തൃശൂര്‍: ഫാം വര്‍ക്കേഴ്സ് സംഘ് സംസ്ഥാന സമിതി ഓണാട്ടുകര മേഖല കാര്‍ഷിക ഗവേഷണ കേന്ദ്രം, കായംകുളം സ്റ്റേഷന്‍ സന്ദര്‍ശിച്ചു. സ്റ്റേഷനിലെ തൊഴിലാളികള്‍ നേരിടുന്ന ഗുരുതരമായ പ്രശ്നങ്ങളും പീഡന സാഹചര്യങ്ങളും സംസ്ഥാന സമിതി നേതാക്കളുടെ ശ്രദ്ധയില്‍പ്പെടുത്തി. സംസ്ഥാന വര്‍ക്കിങ് പ്രസിഡന്റ് സുരേഷ് പി, സംസ്ഥാന ഭാരവാഹികളായ ബീന, രാജേഷ് ആര്‍., രാജേഷ് കെ.പി., സജിത് കുമാര്‍, അഖില്‍ എസ്., ഷിജു എസ്., ലിജു എസ് എന്നിവരാണ് ഗവേഷണ കേന്ദ്രം സന്ദര്‍ശിച്ചത്. സന്ദര്‍ശന വേളയില്‍ ഗവേഷണ കേന്ദ്രത്തിലെ ജീവനക്കാരനും ഇതര സംഘടനയിലെ അംഗവുമായിരുന്ന രാജേഷ് വര്‍ക്കേഴ്സ് സംഘില്‍ അംഗത്വം സ്വീകരിച്ചു.
അടിസ്ഥാന സൗകര്യങ്ങളുടെ അപര്യാപ്തത, തൊഴിലിടങ്ങളിലെ സുരക്ഷാവീഴ്ചകള്‍, ചട്ടങ്ങള്‍ ലംഘിച്ചും ആവശ്യമായ വിശ്രമം അനുവദിക്കാതെയും തൊഴിലാളികളെ നിര്‍ബന്ധിച്ച് ജോലിക്കിരുത്തുന്ന സാഹചര്യങ്ങള്‍ മൂലമുണ്ടാകുന്ന ഗുരുതര ആരോഗ്യപ്രശ്നങ്ങള്‍ തുടങ്ങിയ വിഷയങ്ങളില്‍ തൊഴിലാളികള്‍ വിശദമായ പരാതികള്‍ ഉന്നയിച്ചു.
സ്റ്റേഷനിലെ വിശാലമായ കൃഷിഭൂമിയില്‍, ദൂരപ്രദേശങ്ങളില്‍ ജോലി ചെയ്യുന്ന സ്ത്രീകള്‍ ഉള്‍പ്പെടെയുള്ള തൊഴിലാളികള്‍ക്ക് പ്രാഥമിക ആവശ്യങ്ങള്‍ക്കുള്ള സൗകര്യങ്ങള്‍ പോലും ലഭ്യമല്ലാത്തത് വലിയ ആരോഗ്യപ്രശ്നങ്ങള്‍ക്കും മാനസിക ബുദ്ധിമുട്ടുകള്‍ക്കും കാരണമാകുന്നതായി തൊഴിലാളികള്‍ ചൂണ്ടിക്കാട്ടി.
നെല്ല്, പച്ചക്കറി കൃഷികളില്‍ കീടനാശിനികള്‍ ഉപയോഗിക്കുന്ന അപകടകരമായ ജോലികളില്‍ ഏര്‍പ്പെടുന്ന തൊഴിലാളികള്‍ക്ക് ഗുരുതരമായ ആരോഗ്യപ്രശ്നങ്ങള്‍ നേരിടുന്ന സാഹചര്യം നിലനില്‍ക്കുന്നതായും, ഇതുസംബന്ധിച്ച് പരാതി നല്‍കിയിട്ടും ഭരണകൂടത്തിന്റെ ഭാഗത്ത് നിന്ന് യാതൊരു നടപടിയും സ്വീകരിക്കുന്നില്ലെന്നുമാണ് തൊഴിലാളികളുടെ ആരോപണം.
സര്‍വ്വകലാശാലയിലെ മറ്റ് ഫാമുകളില്‍ നടപ്പിലാക്കുന്ന ജോലി സമയക്രമം ഇവിടെയും കൃത്യമായി പാലിക്കണമെന്ന ആവശ്യവും അവര്‍ ഉന്നയിച്ചു. സ്ത്രീ – പുരുഷ തൊഴിലാളികളുടെ വിശ്രമമുറികളിലെ സൗകര്യങ്ങള്‍ തീര്‍ത്തും അപര്യാപ്തമാണെന്നും, ആവശ്യമായ അടിസ്ഥാന സൗകര്യങ്ങളോടുകൂടിയ പുതിയ വിശ്രമകേന്ദ്രം അടിയന്തരമായി അനുവദിക്കണമെന്നും തൊഴിലാളികള്‍ ആവശ്യപ്പെട്ടു.
തൊഴിലാളികളുടെ പരാതികള്‍ ഗൗരവമായി പരിഗണിച്ച് ബന്ധപ്പെട്ട സര്‍വ്വകലാശാലാ അധികാരികളുമായി ചര്‍ച്ച നടത്തി ഉടന്‍ പരിഹാരം കാണുന്നില്ലെങ്കില്‍ ശക്തമായ സംഘടനാപരമായ നടപടികള്‍ സ്വീകരിക്കേണ്ടി വരുമെന്ന് ഫാം വര്‍ക്കേഴ്സ് സംഘ് സംസ്ഥാന സമിതി നേതൃത്വം മുന്നറിയിപ്പ് നല്‍കി.
