കൊച്ചി: സിനിമയില്‍ അഭിനയിച്ചുകൊണ്ടിരുന്ന കാലത്ത് വേര്‍പിരിയാന്‍ കഴിയാത്ത സുഹൃത്തുക്കളായിരുന്നു കലാഭവന്‍ മണിയും ദിലീപും. ഇരുവരും മിമിക്രി രംഗത്ത് നിന്നും സിനിമയിലേക്ക് വന്നവരാണ്. ശരിക്കു പറഞ്ഞാല്‍ കലാഭവന്‍ എന്ന മിമിക്രി ട്രൂപ്പിലൂടെ സിനിമാരംഗത്ത് എത്തിപ്പെട്ടവരാണ്.
പിന്നീട് രണ്ടുപേരും സിനിമയില്‍ വിജയിച്ചുകയറിയ നടന്മാരായി. അപ്പോഴും അവരുടെ സൗഹൃദം തുടര്‍ന്നു. രണ്ടുപേര്‍ക്കും പെണ്‍കുട്ടികളാണ്. കലാഭവന്‍ മണിക്ക് ഒരു മകള്‍- ശ്രീലക്ഷ്മി. ദിലീപിനും മഞ്ജുവാര്യരില്‍ ഉണ്ടായ ഏക മകള്‍-അതാണ് മീനാക്ഷി. രണ്ടുപേരും മക്കളെ ഡോക്ടര്‍മാരാക്കാന്‍ കൊതിച്ചു.
അവരുടെ മോഹം പോലെ ശ്രീലക്ഷ്മിയും മീനാക്ഷിയും ഡോക്ടര്‍മാരായി മാറി. 2025 ഏപ്രിലില്‍ ആണ് ശ്രീലക്ഷ്മി ഡോക്ടറായി വന്നത്. ദിലീപിന്റെ മകള്‍ മീനാക്ഷി നേരത്തെ ഡോക്ടറായിരുന്നു. മകളുടെ ശമ്പളം കൊണ്ടാണ് താന്‍ ജീവിക്കുന്നതെന്ന് ഏതാനും മാസം മുന്‍പ് ദിലീപ് തുറന്നുപറ‍ഞ്ഞിരുന്നു. ശ്രീലക്ഷ്മി ഡോക്ടറായെങ്കിലും അത് കാണാന്‍ കലാഭവന്‍ മണി ജീവിച്ചിരിപ്പില്ലെന്നത് മകളെ ഏറെ ദുഖിപ്പിക്കുന്നു. കാരണം സ്റ്റെതസ്കോപ്പും വെള്ളക്കോട്ടും ധരിച്ച് മകള്‍ വരുന്നത് കാണാന്‍ കലാഭവന്‍ മണി ഏറെ മോഹിച്ചിരുന്നു.
