപിഎം പുറത്താക്കി. ജില്ലാ കമ്മിറ്റി യോഗത്തിനുശേഷം ജില്ലാ സെക്രട്ടറി കെ.കെ.രാഗേഷാണ് ഇക്കാര്യം വാര്‍ത്താ സമ്മേളനത്തില്‍ അറിയിച്ചത്. പാര്‍ട്ടി ശത്രുക്കളുടെ കോടാലിക്കൈ ആയി കുഞ്ഞിക്കൃഷ്ണന്‍ മാറിയെന്ന് പറഞ്ഞ കെ.കെ.രാഗേഷ് ,കുഞ്ഞിക്കൃഷ്ണന്‍ ഉന്നയിച്ച ആരോപണങ്ങള്‍ തള്ളി.
കുഞ്ഞിക്കൃഷ്ണന്‍ ഉന്നയിച്ച വിഷയങ്ങള്‍ 2022 ഏപ്രിലില്‍ പാര്‍ട്ടി ചര്‍ച്ച ചെയ്തു തീരുമാനമെടുത്തിരുന്നു.ആരോപണം ഉയര്‍ന്നപ്പോള്‍ പാര്‍ട്ടി പാര്‍ട്ടിയുടേതായ നടപടി സ്വീകരിച്ചു.പയ്യന്നൂര്‍ എംഎല്‍എ ടി.ഐ.മധുസൂദനനെ ജില്ലാ സെക്രട്ടേറിയറ്റില്‍ നിന്ന് ജില്ലാ കമ്മിറ്റിയിലേക്ക് തരംതാഴ്‌ത്തി. കുഞ്ഞിക്കൃഷ്ണനെ പയ്യന്നൂര്‍ ഏരിയ കമ്മിറ്റിയില്‍നിന്ന് ഒഴിവാക്കുകയും ചെയ്തു.
നടപടി ഉണ്ടായതോടെ കുഞ്ഞിക്കൃഷ്ണന്‍ പാര്‍ട്ടി പരിപാടികളില്‍നിന്നു വിട്ടുനിന്നു.പിന്നീട് ജില്ലാ കമ്മിറ്റിയില്‍ ക്ഷണിതാവാക്കി.കഴിഞ്ഞ ജില്ലാ സമ്മേളനത്തില്‍ ജില്ലാ കമ്മിറ്റി അംഗമായി. ആരോപണം ഉന്നയിച്ചശേഷമാണ് ജില്ലാ കമ്മിറ്റിയിലേക്ക് കുഞ്ഞിക്കൃഷ്ണനെ തിരിച്ചെടുത്തത്.
സഹകരണ സ്ഥാപനവുമായി ബന്ധപ്പെട്ട് മധുസൂദനന്‍ എംഎല്‍എയ്‌ക്കെതിരെ വി കുഞ്ഞിക്കൃഷ്ണന്‍ പിന്നീട് ആരോപണം ഉന്നയിച്ചു. എല്ലാ നടപടിക്രമങ്ങളും പാലിച്ചാണ് സഹകരണ സ്ഥാപനം ഭൂമി ഏറ്റെടുക്കാന്‍ തീരുമാനിച്ചത്. ജില്ലാ കമ്മിറ്റിയില്‍ അടിസ്ഥാന രഹിതമായ കാര്യങ്ങള്‍ ഉന്നയിച്ചശേഷം മാധ്യമങ്ങളില്‍ ചര്‍ച്ചയാക്കി പാര്‍ട്ടിയെ പ്രതിരോധത്തിലാക്കിയതിന് അന്നു ശാസന നല്‍കിയിരുന്നു.
രക്തസാക്ഷി ഫണ്ടുമായി ബന്ധപ്പെട്ട വാര്‍ത്ത ചോര്‍ത്തല്‍ സംബന്ധിച്ചും പാര്‍ട്ടി അന്വേഷിച്ചു. പാര്‍ട്ടിക്ക് അക്കാര്യത്തില്‍ വ്യക്തമായ തെളിവു ലഭിച്ചു. പാര്‍ട്ടിക്ക് അകത്തുനിന്ന്, പാര്‍ട്ടിയെ വഞ്ചിച്ചു വാര്‍ത്ത ചോര്‍ത്തിയെന്നു കുഞ്ഞിക്കൃഷ്ണന്‍ തന്നെ പറഞ്ഞു.
