തിരുവനന്തപുരം: ഭാവഗായകന് പി. ജയചന്ദ്രന്റെ ഒന്നാം ഓര്മ ദിനത്തോടനുബന്ധിച്ച് അദ്ദേഹം ആലപിച്ച ഗാനങ്ങള് ജനങ്ങളിലേക്ക് എക്കാലവും എത്തിക്കുന്നതിനായി ശബ്ദ സ്മാരകങ്ങള് (മ്യൂസിക് കിയോസ്കുകള്) സ്ഥാപിക്കുന്നു. കേരള സര്ക്കാര് സാംസ്കാരിക വകുപ്പ് മുന്കൈയെടുത്താണ് ശബ്ദ സ്മാരകങ്ങള് സ്ഥാപിക്കുന്നത്.
മലയാളം, തമിഴ്, തെലുങ്ക്, കന്നട, ഹിന്ദി എന്നീ ഭാഷകളിലായി സിനിമാഗാനങ്ങള്, ഭക്തിഗാനങ്ങള്, ആല്ബം ഗാനങ്ങള് ഉള്പ്പെടെയുള്ളവയാണ് ശബ്ദ സ്മാരകങ്ങളിലൂടെ ജനങ്ങളിലേക്ക് എത്തിക്കുന്നത്. ഏകദേശം രണ്ട് സ്ക്വയര് മീറ്റര് വിസ്തീര്ണമുള്ള ചെറുകിയോസ്ക്, പി. ജയചന്ദ്രന്റെ ചിത്രം ആലേഖനം ചെയ്ത് രൂപകല്പ്പന, 24 മണിക്കൂറും തെരഞ്ഞെടുത്ത ഗാനങ്ങള് കേള്ക്കാവുന്ന ശബ്ദ സംവിധാനം. പൊതുജനങ്ങള്ക്ക് പൂര്ണമായും സൗജന്യമായി അനുഭവിക്കാവുന്ന സംവിധാനം. പരിസ്ഥിതിക്ക് ഹാനികരമല്ലാത്തതും ചെലവ് കുറഞ്ഞതുമായ നിര്മാണം എന്നിവയാണ് ശബ്ദ സ്മാരകത്തിന്റെ പ്രത്യേകതകള്.
തിരുവനന്തപുരം മ്യൂസിയം, എറണാകുളം ചില്ഡ്രന്സ് പാര്ക്ക്, തൃശൂര് തേക്കിന്കാട് മൈതാനം, കോഴിക്കോട് മാനാഞ്ചിറ മൈതാനം തുടങ്ങിയവയാണ് ശബ്ദ സ്മാരകം സ്ഥാപിക്കുന്നതിനായി തെരഞ്ഞെടുത്തിട്ടുള്ള സ്ഥലങ്ങള്. ഇതുമായി ബന്ധപ്പെട്ട ശിപാര്ശ സാംസ്കാരിക വകുപ്പ് മന്ത്രിക്ക് സമര്പ്പിക്കുകയും, അടിയന്തിരമായി തീരുമാനമെടുത്ത് പദ്ധതി നടപ്പിലാക്കുമെന്ന് മന്ത്രി ഉറപ്പ് നല്കുകയും ചെയ്തിട്ടുണ്ടെന്ന് പി. ജയചന്ദ്രന്റെ ജീവചരിത്ര ഗ്രന്ഥകാരന് എസ്. മനോഹരന് വാര്ത്താ സമ്മേളനത്തില് പറഞ്ഞു.
