കണ്ണൂര്‍: ബിഎസ്എന്‍എല്‍ കണ്ണൂര്‍ ബിസിനസ് ഏരിയയിലുള്ള ക്രമക്കേടുകള്‍ അന്വേഷിക്കണമെന്നാവശ്യപ്പെട്ട് ബിജെപി ദേശീയ സമിതിയംഗം സി. രഘുനാഥ് സെന്‍ട്രല്‍ വിജിലന്‍സ് കമ്മിഷന് പരാതി നല്‍കും.
ക്രമക്കേട് സംബന്ധിച്ച് 2024 ല്‍ കാസര്‍കോട് സ്വദേശി പ്രധാനമന്ത്രിയുടെ ഓഫീസില്‍ പരാതി നല്‍കിയിരുന്നു. കാസര്‍കോട് ടെലിഫോണ്‍ എക്സ്ചേഞ്ച് ബില്‍ഡിങ്ങില്‍ 25 വര്‍ഷമായി പ്രവര്‍ത്തിക്കുന്ന സിപിഎം നിയന്ത്രണത്തിലുള്ള ഒരു കോ-ഓപ്പറേറ്റീവ് സൊസൈറ്റി 2012 മുതല്‍ വാടക നല്‍കിയിട്ടില്ല. ഇതുമായി ബന്ധപ്പെട്ട് പ്രധാനമന്ത്രിയുടെ ഓഫീസില്‍ ലഭിച്ച പരാതിയുടെ അടിസ്ഥാനത്തില്‍ നല്‍കിയ മറുപടിയില്‍ കോ-ഓപ്പറേറ്റീവ് സൊസൈറ്റിയുടെ റെന്റ് എഗ്രിമെന്റുമായി ബന്ധപ്പെട്ട കാര്യങ്ങള്‍ പ്രോസസിങ്ങാണ് എന്നാണ്. എന്നാല്‍ ഇതുവരെ ഒരു രൂപ പോലും കുടിശിക ആയോ വാടക ആയോ വാങ്ങിയിട്ടില്ല. ബിഎസ്എന്‍എല്ലിന്റെ ലീഗല്‍ പാനലിലുള്ള അഭിഭാഷകന്‍ പോലും വാടക പിടിക്കണമെന്നും അല്ലാത്തപക്ഷം ഒഴിയണമെന്നും അടക്കമുള്ള നിയമോപദേശം നല്‍കിയിട്ടും യാതൊരു നടപടിയും എടുക്കാതെ മുങ്ങി നടക്കുകയാണ് കണ്ണൂരിലെ ഓഫീസര്‍മാര്‍.
ബിഎസ്എന്‍എല്ലിലെ റെന്റ് നിയമം അനുസരിച്ച് 2012 മുതലാണ് ഒഴിഞ്ഞ് കിടക്കുന്ന ഓഫിസ് സ്‌പേസുകള്‍ വാടകയ്‌ക്ക് നല്‍കാനുള്ള നിയമം വന്നത്.
കണ്ണൂര്‍ സ്വിച്ചിങ് ഏരിയയിലെ അധികമായി വരുന്ന ഓഫീസ് സ്പേസ് വാടകയ്‌ക്ക് കൊടുക്കണമെന്നുള്ള കേന്ദ്രസര്‍ക്കാരിന്റെയും ബിഎസ്എന്‍എല്‍ കോര്‍പ്പറേറ്റ് ഓഫീസിന്റെയും നിബന്ധനകള്‍ കാറ്റില്‍ പറത്തിയാണ് കണ്ണൂരിലെ അഡ്മിനിസ്ട്രേഷന്‍ മുന്നോട്ടുപോകുന്നത്. ഫൈബര്‍ കണക്ഷന്‍ കൊടുക്കുന്ന ഫ്രാഞ്ചൈസികള്‍ ഒരു രൂപപോലും കൊടുക്കാതെ തികച്ചും സൗജന്യമായ രീതിയില്‍ കണ്ണൂരിലെ പല ടെലിഫോണ്‍ എക്സ്ചേഞ്ചുകളും ഉപയോഗിക്കുകയാണ്. പലതും കണ്ണൂരിലെ ചില ഓഫീസര്‍മാരുടെ ബിനാമി പാര്‍ട്ണര്‍മാരാണെന്ന ആക്ഷേപവുമുണ്ട്. അവിടെ ഫൈബര്‍ കണക്ഷന്‍ കൊടുക്കേണ്ട എക്യുപ്മെന്‍സ് സ്ഥാപിക്കുവാനുള്ള പെര്‍മിഷന്‍ അല്ലാതെ ഓഫീസ് ഉപയോഗിക്കേണ്ട അധികാരമില്ല.
തികച്ചും വഴിവിട്ട രീതിയിലുള്ള ഒരു പ്രവര്‍ത്തനമാണ് കണ്ണൂര്‍ ബിഎസ്എന്‍എല്ലില്‍ നടക്കുന്നത്. കേന്ദ്രസര്‍ക്കാര്‍ കോടിക്കണക്കിന് രൂപയാണ് ബിഎസ്എന്‍എല്‍ പുനരുദ്ധാരണത്തിനും വികസനത്തിനും വേണ്ടി ഉപയോഗിക്കുന്നത്. എന്നാല്‍ തികഞ്ഞ അനാസ്ഥയാണ് ഇവിടെ നടക്കുന്നത്. കണ്ണൂരിലെ പഴയങ്ങാടി, കാടാച്ചിറ, കുഞ്ഞിമംഗലം, ചപ്പാരപ്പടവ്, കൊളച്ചേരി, ഇരിട്ടി, ഉളിയില്‍, മാട്ടൂല്‍, പാപ്പിനിശ്ശേരി എന്നിവയടക്കം കോപ്പര്‍ലാന്റ് ഫോണ്‍ കണക്ഷനുകള്‍ എല്ലാം നിര്‍ത്തുകയും ഈ സ്ഥലങ്ങളെല്ലാം സോര്‍ട്ട് ചെയ്ത് ആവശ്യത്തിനുമാത്രം ഉപയോഗിച്ച് ബാക്കി വാടകയ്‌ക്ക് കൊടുക്കണമെന്നുമാണ് കോര്‍പ്പറേറ്റ് ഓഫീസിന്റെ നിബന്ധന. എന്നാല്‍ ഇതൊന്നും കണ്ണൂരില്‍ പാലിക്കുന്നില്ല. ഈ സാഹചര്യത്തിലാണ് സി. രഘുനാഥ് സെന്‍ട്രല്‍ വിജിലന്‍സ് കമ്മിഷന് പരാതി നല്‍കുന്നത്.
