തിരുവനന്തപുരം: നയ പ്രഖ്യാപന പ്രസംഗ കരടില് നിന്ന് ഒഴിവാക്കാന് ലോക് ഭവന് ആവശ്യപ്പെട്ട അസത്യങ്ങള് നിറഞ്ഞ ഭാഗം സര്ക്കാര് ഒഴിവാക്കാതെ വന്നതോടെ ആ ഭാഗം വായിക്കാതെ ഗവര്ണര് രാജേന്ദ്ര വിശ്വനാഥ് ആര്ലേക്കര്.
നിയമസഭ പാസാക്കിയ ബില്ലുകള് വളരെക്കാലമായി അംഗീകാരം കിട്ടാത്തതിനെത്തുടര്ന്ന് സര്ക്കാര് സുപ്രീംകോടതിയെ സമീപിച്ചെന്നും കോടതി അത് ഭരണഘടനാ ബെഞ്ചിന് റഫര് ചെയ്തെന്നും നയ പ്രഖ്യാപന പ്രസംഗത്തിന്റെ കരടില് പറഞ്ഞിരുന്നു. ഇത് തെറ്റായിരുന്നു. സുപ്രീംകോടതി അവ ഭരണഘടനാ ബെഞ്ചിന് വിട്ടിട്ടില്ല. കേന്ദ്ര നിലപാട് സാമ്പത്തിക ഫെഡറലിസം സംബന്ധിച്ച ഭരണഘടനാ തത്ത്വങ്ങള് അട്ടിമറിക്കുന്നവയാണെന്ന പരാമര്ശവും കരടില് നിന്ന് ഒഴിവാക്കണമെന്ന് ലോക്ഭവന് നിര്ദേശിച്ചിരുന്നു. പകരം മുന്കൂര് തുകകള് നിഷേധിക്കുന്നതിന്റെ ഫലമായി കേരളം കടുത്ത സാമ്പത്തിക ബുദ്ധിമുട്ടിലായതായി രേഖപ്പെടുത്താനാണ് നിര്ദേശിച്ചിരുന്നത്.
അസത്യങ്ങള് നയ പ്രഖ്യാപന പ്രസംഗത്തിന്റെ കരടില് നിന്ന് ഒഴിവാക്കണമെന്ന് ലോക്ഭവന് ആവശ്യപ്പെട്ടതോടെ ഗവര്ണര്ക്ക് യുക്തമെന്ന് തോന്നുന്ന ഭേദഗതികളോടെ നയ പ്രഖ്യാപന പ്രസംഗം തയാറാക്കി അയച്ചുനല്കുമെന്ന് അറിയിച്ചിരുന്നു. എന്നാല്, നയ പ്രഖ്യാപന പ്രസംഗത്തിന്റെ തലേ ദിവസം രാത്രി 12 നു ശേഷം ഭേദഗതികളൊന്നും വരുത്താതെ തന്നെ അതേ പ്രസംഗം ലോക്ഭവനിലേക്ക് മടക്കി അയയ്ക്കുകയായിരുന്നു. ഇതേത്തുടര്ന്ന് ഗവര്ണര് നിര്ദേശിച്ചതും, സര്ക്കാര് അംഗീകരിച്ചതായി ആദ്യം അറിയിക്കുകയും ചെയ്ത നയ പ്രഖ്യാപന പ്രസംഗമാണ് ഇന്നലെ രാവിലെ സഭയില് വായിച്ചത്.
ഇതിനിടെ, നയ പ്രഖ്യാപന പ്രസംഗത്തില് മാറ്റം വരുത്താമെന്ന് സര്ക്കാര് ഏറ്റിരുന്ന ഭാഗം അത് ചെയ്യാതെ വീണ്ടും ഗവര്ണര്ക്ക് അയച്ചുനല്കിയതിനു പിന്നില് ചീഫ് സെക്രട്ടറിയുടെ ഓഫീസിന് ഗുരുതര വീഴ്ചയുണ്ടായതായും സൂചന. മുഖ്യമന്ത്രിയുടെ ഓഫീസും ചീഫ് സെക്രട്ടറിയുടെ ഓഫീസും തമ്മിലുള്ള ഏകോപനത്തിലെ വീഴ്ച മറയ്ക്കാനാണ് മുഖ്യമന്ത്രിയും സിപിഎമ്മും വിവാദമുയര്ത്തി രംഗത്തുവന്നത്. ചീഫ് സെക്രട്ടറി ജയതിലക് വിദേശത്തായതിനാല് ഗവര്ണറുടെ ഓഫീസില് നിന്നുള്ള നിര്ദേശം വേണ്ട സമയത്ത് മുഖ്യമന്ത്രിയെ അറിയിക്കുന്നതില് വീഴ്ചയുണ്ടാകുകയായിരുന്നു.
നയ പ്രഖ്യാപന പ്രസംഗത്തിനായി ഗവര്ണര് നിയമസഭയിലെത്തിയപ്പോള് സ്വീകരിക്കാനുള്ളവരുടെ കൂട്ടത്തില് ചീഫ് സെക്രട്ടറിയുമുണ്ടാകേണ്ടതാണ്. ഈ സമയം വിദേശത്ത് ചെലവഴിക്കാന് ചീഫ് സെക്രട്ടറിക്ക് മുഖ്യമന്ത്രി അനുവാദം നല്കുകയായിരുന്നു. സ്വിറ്റ്സര്ലന്ഡ് ദാവോസിലെ വേള്ഡ് ഇക്കണോമിക്സ് ഫോറം വാര്ഷിക ഉച്ചകോടിയില് പങ്കെടുക്കാന് മന്ത്രി പി. രാജീവ് നയിക്കുന്ന ആറംഗ പ്രതിനിധി സംഘത്തിന്റെ ഭാഗമായാണ് വിദേശയാത്ര.
ജനുവരി 17ന് വിദേശത്തേക്കു പോയ ജയതിലക് 23ന് ശേഷമേ തിരികെയെത്തൂ. നയ പ്രഖ്യാപന പ്രസംഗം നടക്കേണ്ടപ്പോള് ചീഫ് സെക്രട്ടറി വിദേശത്തായത് മുഖ്യമന്ത്രിയുടെ ഓഫീസിന്റെ വീഴ്ചയെന്നും വിദഗ്ധര് ചൂണ്ടിക്കാട്ടുന്നു.
