പത്തനംതിട്ട : ശബരിമലയിലെ കൊടിമരം പുതിയത് സ്ഥാപിച്ചപ്പോള് പഴയ കൊടിമരത്തിന് മുകളില് ഉണ്ടായിരുന്ന വാജിവാഹനം തന്ത്രിക്ക് കൈമാറിയത് യുഡിഎഫ് സര്ക്കാര് നിയമിച്ച ബോര്ഡാണെന്ന വിവരം പുറത്തു വന്നു.2017ല് ശബരിമലയിലെ കൊടിമരം മാറിയ സമയത്താണ് തന്ത്രി വാജി വാഹനം വീട്ടിലേക്ക് കൊണ്ടുപോയത്.
കോണ്ഗ്രസ് നേതാവ് അന്തരിച്ച പ്രയാര് ഗോപാലകൃഷ്ണന് ചെയര്മാനായ ബോര്ഡില് മുതിര്ന്ന കോണ്ഗ്രസ് നേതാവ് അജയ് തറയില് ഉള്പ്പെടെ അംഗങ്ങളായിരുന്നു. എന്നാല് തന്ത്രിക്ക് വാജി വാഹനം നല്കിയത് ആചാരമാണെന്നാണ് അജയ് തറയിലിന്റെ വാദം.
അതേസമയം,വാജി വാഹനം ഉള്പ്പെടെ തന്ത്രിക്ക് അവകാശപ്പെട്ടതല്ലെന്ന് വ്യക്തമാക്കുന്ന 2012ലെ ദേവസ്വം ബോര്ഡ് ഉത്തരവിന്റെ പകര്പ്പ് പുറത്തു വന്നിട്ടുണ്ട്.വാജിവാഹനം തന്ത്രിക്ക് കൈമാറിയത് ചട്ടവിരുദ്ധമാണെന്ന് തെളിയിക്കുന്നതാണ് വിവരങ്ങള്
പുതിയവ സ്ഥാപിക്കുമ്പോള് പഴയ വസ്തുക്കള് പൊതുസ്വത്തായി സൂക്ഷിക്കണമെന്നാണ് ബോര്ഡ് തീരുമാനം. ഈ ഉത്തരവ് നിലനില്ക്കേയാണ് പ്രയാര് ഗോപാലകൃഷ്ണന്റെ ബോര്ഡ് വാജി വാഹനം തന്ത്രിക്ക് നല്കിയത്.തന്ത്രിക്ക് ചട്ടവിരുദ്ധമായി വാജി വാഹനം കൈമാറിയതില് യുഡിഎഫ് സര്ക്കാര് നിയമിച്ച ബോര്ഡിനും കുരുക്കാകുകയാണ്.
സ്വര്ണക്കൊള്ള വിവാദം ഉയര്ന്ന വേളയില് വാജി വാഹനം തന്റെ പക്കലുണ്ടെന്ന് തന്ത്രി കണ്ഠര് രാജീവര് സമ്മതിച്ചിരുന്നു. സ്വര്ണക്കൊള്ള കേസില് തന്ത്രി അറസ്റ്റിലായതിന് പിന്നാലെ ചെങ്ങന്നൂരിലെ വീട്ടില് നടത്തിയ പരിശോധനയിലാണ് വാജി വാഹനം പ്രത്യേക അന്വേഷണ സംഘം കണ്ടെത്തിയത്.
പഞ്ചലോഹത്തില് സ്വര്ണം പൊതിഞ്ഞതാണ് വാജിവാഹനം. ഇത് തന്ത്രി കൈവശം വച്ചത് വിവാദമായിരുന്നു.
