പത്തനംതിട്ട: ദേവസ്വം ബോര്ഡ് മുന് പ്രസിഡന്റ് എ. പത്മകുമാറിന്റെ അറസ്റ്റോടെ മന്ദഗതിയിലായ സ്വര്ണക്കൊള്ള അന്വേഷണം ഹൈക്കോടതി വിമര്ശനത്തോടെ വേഗത്തിലാക്കാന് എസ്ഐടി. സര്ക്കാര് സമ്മര്ദത്തില് നടപടികള് വൈകിപ്പിച്ച എസ്ഐടി, ദേവസ്വം ബോര്ഡ് മുന് അംഗങ്ങളായ കെ.പി. ശങ്കരദാസ്, വിജയകുമാര് എന്നിവരെ ഉടന് കസ്റ്റഡിയില് എടുക്കുമെന്നാണ് സൂചന. മുന് ദേവസ്വം മന്ത്രി കടകംപള്ളി സുരേന്ദ്രനെ വൈകാതെ ചോദ്യം ചെയ്യാനും സാധ്യതയുണ്ട്.
പോലീസ് അസോസിയേഷനിലൂടെയാണ് എസ്ഐടിക്കുമേല് സര്ക്കാര് സമ്മര്ദം ചെലുത്തിയത്. അന്വേഷണം സിപിഎം ഉന്നതര്ക്കും മുന് മന്ത്രിമാര്ക്കു നേരെയും എത്താതിരിക്കുക, സ്വര്ണക്കൊള്ളയുടെ വ്യാപ്തി ലഘൂകരിച്ചുകാട്ടുക എന്നിവയായിരുന്നു സര്ക്കാരിന്റെ ലക്ഷ്യങ്ങള്. പത്മകുമാറിന്റെ മൊഴിയുടെ അടിസ്ഥാനത്തില് തുടര്നടപടികള് നടന്നാല് അത് മുന് മന്ത്രി കടകംപള്ളിയിലേക്കും പാര്ട്ടി ഉന്നതങ്ങളിലേക്കും എത്താനാണ് സാധ്യത. ഇത് ഏതുവിധേനയും തടയുക എന്നതായിരുന്നു ഉദ്ദേശം.
കെ.പി. ശങ്കരദാസിനെ ഒരിക്കല് പേരിനുമാത്രം ചോദ്യം ചെയ്ത് എസ്ഐടി വിട്ടയച്ചിരുന്നു. പത്മകുമാറിനു പിന്നാലേ അടുത്ത ഊഴം ശങ്കരദാസ് ആണെന്ന് വ്യക്തമായതോടെ അദ്ദേഹത്തിന്റെ മകനും തൃശൂര് ഡിഐജിയുമായ ഹരിശങ്കര് ചെലുത്തിയ സമ്മര്ദവും തുടര്നടപടികള് മന്ദീഭവിക്കാന് കാരണമായി. തെരഞ്ഞെടുപ്പ് കഴിഞ്ഞ് ദിവസങ്ങള്ക്ക് ശേഷമാണ് കേസിലെ പ്രധാന കണ്ണികളില് ഒരാളായ മുന് തിരുവാഭരണ കമ്മിഷണര് ആര്.ജി. രാധാകൃഷ്ണനെ അറസ്റ്റു ചെയ്തത്.
സ്വര്ണക്കൊള്ളയില് സമാന്തര അന്വേഷണത്തിന് ഇ ഡിക്ക് ആവശ്യമായ രേഖകള് കൈമാറാന് കൊല്ലം വിജിലന്സ് കോടതി ഉത്തരവിട്ടതും, അന്വേഷണം മന്ദഗതിയിലാക്കിയ എസ്ഐടിയെ ഹൈക്കോടതി നിശിതമായി വിമര്ശിച്ചിരുന്നു. ഇതോടെ, ഗത്യന്തരമില്ലാതെയാണ് ശങ്കരദാസിനെയും വിജയകുമാറിനെയും കസ്റ്റഡിയില് എടുക്കാന് നീക്കം സജീവമാക്കിയത്. സ്മാര്ട്ട് ക്രിയേഷന്സ് സിഇഒ പങ്കജ് ഭണ്ഡാരിയേയും റോധം ജൂവലറി ഉടമ ഗോവര്ദ്ധനേയും അറസ്റ്റ് ചെയ്തിട്ടും ഹൈദരാബാദ് സ്വദേശി നാഗേഷിനെ ചോദ്യം ചെയ്യാത്ത എസ്ഐടി നിലപാട് വീണ്ടും ഹൈക്കോടതിയുടെ വിമര്ശനത്തിന് കാരണമായേക്കും. ഇനിയും ഉദാസീനത തുടര്ന്നാല് ഇ ഡിക്ക് പുറമെ സിബിഐ അന്വേഷണത്തിനു കൂടി ഹൈക്കോടതി ഉത്തരവിടുമോ എന്ന ഭയവും എസ്ഐടിക്കും സര്ക്കാരിനുമുണ്ട്.
അന്വേഷണം ശരിയായ രീതിയിലാണോയെന്ന സംശയം ഹൈക്കോടതിയില് നിന്നുണ്ടായാല് അന്വേഷണ സംഘത്തിനൊപ്പം സര്ക്കാരിനും വലിയ തിരിച്ചടിയാകും. അന്വേഷണത്തിന് അനുവദിച്ച ഒരു മാസത്തെ അധിക സമയത്തിന്റെ പാതിയും പിന്നിട്ട സാഹചര്യത്തില് ഇനി മെല്ലപ്പോക്കു തുടര്ന്നാല് അടിമുടി പാളുമെന്ന ഭയത്തിലാണ് അധികൃതര്.
ജന്മഭൂമി ഓണ്ലൈന്