ആലത്തൂര്: ബിഎസ്എസ് ഗുരുകുലം എച്ച്എസ്എസിലെ വിദ്യാര്ത്ഥികളുടെ ജീവകാരുണ്യ സംഘടനയായ ഹോപ്പിന്റെ നേതൃത്വത്തില് തേങ്കുറിശ്ശിയില് ദുരഭിമാനക്കൊലയുടെ ഇരയായ ഹരിതയ്ക്ക് വീടൊരുക്കുന്നു. ഹോപ്പിന്റെ നിര്മ്മല് ഭവനപദ്ധതിയുടെ ഭാഗമായി നിര്മിക്കുന്ന പതിനഞ്ചാമത് വീടാണ് ഹരിതയ്ക്കായി ഒരുക്കുന്നത്.
2020ലാണ് ഇതരജാതിയില്പ്പെട്ട ഹരിതയുടെ ഭര്ത്താവായ അനീഷിനെ ഹരിതയുടെ അച്ഛനും അമ്മാവനും ചേര്ന്ന് കൊലപ്പെടുത്തിയത്. അന്നുമുതല് അനീഷിന്റെ മാതാപിതാക്കള്ക്കൊപ്പമാണ് ഹരിത താമസിക്കുന്നത്. ഇവര്ക്ക് സര്ക്കാരില് നിന്ന് ധനസഹായം ലഭിച്ചെങ്കിലും, കേസ് നടത്തിപ്പും മറ്റുമായി ഒരു വീടെന്ന സ്വപ്നം ഹരിതയ്ക്ക് അന്യമായിരുന്നു. ഇതോടെയാണ് ഹോപ്പ് ഹരിതക്ക് വീടുനിര്മിച്ചു നല്കാന് തീരുമാനിച്ചത്.
വീടിന്റെ നിര്മാണോദ്ഘാടനം കെ.ഡി.പ്രസേനന് എംഎല്എ നിര്വ്വഹിച്ചു. ബിഎസ്എസ് എജുക്കേഷണല് സൊസൈറ്റി പ്രസിഡന്റ് സി.ബാലചന്ദ്രന്, ഹോപ് പ്രസിഡന്റ് ഡോ. വിജയന് വി.ആനന്ദ്, പിടിഎ വൈസ് പ്രസിഡന്റ് ദിനേഷ് പങ്കെടുത്തു.
