സാൻസിബാർ: പ്രമുഖ ഇന്ത്യൻ ഇലക്ട്രിക് വാഹന നിർമ്മാതാക്കളായ ഏകാ മൊബിലിറ്റിയുടെ 15 ഇലക്ട്രിക് ബസുകൾ കിഴക്കൻ ആഫ്രിക്കൻ രാജ്യമായ ടാൻസാനിയയിലെ സാൻസിബാറിൽ ഫ്ലാഗ് ഓഫ് ചെയ്തു. സാൻസിബാർ പ്രസിഡന്റ് ഡോ. ഹുസൈൻ അലി മ്വിനിയാണ് 12 മീറ്റർ നീളമുള്ള ഈ ബസുകൾ ഉദ്ഘാടനം ചെയ്തത്. ആഗസ്റ്റ്
1 മുതലാണ് പൊതുജനങ്ങൾക്കായി ഇവ സർവീസ് ആരംഭിക്കുന്നത്.
വാഹനങ്ങളിൽ നിന്നുള്ള പുകമലിനീകരണം കുറയ്ക്കുന്നതിന്റെ ഭാഗമായി ഈ വർഷാവസാനത്തോടെ ആകെ 150 ഇ-ബസുകൾ സാൻസിബാറിൽ നിരത്തിലിറക്കാനാണ് പദ്ധതി. ഇതിൽ 35 ബസുകൾക്ക് ഇതിനകം ഓർഡർ ലഭിച്ചു കഴിഞ്ഞു. ഗ്ലോബൽ റാപ്പിഡ് ട്രാൻസ്പോർട്ടുമായി (ജിആർടി) ചേർന്ന് വാഹന ഓപ്പറേഷൻസ്, പരിപാലനം, സോഫ്റ്റ്വെയർ സാങ്കേതികവിദ്യ എന്നിവയിൽ പ്രാദേശിക തൊഴിലാളികൾക്ക് ഏകാ മൊബിലിറ്റി പരിശീലനവും നൽകുന്നുണ്ട്. ടാൻസാനിയയിലെ ഇന്ത്യൻ ഹൈക്കമ്മീഷണർ ബിശ്വജിത് ഡേ ഉൾപ്പെടെയുള്ള പ്രമുഖർ ചടങ്ങിൽ പങ്കെടുത്തു.
