നെടുമ്പാശേരി: നാഷണല് സെക്യൂരിറ്റി ഗാര്ഡിന്റെ വ്യോമയാന വിഭാഗം 52 സ്പെഷല് ആക്ഷന് ഗ്രൂപ്പ് (എസ്എജി) കൊച്ചി അന്താരാഷ്ട്ര വിമാനത്താവളത്തില് സമഗ്രമായ റിയല്-ടൈം ആന്റി- ഹൈജാക്ക് അഭ്യാസം വിജയകരമായി നടത്തി. യഥാര്ത്ഥ വിമാനത്തില് നടത്തിയ ആന്റി- ഹൈജാക് ഡ്രില്ലില് 52 എന്എസ്ജി കമാന്ഡോകള് പങ്കെടുത്തു.
വിവിധ ഏജന്സി പങ്കാളിത്തത്തോടെ നടത്തിയ അഭ്യാസം 19ന് ആരംഭിച്ച് ഡിസം. 20ന് പുലര്ച്ചെ അവസാനിച്ചു. ലൈവ് ഓപറേഷനില് വ്യോമസുരക്ഷാ ഭീഷണി നിലനില്ക്കുന്ന സാഹചര്യത്തിലെ പ്രവര്ത്തനസജ്ജത, പ്രതികരണ സമയം, ഏജന്സികളിലുടനീളമുള്ള ഏകോപനം, കമാന്ഡ്- കണ്ട്രോള് സംവിധാനങ്ങള് എന്നിവ വിലയിരുത്തപ്പെട്ടു. ഹൈജാക് ചെയ്യപ്പെട്ട വിമാനം കൊച്ചി അന്താരാഷ്ട്ര വിമാനത്താവളത്തില് ഇറങ്ങുന്നുവെന്ന സാങ്കല്പിക സാഹചര്യം സൃഷ്ടിച്ചു. അതോടെ ഏറോഡ്രോം എമര്ജന്സി മാനേജ്മെന്റ് കമ്മിറ്റി (എഇഎംസി) ഉടന് പ്രവര്ത്തനക്ഷമമായി. തന്ത്രപരമായ തീരുമാനമെടുക്കല്, ഏജന്സികള് തമ്മിലുള്ള ഏകോപനം, ചര്ച്ചാ നടപടികള്, മെഡിക്കല് സജ്ജത, അടിയന്തര ആശയവിനിമയ സംവിധാനങ്ങള്, യാത്രക്കാരുടെ സുരക്ഷ തുടങ്ങിയ എല്ലാ അടിയന്തര പ്രതികരണ നടപടികളും അഭ്യാസത്തിലൂടെ സമഗ്രമായി പരീക്ഷിച്ചു. 52 എസ്എജി, എന്എസ്ജി ഗ്രൂപ്പ് കമാന്ഡര് കേണല് അമിത് കുമാര് അഭ്യാസത്തിന് നേതൃത്വം നല്കി.
ജില്ലാ കളക്ടര് പ്രിയങ്ക ജി., വിമാനത്താവള ഡയറക്ടര് ജി. മനു, ഡിസിപി മഹേഷ് എസ.് എന്നിവര് വിവിധ ഏജന്സികളുടെ ഫലപ്രദമായ ഏകോപനത്തിലൂടെ തങ്ങളുടെ നടപടിക്രമ ചുമതലകള് നിര്വഹിച്ചു.
ദേശീയ സുരക്ഷാ ശ്രമങ്ങള്ക്ക് പിന്തുണ നല്കാനും എല്ലാ യാത്രക്കാരുടെയും സുരക്ഷ ഉറപ്പാക്കാനും സിയാല് പൂര്ണമായും പ്രതിബദ്ധമാണെന്ന് സിയാല് എംഡി എസ്. സുഹാസ് പറഞ്ഞു.
