കൂറ്റനാട് (പാലക്കാട്): ന്യൂദല്‍ഹിയില്‍ നടന്ന ദേശീയ സ്റ്റാര്‍ട്ടപ്പ് ദിനാഘോഷത്തില്‍ പ്രധാനമന്ത്രി നരേന്ദ്ര മോദിയുമായി നേരിട്ട് സംവദിക്കാന്‍ കഴിഞ്ഞ സന്തോഷത്തിലാണ് ചാലിശ്ശേരി പെരുമണ്ണൂര്‍ പാറപ്പുറത്ത് വീട്ടില്‍ ടി.എം. സുധീഷ്.
രാജ്യത്തെ രണ്ട് ലക്ഷത്തോളം സംരംഭകരില്‍ നിന്ന് ആകെ പത്ത് പേരെയാണ് പ്രധാനമന്ത്രിയുമായി സംവദിക്കാന്‍ തെരഞ്ഞെടുത്തത്. അതിലൊരാളാണ് സുധീഷ്. ഭാരത നാവികസേനയില്‍ നിന്ന് കമാന്‍ഡറായി വിരമിച്ച സുധീഷ്, നിലവില്‍ തിരുവനന്തപുരത്തെ ഒരു സ്റ്റാര്‍ട്ടപ്പ് കമ്പനിയില്‍ ചീഫ് ടെക്നിക്കല്‍ ഓഫീസറായി ജോലിചെയ്യുകയാണ്. സ്റ്റാര്‍ട്ടപ്പ് ഇന്ത്യ പദ്ധതിയുടെ പത്താം വാര്‍ഷികത്തോടനുബന്ധിച്ച് ദല്‍ഹിയില്‍ നടന്ന ചടങ്ങിലാണ് അദ്ദേഹം പ്രധാനമന്ത്രിയെ നേരിട്ട് കണ്ടത്.
തന്റെ കമ്പനിയുടെ നൂതന പ്രവര്‍ത്തനങ്ങളെക്കുറിച്ച് സുധീഷ് പ്രധാനമന്ത്രിയോട് വിശദീകരിച്ചു. കമ്പനിയുടെ സേവനങ്ങള്‍ സര്‍ക്കാരിന് ഏതെല്ലാം തരത്തില്‍ പ്രയോജനപ്പെടുത്താമെന്നാണ് പ്രധാനമന്ത്രി ചോദിച്ചത്. ഭാരതത്തിന്റെ സാമ്പത്തിക വളര്‍ച്ചയില്‍ സ്റ്റാര്‍ട്ടപ്പുകള്‍ വഹിക്കുന്ന പങ്ക് അംഗീകരിച്ച് 2022 ജനുവരി 16നാണ് ദേശീയ സ്റ്റാര്‍ട്ടപ്പ് ദിനമായി പ്രധാനമന്ത്രി പ്രഖ്യാപിച്ചത്. സ്റ്റാര്‍ട്ടപ്പ് ഇന്ത്യയുടെ 10 വര്‍ഷങ്ങള്‍ എന്നതാണ് ഈ വര്‍ഷത്തെ പ്രമേയം. കഴിഞ്ഞ ഒരു ദശകത്തിനിപ്പുറം ഭാരതത്തെ തൊഴില്‍ അന്വേഷിക്കുന്നവരുടെ രാജ്യത്ത് നിന്ന് തൊഴില്‍ നല്‍കുന്നവരുടെ രാജ്യമാക്കി മാറ്റിയതിന്റെ ആഘോഷം കൂടിയായിരുന്നു ഇത്.
നാവികസേനയിലെ സേവനത്തിന് ശേഷം സംരംഭകത്വ മേഖലയിലും തിളങ്ങുന്ന സുധീഷിന്റെ നേട്ടം ചാലിശ്ശേരി ഗ്രാമത്തിനും കേരളത്തിനും ഒരുപോലെ അഭിമാനമായിരിക്കുകയാണ്.
ജന്മഭൂമി ഓണ്‍ലൈന്‍