ടെഹ്റാന്‍: എന്തിനാണ് ഇറാന്‍ നേതാവ് അലി ഖൊമേനി സിറിയയിലെ ബാഷര്‍ അല്‍ അസ്സാദ് പറന്നതുപോലെ റഷ്യയ്ക്ക് പറക്കാന്‍ ഇഷ്ടപ്പെടുന്നത്? കാരണം അവിടെ എത്തിയാല്‍ സുരക്ഷിതരായിരിക്കാം എന്നതാണ് നേതാക്കള്‍ക്കുള്ള ഉറപ്പ്. അവിടെ വന്ന് ഈ നേതാക്കളെ പിടിച്ചുകൊണ്ടുവരാന്‍ ഒരു ട്രംപും വരില്ലെന്ന ഉറപ്പാണ് റഷ്യയിലേക്ക് പോകാന്‍ ഈ നേതാക്കളെ പ്രേരിപ്പിക്കുന്നത്.
2024 നവമ്പറിലാണ് സ്ഥാനഭ്രഷ്ടനാക്കപ്പെട്ട സിറിയയുടെ ബാഷര്‍ അല്‍ അസ്സദ് റഷ്യയിലേക്ക് പറന്നത്. അവിടെ ആരും പിടിച്ചുകൊണ്ടുപോകില്ലെന്ന മനസ്സമാധാനത്തോടെ അല്‍ അസ്സദ് ജീവിക്കുകയാണ്. ഇറാന്റെ കലാപകാരികളെ അമര്‍ച്ച ചെയ്യാന്‍ പറ്റാത്ത രീതിയില്‍ ഇറാനില്‍ കലാപം വളര്‍ന്നുകഴിഞ്ഞിരിക്കുന്നു. കലാപകാരികള്‍ക്കെതിരെ പട്ടാളത്തെ ഇറക്കുന്നതിനേക്കാള്‍ നല്ലത് സുരക്ഷിതമായ റഷ്യയിലേക്ക് പോകുന്നതാണ് നല്ലതെന്ന് ഖൊമേനി കരുതുന്നു. കാരണം അമേരിക്കയ്‌ക്ക് തന്നെ പിടിച്ചുകൊണ്ടുപോകാന്‍ കഴിയില്ലെന്ന മനസ്സമാധാനം ഖൊമേനിക്കും ഉണ്ട്. ഇവിടേക്ക് അമേരിക്കയുടെ ഡെല്‍റ്റാ ഫോഴ്സ് വന്നാല്‍ പോലും വന്നത് മാത്രമേ ഓര്‍മ്മയുണ്ടാകു. ഒരിയ്‌ക്കലും സ്വന്തം രാജ്യത്തേക്ക് അവര്‍ക്ക് തിരിച്ച് പറക്കാന്‍ കഴിയുമെന്ന് തോന്നുന്നില്ല. അത്രയ്‌ക്ക് ശക്തമാണ് റഷ്യയുടെ യുദ്ധക്കരുത്ത്. നാല് വര്‍ഷം ഉക്രൈന്‍ എന്ന രാജ്യത്തിന്റെ പിന്നില്‍ നിഴലായി നിന്ന് 27 നേറ്റോ രാജ്യങ്ങളും അമേരിക്കയും തന്ത്രങ്ങള്‍ എല്ലാം പയറ്റിയിട്ടും റഷ്യയെ ക്ഷീണിപ്പിക്കാന്‍ ഇതുവരെയും കഴിഞ്ഞിട്ടില്ല.
മാത്രമല്ല, കരുത്തുറ്റ ആണവശേഷിയും റഷ്യയുടെ പക്കലുണ്ട്. ഒരു നിവൃത്തിയുമില്ലെങ്കില്‍ ജയിച്ചില്ലെങ്കിലും ശത്രുവിനെ ആഴത്തില്‍ മുറിവേല്‍പ്പിക്കാന്‍ റഷ്യയ്‌ക്കാവും. അതുകൊണ്ട് തന്നെയാണ് റഷ്യയെ നേര്ക്ക് നേര്‍ വെല്ലവിളിക്കാന്‍ അമേരിക്കയോ നേറ്റോ രാജ്യങ്ങളോ മുതിരാത്തത്. പകരം ഉപരോധം ഉള്‍പ്പെടെയുള്ള ചതിതന്ത്രങ്ങളിലൂടെയാണ് റഷ്യയുടെ കരുത്ത് അവര്‍ ചോര്‍ത്തിക്കളയാന്‍ ശ്രമിക്കുന്നത്.
