പന്തളം: ശബരിമല മകരവിളക്ക് മഹോത്സവ തിരുവാഭരണ ഘോഷയാത്രയുടെ രാജപ്രതിനിധിയായി പന്തളം രാജകുടുംബാംഗം പുണര്തംനാള് നാരായണവര്മ്മയെ നിയോഗിച്ചു. പന്തളം കൊട്ടാരം വലിയതമ്പുരാന് തിരുവോണംനാള് രാമവര്മ്മ വലിയരാജയാണ് നാരായണവര്മ്മയെ രാജപ്രതിനിധിയായി നിയോഗിച്ചത്.
2018-ലെ സുപ്രീംകോടതി വിധിയുമായി ബന്ധപ്പെട്ട് പന്തളത്ത് നാമജപഘോഷയാത്രയ്ക്കും ആചാര സംരക്ഷണത്തിനും സജീവ നേതൃത്വം നല്കിയത് നാരായണവര്മ്മ ആയിരുന്നു.
പന്തളം ശ്രാമ്പിക്കല് കൊട്ടാരത്തില് പരേതയായ തിരുവോണംനാള് അംബ തമ്പുരാട്ടിയുടെയും കോട്ടയം നട്ടാശ്ശേരി കാഞ്ഞിരക്കാട്ട് ഇല്ലത്ത് കെ.എന്. നാരായണന് നമ്പൂതിരിയുടെയും മകനാണ്.
അഡ്വക്കേറ്റ് ജനറല് ഓഫീസില് അണ്ടര് സെക്രട്ടറി ആയിരുന്നു. വലിയകോയിക്കല് ശ്രീധര്മ്മശാസ്താ ക്ഷേത്ര ഉപദേശക സമിതി കൊട്ടാരം പ്രതിനിധി, ശബരിമല അയ്യപ്പ സേവാ സമാജം സംസ്ഥാന അധ്യക്ഷന്, ആലുവ തന്ത്രവിദ്യാപീഠം രക്ഷാധികാരി എന്നീ ചുമതലകള് വഹിക്കുന്നു.
പന്തളം പാലസ് വെല്ഫയര് സൊസൈറ്റി സ്ഥാപക അംഗമാണ്. സൊസൈറ്റി ഖജാന്ജി, കൊട്ടാരം നിര്വാഹക സംഘം സെക്രട്ടറി എന്നീ ചുമതലകള് വഹിച്ചിട്ടുണ്ട്.
ക്ഷേത്ര ആചാര സംരക്ഷണ സമിതിയുടെയും തിരുവാഭരണപാത സംരക്ഷണ സമിതിയുടെയും സ്ഥാപകാംഗവും രക്ഷാധികാരിയുമാണ്.
ഭാര്യ: രാജലക്ഷ്മി വര്മ്മ, വൈക്കം (റിട്ട. എസ്ബിഐ ഉദ്യോഗസ്ഥ. മക്കള്: പ്രീതി വര്മ്മ (യുഎസ്എ), ശ്രീദേവി വര്മ്മ (പ്രോകോര്). മരുമക്കള്: അരുണ് രവി വര്മ്മ, ശ്രീകാന്ത് നീലകണ്ഠന്. ശ്രീരാം വര്മ്മ കൊച്ചുമകമാണ്.
ഗുരുസ്വാമിയായി ശിവന്കുട്ടി
തിരുവാഭരണ വാഹക സംഘത്തിന്റെ ഗുരുസ്വാമിയാവുന്നത് മരുതവനയില് ശിവന്കുട്ടി സ്വാമി. പന്തളം കൊട്ടാരം നിര്വാഹക സംഘമാണ് ശിവന്കുട്ടിയെ ഗുരുസ്വാമിയായി ചുമതലപ്പെടുത്തിയത്. പന്തളം മങ്ങാരം മരുതവനയില് നാരായണപിള്ളയുടെയും ജാനകി അമ്മയുടെയും മകനാണ്. 40 വര്ഷമായി തിരുവാഭരണ വാഹകസംഘത്തില് അംഗമാണ്. ഭാഗവത പാരായണത്തിലും ശ്രദ്ധേയനാണ്. 20 വര്ഷമായി ഗുരുസ്വാമി ആയിരുന്ന കുളത്തിനാല് ഗംഗാധരന് പിള്ള അനാരോഗ്യം കാരണം വിരമിച്ചിരുന്നു.
