ചെമ്മണ്ട (മലപ്പുറം): അമൂല്യവും പ്രായോഗികവും ശാസ്ത്രീയവുമായ ഭാരതീയ ജ്ഞാനപരമ്പരയെ ദിവസവുമുള്ള ആചരണത്തിലൂടെ തിരിച്ചുകൊണ്ടുവരണമെന്ന് സ്വാമി ഹരിബ്രഹ്മാനന്ദ തീര്ത്ഥ.
ചെമ്മണ്ട ശാരദ ഗുരുകുലത്തില് പത്ത് ദിവസമായി നടന്നുകൊണ്ടിരുന്ന ന്യായശാസ്ത്രകാരിയശാലയുടെ സമാപന സമ്മേളനത്തില് സംസാരിക്കുകയായിരുന്നു അദ്ദേഹം. ഭാരതീയ ജ്ഞാനപരമ്പര ദൈനംദിനജീവിതത്തില് ചേര്ക്കുന്നതിനായി പഞ്ചാംഗം പഠിക്കുകയും അതിനെ പരിശീലിക്കുകയും വേണം. പഞ്ചാംഗം ഭാരതീയ കാലഗണനയുടെ അത്യന്തം പ്രായോഗികമായ രൂപമാണ്. ഇതില് നക്ഷത്രവും തീയതിയും ദിവസവും മാസവും എല്ലാം വളരെ ശാസ്ത്രീയമായ രീതിയില് കണക്കാക്കപ്പെട്ടിട്ടുണ്ട്, സ്വാമി പറഞ്ഞു.
ഭാരതീയ ദാര്ശനിക അനുസന്ധാന പരിഷത്തിന്റെയും, കേന്ദ്രീയ സംസ്കൃത സര്വകലാശാലയുടെയും സംസ്കൃത ഭാരതിയുടെയും സംയുക്ത ആഭിമുഖ്യത്തിലാണ് കാര്യശാല സംഘടിപ്പിച്ചത്. കേന്ദ്ര സംസ്കൃത സര്വകലാശാല വൈസ് ചാന്സിലര് പ്രൊഫ. ശ്രീനിവാസവര്ഖേഡി സംസ്കൃത ഭാഷയും വിവിധ ശാസ്ത്രങ്ങളും പഠിക്കേണ്ടതിന്റെ ആവശ്യകത വിവരിച്ചു.
സമാപന സമ്മേളനത്തില് ജ്യോതിഷ പണ്ഡിതനായ കടുപ്പശ്ശേരി പത്മനാഭ ശര്മ മുഖ്യാതിഥിയായി പങ്കെടുത്തു. കേന്ദ്രീയ സംസ്കൃത സര്വകലാശാലയുടെ അഷ്ടദശി പദ്ധതിയുടെ ഭാഗമായി ഗുരുകുലത്തില് നടന്നുവരുന്ന മൂന്ന് വര്ഷത്തെ ശാസ്ത്രപരിചയപദ്ധതിയായ നാചികേതസത്തിന്റെ കഴിഞ്ഞ ബാച്ചിലെ കുട്ടികളുടെ വിഷയാവതരണവും പ്രമാണ പത്രവിതരണവും ഉണ്ടായിരുന്നു. ശാരദ ഗുരുകുലം ശിക്ഷണ വിഭാഗം നിദേശിക വന്ദന നാചികേതസം പദ്ധതിയെ കുറിച്ച് വിവരിച്ചു. നാഗാര്ജുനന് ചാരിറ്റീസ് അംഗമായ പി.എന്. ശ്രീരാമന് അധ്യക്ഷത വഹിച്ച സമ്മേളനത്തില് കാര്യശാലയുടെ സംയോജകന് ഡോ. ശ്രീധരരാജന്, ഗുരുകുലത്തിലെ ശിക്ഷിക ശ്രീജ കാവനാട് എന്നിവര് സംസാരിച്ചു. കശ്മീര്, ആന്ധ്രപ്രദേശ്, തമിഴ്നാട്, കര്ണാടക, ഉത്തര്പ്രദേശ്, കേരളം എന്നിവിടങ്ങളില് നിന്നായി 35 ശിബിരാര്ത്ഥികള് പങ്കെടുത്തിരുന്നു.
