കൊച്ചി: താര സംഘടനയായ അമ്മയിലെ മെമ്മറി കാര്ഡ് വിവാദത്തില് സംഘടനയുടെ ജനറല് സെക്രട്ടറി കുക്കു പരമേശ്വരന് വിവാദം അന്വേഷിച്ച സമിതിയുടെ ക്ലീന് ചിറ്റ്.2018ല് സിനിമയില് മീ ടു വിവാദങ്ങള് ഉയര്ന്നപ്പോള് വനിതാ അംഗങ്ങളില് ചിലരില് നിന്ന് ഇതുമായി ബന്ധപ്പെട്ട വിവരങ്ങള് ശേഖരിച്ചിരുന്നെന്നും ഇത് ഒരു മെമ്മറി കാര്ഡില് റെക്കോര്ഡ് ചെയ്തിരുന്നുവെന്നും താരസംഘടന നിയോഗിച്ച അന്വേഷണസമിതി സ്ഥിരീകരിച്ചു.
ഈ മെമ്മറി കാര്ഡ് കുക്കൂ പരമേശ്വരന് കെപിഎസി ലളിതയ്ക്ക് കൈമാറിയിരുന്നു എന്നാണ് അന്വേഷണ സമിതി കണ്ടെത്തിയത്. 2018ലെ ഈ സംഭവം 2025ലെ തിരഞ്ഞെടുപ്പ് കാലത്താണ് ഉയര്ന്നുവന്നത്. അതിനാല് തന്നെ മെമ്മറി കാര്ഡിലെ വിവരങ്ങള് ചോര്ന്നിട്ടില്ലെന്നാണ് സംഘടനാ നേതൃത്വം കരുതുന്നത്. ഈ വിഷയത്തില് സംഘടനയിലെ ഏതെങ്കിലും അംഗങ്ങള്ക്ക് നിയമനടപടി ആവശ്യമുണ്ടെങ്കില് സ്വന്തം നിലയ്ക്ക് മുന്നോട്ടു പോകുന്നതിന് തടസം ഇല്ലെന്നും ഇന്നത്തെ എക്സിക്യൂട്ടീവ് യോഗത്തിനുശേഷം മാധ്യമങ്ങളെ കണ്ട പ്രസിഡന്റ് ശ്വേതാ മേനോനും ജോയി മാത്യുവും അറിയിച്ചു. ദിലീപ് നിലവില് സംഘടനയില് അംഗമല്ല. അംഗത്വം ആവശ്യമുണ്ടെങ്കില് ആദ്യം അപേക്ഷ നല്കട്ടെയെന്നും മാധ്യമപ്രവര്ത്തകരുടെ ചോദ്യത്തിന് മറുപടി നല്കി.
