തിരുവനന്തപുരം: നൂറ് ശതമാനം പോളിങ് എന്ന ലക്ഷ്യത്തിലെത്തി കേരളം രാജ്യത്തിന് മാതൃകയാകണമെന്ന് ഗവര്ണര് രാജേന്ദ്രവിശ്വനാഥ് ആര്ലേക്കര്. നൂറ് ശതമാനം സാക്ഷരതയുള്ള കേരളത്തില് പോലും 80 ശതമാനത്തില് താഴെയാണ് പോളിങ് ശതമാനം.
മുഴുവന് വോട്ടര്മാരെയും തെരെഞ്ഞെടുപ്പിന്റെ ഭാഗമാക്കുമ്പോഴാണ് ജനാധിപത്യം പൂര്ണ വിജയത്തിലേക്ക് എത്തുന്നതെന്നും ഗവര്ണര് പറഞ്ഞു. ദേശീയ സമ്മതിദാന ദിനാഘോഷത്തിന്റെ സംസ്ഥാനതല പരിപാടികള് ഉദ്ഘാടനം ചെയ്യുകയായിരുന്നു അദ്ദേഹം.
വോട്ട് ഓരോ പൗരന്റെയും അവകാശം മാത്രമല്ല, കടമ കൂടിയാണ്. ആ കടമ നിര്വഹിക്കപ്പെടുമ്പോഴെ ജനാധിപത്യം പൂര്ണമാകൂ. കേരളത്തില് 20 ശതമാനം പേര് ഇപ്പോഴും വോട്ടെടുപ്പിന്റെ ഭാഗമാകുന്നില്ല. അത് എന്തുകൊണ്ടാണെന്ന് കണ്ടെത്തി അവരെ കൂടി പോളിങ് ബൂത്തിലേക്ക് എത്തിക്കാനാകണമെന്നും ഗവര്ണര് പറഞ്ഞു.
എസ്ഐആറുമായി ബന്ധപ്പെട്ടുള്ള തെരഞ്ഞെടുപ്പ് കമ്മീഷന്റെ പ്രവര്ത്തനങ്ങളെയും ഗവര്ണര് അഭിനന്ദിച്ചു. വെര്ച്വല് റിയിലിറ്റി (വിആര്) പോളിങ് ബൂത്ത് ഉദ്ഘാടനവും വിവിധ പുരസ്കാര വിതരണവും ഗവര്ണര് നിര്വഹിച്ചു. എസ്ഐആര് 2026ന്റെ ഭാഗമായി മികച്ച പ്രവര്ത്തനം കൈവരിച്ച ജില്ലാ തിരഞ്ഞെടുപ്പ് ഓഫീസര്മാര്, ഇആര്ഒമാര്, എഇആര്ഒമാര് എന്നിവര്ക്കുള്ള അവാര്ഡുകളും ഗവര്ണര് വിതരണം ചെയ്തു.
മികച്ച ഇലക്ടറല് ലിറ്ററസി ക്ലബ്ബുകള്ക്കും അവാര്ഡുകള് നല്കി. ഒന്നാം സ്ഥാനം ഒരു ലക്ഷം രൂപ സമ്മാനം നേടിയ ഐഎച്ച്ആര്ഡി അപ്ലൈഡ് സയന്സ് കോളേജ്, അഗളി, രണ്ടാം സ്ഥാനം (50,000 രൂപ) നേടിയ സാമൂതിരി ഗുരുവായൂരപ്പന് കോളേജ്, കോഴിക്കോട്, മൂന്നാം സ്ഥാനത്തിന് അര്ഹരായ (25,000 രൂപ) രാജീവ് ഗാന്ധി മെമ്മോറിയല് ഗവ. ആര്ട്സ് ആന്റ് സയന്സ് കോളേജ്, അട്ടപ്പാടി എന്നിവയുടെ പ്രതിനിധികള് പുരസ്കാരം സ്വീകരിച്ചു മുഖ്യ തെരഞ്ഞെടുപ്പ് ഓഫീസര് ഡോ. രത്തന് യു. ഖേല്ക്കര്, സംസ്ഥാന തെരഞ്ഞെടുപ്പ് കമ്മീഷണര് എ. ഷാജഹാന്, ജില്ലാ കളക്ടര് അനുകുമാരി എന്നിവരും സംസാരിച്ചു.
