കുടുംബ സ്വത്തോ നീക്കിയിരിപ്പോ എനിക്കില്ല , വണ്ടികൂലിയുണ്ടോയെന്ന് പോലും ആരും ചോദിക്കാറില്ല : സജിത മഠത്തിൽ

നാടകരംഗത്തും ചലച്ചിത്രരംഗത്തും ടെലിവിഷൻ അഭിനയരംഗത്തും തന്റെ സാന്നിധ്യം അറിയിച്ച നടിയാണ് സജിത മഠത്തിൽ . മികച്ച രണ്ടാമത്തെ നടിക്കുള്ള അവാർഡ് നേടിയ സജിത സംഗീത നാടക അക്കാദമിയിൽ ഡെപ്യൂട്ടി സെക്രട്ടറിയായും പ്രവർത്തിച്ചിട്ടുണ്ട്. ഇപ്പോഴിതാ പങ്കെടുക്കുന്ന പരിപാടികളിൽ നിന്ന് കൃത്യമായി പ്രതിഫലം ലഭിക്കില്ലെന്ന് പറഞ്ഞ് രംഗത്തെത്തിയിരിക്കുകയാണ് സജിത .

പ്രോ​ഗ്രാമുകൾക്ക് ക്ഷണം ലഭിച്ച് ചെല്ലുമ്പോൾ വണ്ടികാശ് പോലും പലരും തരാറില്ലെന്ന് സജിത പറയുന്നു. ചിലവഴിച്ച മണിക്കൂറുകൾക്ക് അനുസരിച്ച് അർഹതപ്പെട്ട പ്രതിഫലം ലഭിക്കണമെന്ന് താൻ ആ​ഗ്രഹിക്കുന്നുവെന്നും സജിത പറഞ്ഞു.

‘ ഞാൻ ഈ വർഷം നന്നാവാൻ തീരുമാനിച്ചതിന്റെ ഭാഗമായാണ് ഇവ തുറന്നു പറയണമെന്ന് കരുതുന്നത്. കഴിഞ്ഞ വർഷം പകുതി മുതൽ ഞാൻ തൊഴിൽ രഹിതയാണ്. കുടുംബ സ്വത്തോ, നീക്കിയിരിപ്പോ ജീവിതസാഹചര്യങ്ങളാൽ എനിക്ക് ഇല്ല. പക്ഷെ എനിക്ക് ജീവിച്ചു പോകാനുള്ളത്‌ ഞാൻ എഴുത്തും, വല്ലപ്പോഴും കിട്ടുന്ന അഭിനയവും, മറ്റു ജോലികളും ആയി ഉണ്ടാക്കുന്നുണ്ട്, എന്റെ ചെറിയ ജീവിതത്തിൽ ഏറെ സന്തോഷവതിയും ആണ്. വീട്ടിൽ വെറുതെ ഇരിക്കാൻ ഇഷ്ടപെടുന്ന ഒരാളാണ് ഞാൻ. അവിടെ എനിക്ക് മിണ്ടാൻ കുറെ കഥാപാത്രങ്ങളെ ലോകം ചുറ്റുന്നതിനിടയിൽ ഞാൻ വാങ്ങിച്ചു വെച്ചിട്ടുണ്ട്. എത്ര കാലം വേണമെങ്കിലും ആ ലോകത്തു സമാധാനമായി ജീവിക്കാൻ എനിക്ക് പ്രയാസം ഇല്ല!
പറഞ്ഞുവരുന്നത്‌ മറ്റൊരു കാര്യമാണ്. കേരളത്തിനകത്തും പുറത്തും പരിപാടികളിൽ പങ്കെടുക്കാൻ വിളിക്കുന്ന സുഹൃത്തുക്കളോടും പരിചയക്കാരോടും ആണ്, നിങ്ങൾ എന്നെ ഓർക്കുന്നതിലും പരിപാടികളിൽ പങ്കെടുപ്പിക്കണം എന്ന് തീരുമാനിക്കുന്നതും എനിക്ക് ഏറെ സന്തോഷമുള്ള കാര്യമാണ്. എനിക്ക് താല്പര്യമുള്ള വിഷയങ്ങളിൽ യാതൊരു മടിയുമില്ലാതെ ഞാൻ അങ്ങോട്ട് ആവശ്യപെട്ടു പങ്കെടുക്കാൻ ശ്രമിക്കുകയും ചെയ്യും. പക്ഷെ നിങ്ങളുടെ പരിപാടികൾ എന്റെ ആവശ്യമാക്കി മാറ്റരുത്. സംസാരിക്കാനുള്ള വിഷയം പഠിച്ചു, അതിനു കുറെ സമയം ചിലവഴിച്ചു യാത്ര ചെയ്തു പോയി, സംസാരം ഒക്കെ കഴിഞ്ഞു വണ്ടികൂലിക്കു കാശു ഉണ്ടോ എന്നു പോലും ചോദിക്കാത്തത്തിൽ ദുഃഖത്തോടെ മടങ്ങി വന്ന സന്ദർഭങ്ങൾ കുറെ തവണ ഉണ്ടായിട്ടുണ്ട്. സജിതക്കു പണത്തിന്റെ ആവശ്യം ഇല്ലല്ലോ എന്നു കരുതുന്നവർ സിനിമ മേഖലയിലെ അറ്റത്തു നില്കുന്നവർക്ക് പോലും വലിയ പ്രതിഫലം നൽകാൻ ഉത്സാഹം കാണിക്കും.
മിനിമം മര്യാദ കാണിക്കുന്നരോട് മാത്രമേ ഇനി കൂട്ട് കൂടുന്നുള്ളൂ എന്നു ഞാൻ തീരുമാനിച്ചു. എന്റെ സമയം എനിക്ക് വിലപ്പെട്ടതാണ്. ചിലവഴിച്ച മണിക്കൂറുകൾ അനുസരിച്ചു reasonable ആയ remuneration കിട്ടുക, നൽകുക എന്നത് മിനിമം മര്യാദയാണ്!! അതു ചോദിക്കപോലും ഇല്ലാതെ പരിപാടികളിൽ ഇനി പങ്കെടുക്കണം എന്നു എന്നെ നിർബന്ധിക്കരുത്. മിനിമം ചോദിക്കുകയെങ്കിലും വേണം!😀 (അടുത്തപടിയായി
Proper written contract ഇല്ലാതെ സ്ഥാപനങ്ങളുമായുള്ള assignments എടുക്കേണ്ടതില്ല എന്നും തീരുമാനിക്കേണ്ടതുണ്ട്.) വളരെ വൈകി ആണെങ്കിലും ഞാൻ നന്നാവാൻ തന്നെ തീരുമാനിച്ചു 😂
(ഇത്രയും എഴുതിയത് കുറെ ആലോചിച്ചാണ്. ക്ഷമിക്കണം. നിവൃത്തി ഇല്ലാഞ്ഞിട്ടാണ്. ഏറ്റവും മര്യാദയായി ഇവ കൈകാര്യം ചെയ്തവരെ മറക്കുന്നില്ല ❤️) എന്നാണ് സജിതയുടെ ഫേസ്ബുക്ക് പോസ്റ്റ്.