ന്യൂദല്ഹി: ഭാരതത്തിന്റെ പ്രതിരോധ കയറ്റുമതി 23,000 കോടി കടന്നു. 2025ലെ നേട്ടങ്ങള് വ്യക്തമാക്കുന്ന വേളയിലാണ് സൈന്യം ഇക്കാര്യം അറിയിച്ചത്. സേനയുടെ 91 ശതമാനം യുദ്ധോപകരണങ്ങളും തദ്ദേശീയ നിര്മിതിയിലേക്ക് മാറിയെന്നതാണ് നേട്ടങ്ങളില് പ്രധാനം.
പത്ത് നേട്ടങ്ങളാണ് സൈന്യം പുറത്തിറക്കിയ പ്രസ്താവനയില് എടുത്തുപറയുന്നത്. ഓപ്പറേഷന് സിന്ദൂര് മുതല് മറ്റ് പ്രവര്ത്തന, സാങ്കേതിക, തന്ത്രപരമായ നേട്ടങ്ങളും ഇതില് ഉള്പ്പെടും.
ഭാരതത്തിന്റെ പ്രതിരോധ കയറ്റുമതി 23,620 കോടി രൂപയുടെ റിക്കാര്ഡ് നേട്ടം കൈവരിച്ച വര്ഷമാണിത്. 2014 വരെ ഇറക്കുമതിയെ ആശ്രയിച്ചിരുന്ന സേന ഇത്തവണ ആ ചരിത്രം തിരുത്തിക്കുറിച്ചു. പ്രതിരോധ കയറ്റുമതിയില് ഭാരതം ആഗോളതലത്തില് 25 രാജ്യങ്ങളുടെ പട്ടികയില് ഇടം നേടിയിട്ടുണ്ട്.
അതേസമയം, ഒരു വര്ഷത്തിനുള്ളില് ഏകദേശം 3000 റിമോട്ട് പൈലറ്റഡ് വിമാനങ്ങള്, 150 ടെതര്ഡ് ഡ്രോണുകള്, സ്വാം ഡ്രോണുകള്, ഉയര്ന്ന പ്രദേശങ്ങള്ക്കായുള്ള ലോജിസ്റ്റിക് ഡ്രോണുകള്, കാമികേസ് ഡ്രോണുകള് എന്നിവ ഭാരതം തദ്ദേശീയമായി വികസിപ്പിച്ചു. കൂടാതെ പ്രതിരോധ രംഗത്ത് വലിയ തോതില് ഡിജിറ്റലൈസേഷന് നടന്ന വര്ഷമാണ് 2025 എന്നും സേന കൂട്ടിച്ചേര്ത്തു.
കൃത്യതയോടെയുള്ള പ്രഹരം, നൂതന യുദ്ധ തന്ത്രങ്ങള്, യുദ്ധ അവലോകനങ്ങള് എന്നിവയാണ് സൈന്യത്തിന്റെ 2025ലെ മറ്റ് സുപ്രധാന നേട്ടങ്ങള്.
